我好驚失去佢 佢係唔係唔愛我啦

你好啊 我只係想吹下水 關於愛情問題。
我同男朋友(I)都識左三年,係係香港童軍去英國交流團識既,佢同我同一隊,年紀細我一年。我拍過三次拖都係失敗收場,有兩次係比人玩弄感情(一年)(兩個月)、一次係因為對方(半年)要去外國讀書。我同 I 都一直鍾意大家,但係因為時間既問題 ,我同左我第三個男朋友一齊,不過一齊做兩個月就分左。後來我接受左 I 既追求,但係我對 I 既感覺已經不如之前係交流團咁。之後我 I 就係原本個旅團轉左同我同一個旅團(香港大約有千個旅團)我以為我可以一心一意咁鍾意佢,但係原來唔得,因為我好怕再受傷害,我唔敢交個心出去。我同 I 一齊既時候離離合合過三次,三次都係我提分手但亦係我提復合,因為我怕傷害到佢,我係佢初戀,我同佢一齊既時候就好似play girl,但係其實我內心係鍾意佢。當佢問一啲好深入既問題我都會想避開,因為我面對唔到佢,佢都知道我既經歷,所以都原諒我接受我,願意等我。分手幾次我都好唔捨得佢,可能你的地會話叫我放過佢,不過我做唔到。所以第四次復合我終於諗清楚,我自己冷靜左三個月,我主動追返去,亦決定好好咁愛佢。係我第一咁不顧一切衝出門口係佢出現既地方搵佢,同佢講我一直以黎既想法,我叫佢比多最後一次機會我相信我,我都知道今次真係最後一次機會,所以既然我真係咁鍾意佢就唔應該再推開佢。好幸好我都現時為止都無變心,而且對佢既感覺仲不斷飆升,我同 I 依家已經兩個月,我好想同佢一齊行落去,因為我都知道佢好愛我。但係問題黎啦,自從我追返佢之後,我同佢既角色好似調轉左,佢好多野都係暗示比我,成日好怕羞,要我tum佢,呢樣我覺得唔緊要,最緊要既係佢唔會好似之前咁我唔開心佢會主動tum我,send 心心kisskiss,佢要我開到聲先識做。但係當面對面既時候佢又好識做,佢啲好細心既行為睇得出佢好愛我。我成日問佢佢愛唔愛我,佢話好愛超級愛,問佢會唔會唔要我,佢就會話點解覺得會唔要我?問佢既愛我,佢話係講唔到,而且已經係爆左,爆到漏,係好愛好愛。佢咁耐以黎每次送比我既禮物都好適合我,佢亦都話係我一定會鍾意。最近情人節佢送左個菲林相卷我,好多我地既相,同埋寫左好多野。但係我有時候真係好矛盾。所以我開始驚,我驚重蹈覆轍,每次當我真係比心出去既時候,我都會咁樣成日擔驚受怕,好怕佢會覺得我煩,會嫌棄我,最後會拋棄我。但係當我地面對面既時候,佢會好識得安慰我,tum我,鍚我,攬我。我亦都好肯定佢係無第二個。究竟佢咁樣係因為我地拍拖耐左?覺得無必要係whatsapp咁做?定係佢唔愛我?我真係唔想無左佢,因為佢真係一個好好既男仔,佢為我付出左好多,佢亦都感受到我對佢既愛。有時候女仔都希望可以有時候無意中收到一句我愛你or 任何emoji有關愛情。希望可以比到小小意見我:pray:t2::disappointed:sorry for 1999 同埋咁長篇大論

我真係好愛佢 已經無法自拔 我對佢已經係任何人都唔可以替代 因為我在無辦法隱藏我呢三年黎對佢既感情 我亦都欺騙唔到自己 甚至係我地朋友 佢地都好支持我放低以前既經歷 好好同佢一齊 我同 I 都好希望我地可以白頭到老 可以結婚 建立屬於我地既家庭。到現時為止我地只係說過一次性交 其他都係用手指、撫摸、口交等等。記得最近幾次我同佢親密之後我whatsapp同埋當面都問過佢 會唔會厭倦個人同埋身體 佢話佢唔會 我問佢點解 佢話因為愛 因為我地之間有愛 我都問過你同我一齊係唔係為左生理需要 佢話唔係 因為佢愛我所以先同我一齊 決定相信我 不過當然只有小部分係解決生理需求 但係只對自己鍾意既人 先會想同佢有咁親密既關係。我真係好開心 覺得自己好幸福 。所以求求大家可以解答下我上面既問題,同埋我可以就咩解決方法,等佢係whatsapp 見到我都一樣咁熱情:disappointed::pray:t2::pray:t2::persevere::cry:

