最近認識一種叫做Jelq增大法，是一種比較自然的陽具增大法。請問這個方法是否真的有效增大陽具？和有什麼副作用？我看見網上有不少人聲稱效果不錯，不過秘訣係要堅持
還是用bathmate增大泵較好？
Hello 你講嘅Jelq增大法，其實原理上同你後面提及嘅增大泵都係好類似，都係透過練習增加令陰莖能夠充血嘅空間，亦即係海綿體。不過前者係靠自己施力，後者就係透過器具造成真空去施壓。平時男性陰莖勃起都係因為海綿體充血，而呢啲練習其實都係想令海綿體可以充血嘅容量增加，令係有性慾時可以有更多嘅血液流入，咁睇落效果就會好似增大／增長／或者提升咗持久度。
另一方面，因為男性嘅陰莖係懸掛係體外，有啲人都會有一部份係被收藏係體內，外露嘅部份並唔完全反映成個陰莖嘅長度，稱之為「隱藏性陰莖」，以致變相呢啲練習都號稱可以幫助將暗藏係體內嘅部份「拉返出嚟」。不過隱藏性陰莖多數係天生或者因為肥胖而造成，所以通常為咗處理呢啲情況而去做呢啲練習都係會經由醫生判斷再去調整頻率同手法，嚴重者亦可能會透過藥物或者手術去改善情況。
其實之前我哋係另一個post都有同你傾過一啲關於陰莖大小嘅問題，所謂「夠大」其實都係無一個特定標準，好視乎人種同成長環境等因素，其實都唔需要刻意去同其他人比較嘅。「夠用」比「夠大」其實更加緊要，「大」可能可以令你得到朋輩嘅羨慕，但好多時係性行為上，陰莖「太大」或者「太長」其實都會影響到性嘅享受程度，伴侶嘅性器官未必配合到，變相過程可能會變得唔舒服。尺寸係天生嘅，但技巧同氣氛都係可以靠人同後天培訓，呢啲方面做得好，係性上面會得到嘅滿足感亦會更加大，同埋呢啲係可以不停去研究同增值自己嘅部分，可以隨著時間或者伴侶去調整或者提升，但陰莖大小唔可以。今日你覺得大2cm先足夠，可能過多5年，你會覺得短返1cm先啱啱好，但就好難可以咁樣去做調整啦 
不過如果你覺得都係增大啲先符合你個人對於陰莖大小嘅期望，你都可以嘗試吓唔同嘅練習嘅，不過就要小心次數，同埋隨時留意住自己嘅感受，如果有痛楚，或者出現傷口，就要盡快停止啦！呢啲練習每個人需要嘅強度都唔一樣，要由淺入深，網上可以搵到嘅資訊都只可以做參考，你嘅身體感覺先係最真實嘅，如果有唔舒服嘅感覺就唔好強迫自己繼續，休息一下，睇清楚身體狀況再去調節啦！