正常我係2月15黎m，但到依家都未黎，距離上次性行為都隔左一個星期（全程有戴套加外射)我係15號同17號都驗過孕，15號個次係陰性，17號個次用晨尿加用埋電子個隻驗都係陰性，其實我係咪唔係再擔心自己係有左？但我真係未試過個週期長過35日
性行為隔左成個星期係指15號之前
你好啊！睇返你嘅情況，懷孕嘅風險係比較低嘅。其實係性行為7日後驗孕其實已經會有初步結果，11日後驗孕就比較準確，因此你15號同17號驗孕果結果都比較準確，而結果呈陰性，因此懷孕嘅風險比較低。
我想問下你會唔會呢排會唔會好大壓力、有失眠、生活習慣有改變或者唔舒服、食過藥嘅情況呀？
女性月經延期係一件令人擔心嘅事，但係放心，唔一定係懷孕先會有月經延期嘅，有時過度嘅減重又或者果排好大壓力都會導致內分泌失調，令身體停止排卵，又或者因為一啲疾病嘅情況，例如甲狀腺功能失調等等，甚至簡單到生活習慣嘅改變，都會引致月經延期。
如果真係擔心會懷孕，可以搵醫生檢查下先，一般門診醫生都可以幫到你嘅。
我之前翻學通常都12點前訓，不過由新年假開始到依家晚晚都差唔多2點幾先訓，仲要有時訓下醒下，係咪咁樣都會影響到週期
同埋我上網睇話驗孕有時會出現假陰性，所以都驚自己係，其實假陰性出現既機會係咪不大？
係架，唔規則嘅睡眠模式都有可能造成經期混亂架。特別係你啱啱改變咗睡眠嘅習慣，所以身體都仲係度調節緊，俾啲時間自己個身體去適應返你嘅節奏啦
。
同埋你地個次性行為入邊如果有正確咁使用安全套嘅話，懷孕嘅風險係好低架。另外你哋係用安全套再加埋體外射精，咁樣都會令使用安全套嘅避孕效果提高架。
其實出現假陰性嘅原因有兩個，一個係你使用驗孕棒嘅方法唔正確，如果你有跟足盒內說明書去做原則上就無問題架啦。亦都有可能係太早驗孕或者係測試之前飲咗大量嘅水，稀釋咗尿液裡面嘅荷爾蒙，減低咗檢測嘅準確性。
另外，因為你係用預計月經嚟嘅日子去驗孕，而且你驗咗兩次，所以你15號同17號驗已經幾準確架啦。