啊!仲有啊佢好願意覆我 基本上一日長時間都係同我傾緊計 除非佢同朋友或者上堂 佢都唔會同其他女仔傾計 除非童軍事務 佢都好放心我啲佢手機 有埋我face id 我手機都有 btw 上年聖誕節即係我生日 主動帶我出去見佢啲朋友介紹我比佢地識。咁所以其實係唔係我多疑,心理影響咋:pleading_face:

頭先同佢講早晨 我問佢「寶寶,你愛我嗎:see_no_evil:」佢答我「我愛你呀:see_no_evil:」 咁其實係唔係我諗多左:thinking:

你好呀wwl!睇得出你真係好怕再受傷害,每一次都小心翼翼咁樣向前行,一有風吹草動就縮返轉頭,每一步都好怕好怕,害怕好似之前咁俾人玩弄,只要對方離開咗一陣,就會忍唔住諗:「佢係咪唔再鍾意我啦,好似之前啲男朋友咁,呢個係咪佢要拋棄我嘅前兆。」

感情係兩個人嘅事嚟,好多時候情侶之間嘅問題並唔係你唔愛我或者我唔愛你,而係係溝通上面有阻礙,例如明明唔係咁諗,但係都照講出嚟。好似你咁,明明係愛佢,但因為怕佢傷害你,所以提出分手,防止自己受到傷害,避免「以生命值硬接」嘅痛苦。但係你愛佢嘅心始終無變到,所以即使要放低面子,要放低「樽鹽」,甚至要打倒昨天的我,你依然會去求佢,希望佢原諒魯莽、陰晴不定嘅你,每一次都係咁。

直至最後一次,你開始醒覺,佢唔係理所當然係你身邊,而你依然愛佢。你用咗三個月去沉澱,終於,你不顧一切衝出門口,係你熟悉嘅佢會去嘅地方等佢。慶幸嘅係,佢依然仲係你熟悉嘅佢,佢依然都係果個地方出現。更加開心嘅係,你同佢敞開心扉之後,佢都願意再俾一次機會你地。請注意,係俾多一次機會「你地」,而唔係「你」。

但你慢慢開始感覺到唔妥,點解佢好似無以前咁熱情嘅?點解佢唔再主動嘅?點解好似調轉咗角色咁嘅?

你就好似刺蝟咁,一遇到危機就會縮埋一舊,將自己埋係無數嘅刺裡面,以為咁樣就唔會受傷害。嗯,的而且確,你係唔會再受到傷害,但係重新擁抱你嘅佢呢?好難講你一次又一次講分手有無傷害到佢。

每一次你提出分手然後提出再復合,佢都同你一樣經歷緊被分手同埋被要求復合,都可能試過感到忽冷忽熱,咁樣嘅你,佢都要時間去適應,又或者調整態度去同你相處。原因未必係唔再愛你,或者感情變淡,反而可能係佢都好怕你會再離開佢,好似你咁開始小心翼翼,驚自己嘅熱情會燒到你,所以先唔敢咁主動去表達自己熱情,選擇做被動嘅一方,等你問起再答。

我覺得重新再係返埋一起,兩個人都會有種「好似同以前唔同咗」嘅感覺,你地可能都要時間去縫合以前嘅傷害,而治療呢啲傷口嘅藥物,可能係時間,可能係互相坦承,可能係諒解,可能係信任,而答案,只有「你地」先會知道。

不妨試下同佢講你嘅擔心,既然你同佢都覺得自己今次揀定咗,亦都決定全心全意去愛對方,咁就好應該同對方坦坦白白。除咗講自己有啲咩擔憂之外,都好應該比對方知道自己想要嘅親密度或者空間係幾多,自己會點表達愛,同埋對對方點表達有啲咩期望。好多時情侶鬧交都係因為大家對關係有嘅期望唔一致,而呢啲情況好多時候都係可以透過溝通去改嘅:pleading_face:唔講對方又點知你真實而家諗緊咩呢,係咪?

不過都要係平靜同大家都舒服嘅情況下提起,而唔係係爭吵嘅時候怪責對方,咁樣嘅溝通係無效架。:wink: