破處有話兒

男友與我的年齡有9年差距,他曾經離婚;我拍過幾次散拖,仍未破處。自去年8月拍拖一個月後,他曾向我表示我對他來說沒有性吸引力,我有點傷心,及後我努力打扮自己,希望提升他的興趣。我也希望他也會重視我外表以外的地方(當然我明白對男人來說外貌特徵很重要)。過了一兩個月,他很想我們的關係可以更進一步,我也覺得他是我長遠的伴侶,我想給他我的第一次(這樣說可能很老土很過時,但我不希望隨隨便便跟一個人進行性行為。)

我們試了大概有5-6次吧,每次都是男上女下,沒有成功進入。由第一次放1隻手指進陰道感到很有異物感,到現在放2隻手指進陰道沒太大問題,不過進入陰道入口時我總是覺得很痛,像撕裂身體的痛楚。他也有試過戴condom嘗試進入,但到了陰道口,我對他說很痛很痛,我的不適應也令他緊張起來,小弟弟也會很快軟起來,變得不能插進陰道,每次不成功後,他也表現得很失望,又說我們應該有一段時間也不能進行性行為。

直至昨天,我們想再次嘗試,這次轉另一個體位,面對面男下女上。可是,遇到很重大的問題是原來我很不熟悉自己的下體,我很害怕陰道,我不能很準確地讓他的弟弟進入我的陰道。這次也不成功,他很氣憤,他表示他連藥也吃了,怪責我沒準備好,我哭了,他說我們的性關係不好會成為我們的障礙。我們冷靜過後,他對我說我要好好了解自己的身體,要練習用手指擴張陰道等等。

我很感謝男友的體諒和包容,我的確有很多東西要準備和學習。與此同時,我不知道自己要怎樣做才可以釋取破處的緊張? 我們要怎樣溝通令大家在性方面都相處得好?

你好!好開心你願意同我哋分享你嘅情況,其實願意去了解自己身體多啲係一件好事嚟架!

首先,我都好想俾你知道

呢個絕對唔係一個「老土」嘅諗法,每個人對於自己幾時先適合發生性行為都有絕對嘅控制權,所以你覺得要同自己能夠長遠發展嘅伴侶先發生性行為係絕對冇問題架,價值觀亦無「老土」定「新潮」之分嘅。

初次有插入式性行為其實好多人未必係一試就得架,因為緊張同擔心,都會身體肌肉收縮,陰道肌肉亦會跟隨主收縮,變相令陰道口難以被外物進入。而且因為從來都未試過有物件進入自己嘅陰道,所以一下子亦未必能夠適應陰莖,呢啲相對大體積嘅外來物去進入。而且因為強行進入嘅痛楚都會令你對「被插入」呢件事係心裡有唔少陰影同恐懼,以致之後再有類似行為嘅時候,身體都好容易會反射式地出現抗拒,同肌肉收縮。潤滑度亦係另一個重要嘅因素,女性係性興奮時都會有分泌去幫助令陰道變得濕潤,令插入式性行為比較順利。但其實每個女性天生有嘅分泌量都唔一樣,而係緊張嘅時候亦會出現分泌物變少嘅情況。下次可以試下額外加一啲潤滑劑,如果係會配合安全套使用的話就建議揀水性潤滑劑。可以用潤滑劑去輔助前戲嘅部份,一方面可以令潤滑度提升,亦可以令自己更加放鬆。

其實由手指開始慢慢去嘗試已經係一個好好嘅方法,要令身體慢慢適應會有物件進入陰道係需要時間嘅。而且其實女性比較敏感嘅部份係陰蒂,呢個位置嘅敏感度其實比起男性龜頭更加高,係一個好理想嘅刺激位置,女性亦比較容易透過刺激陰蒂達到高潮。可以試下係前戲部分加強呢部份嘅刺激,令身體同心情更加放鬆同投入,陰蒂高潮後亦會相對地更加容易做到插入式嘅陰道交嘅。

睇得出你好想去改善而家嘅情況,亦發現自己一直都無好好了解自己嘅身體。其實好多女性一生中都冇好好咁睇過自己嘅陰部,不妨試下搵一日沖完涼係床上面用鏡去照一照自己嘅陰部,好好睇清楚其實自己嘅陰部係點樣,每一個部份係喺邊個位置。另一樣可以做嘅係透過自慰去更加了解自己嘅敏感點,到底邊一個位,或者點樣嘅刺激係最容易令自己覺得舒服同放鬆。唔需要強迫自己即刻嘗試插入式嘅自慰,可以先由刺激陰蒂或者身體其他位置例如乳頭開始,令自己對「性接觸」同「性歡愉」有多啲認識,慢慢放低抗拒嘅感覺。之後就可以嘗試係插入式,手指係一個個好好嘅工具,不過就要記住修剪好指甲邊緣,亦要確保有足夠潤滑,慢慢試下唔同角度同埋頻率嘅抽插或者按壓。你亦可以考慮下用唔同設計嘅性玩具去輔助,市面上亦有一啲性商店係有售賣幫助陰道練習同擴張嘅套裝,呢啲一般會包括4-5枝唔同尺寸嘅棒棒,等使用者可以由小至大,由淺至深慢慢去嘗試,訓練自己陰道肌肉嘅彈性同適應力~

雖然AV同現實係兩回事,好多情節都係虛構同剪接出嚟,但其實有唔少AV係以女性自慰為主要角度,都不妨參考一下。透過觀察其他女性點樣刺激自己嘅敏感部位,都有助自己有啲概念可以邊啲方向入手架。當然一開始選擇一啲比較入門級嘅影片,避開一啲太誇張或者用太大尺寸嘅玩具去抄襲嘅情節,對自己嘅衝擊都會比較少,會容易啲接受。

見到你話當你哋唔能夠成功插入時,男朋友都會表現緊張或者失望,亦有試過有變軟嘅情況。其實呢個都係因為情緒同嘗試時遇到障礙而造成一啲心理壓力,都係可以慢慢改善嘅,無需要因為咁樣而覺得自責。因為性行為係兩個人嘅事,唔能夠因為你嘅狀況未適應到就將責任推晒係你身上。而且陰莖有變軟嘅情況亦可以有好多原因影響,例如係休息足唔足夠,身體狀況健唔健康,年齡亦係一個好大嘅因素。

其實如果你未準備好發生陰莖插入陰道嘅性交,性行為都唔係淨係得呢個形式嘅。可以嘗試下口交、手淫、指交等等嘅形式:男朋友可以為你口交,指交,你亦可以為對方口交,手淫。透過非插入式嘅性刺激去互相幫大家到達高潮都係一個既有情趣又可以更加了解對方身體嘅方法呀~慢慢習慣有性刺激後,身體對於要發生性行為嘅緊張同恐懼都會慢慢減低,咁之後再嘗試插入式都會比較容易嘅。

不過,感覺而家係關係中好多時都係由對方去做主導,特別係「性」方面,你好努力去嘗試,係為咗可以令自己盡快準備好投入同對方發生性行為,希望可以做到對方所期望嘅,滿足對方對性嘅期望同渴求。而達唔到對方嘅期望都為你構成咗一定嘅壓力,但其實你自己對於「性」又有咩感覺同期望?見到你話希望可以同伴侶係性方面「溝通」同「相處」得好啲,「溝通」並唔代表「你做任何事去滿足對方」。你首先都要知道自己想要嘅其實係點樣嘅「性」,咁樣先可以同伴侶真誠地溝通,講出大家嘅期望,想發展到嘅程度,想發展嘅速度。其實你嘅伴侶可能都好渴望想知道你嘅諗法,可能因為你感覺自己唔了解自己嘅身體,所以好少去講自己嘅感受,就會俾人感覺「你都無咩所謂」或者「伴侶開心就好」。

性唔係一件可以一步登天嘅事,除咗physical嘅刺激,心理狀況,情感上嘅交流都同樣重要。其實人最大嘅性器官就係你嘅大腦,佢控制你對性嘅感受、期望同欲望,亦會控制你嘅分泌同肌肉。要令自己從心底慢慢去認識性,認識性歡愉,都係重要嘅一步。而且,「性」唔一定需要有其他人嘅加入先可以去認識同發掘,更加唔係一個用來「維持關係」嘅工具。兩個人之間嘅性,係一個溝通、尊重、感情交流嘅機會,唔係為咗滿足其中一方嘅慾望,而係應該要雙方都能夠因此而得到歡愉。所以都希望你會慢慢係探索嘅過程中搵到自己對「性」同「關係」嘅期望,亦可以係性行為。

你好呀,明白你既擔憂,不過係解決你提出既問題(如何破處)之前,都希望你去諗吓以下呢幾條問題:你覺得性係一種享受,定係一種付出?你覺得性中兩人既關係係要互相取悅,定係一方要去取悅另一方?你係咪真係已經準備好進行第一次性愛?

睇你既描述,我相信你已經認定左男朋友係你長遠既伴侶,亦相信佢有吸引你之處。你提到,「我想給他我的第一次」,感覺「第一次」對你黎講係一個珍藏好耐禮物,遇到認定既人時就俾出去,以表示自己好愛佢。但,性唔係咁樣work。一段關係中,性愛唔係送一份禮物,而係兩方係準備好之下,可能經過好多磨合,經過好多包容理解,先會發生到既一樣野。尤其係,當你係因為愛而想發生性,並唔係因為慾望而想發生性,咁就更加需要雙方有耐心,好似煮野食咁,需要時間同技巧。想問你,假設你男朋友從黎都冇性經驗,亦從黎都冇提過想同你進行性行為,只想同你普通拍拖,唔扑野,你宜家既心情亦都會係相同嗎?你會都係咁急想「俾自己佢」,定係如果呢件事有得遲啲再發生,你寧願佢遲啲發生

呢度想問你第一條問題:你覺得性係一種享受,定係一種付出?由你同男朋友第一次嘗試性行為,到最近呢一次,你有無試過覺得好舒服、好想要呢?相信你係一個好溫柔既女仔,會因為男朋友既評價而努力打扮自己,等佢鍾意自己多啲,會因為男朋友想要,而努力想俾性既體驗佢。但你眼中係點睇自己,同埋自己既需要?好多野,唔係about him,而係about you。性愛唔係一方「俾」另一方既野,而係你都要feel到「想要」,而唔係只睇佢「想要」就ok。雙方既有任何一方唔enjoy,都唔可以算係合格既性愛。如果你暫時並唔係enjoy sex,而身體對你發出既信號都係「nono」,你係咪真係需要咁快chur住自己去進行陰道交?假設第一次真係進行到,但你唔享受,你係咪以後寧願唔享受都要「俾」?

第二問就係:你覺得性關係中既兩人,係要互相取悅,定係一方要去取悅另一方?你描述左好多男朋友係插入失敗後既反應,「每次不成功後,他也表現得很失望」,「他很氣憤,他表示他連藥也吃了,怪責我沒準備好」,佢咁樣講,會唔會令你感覺到自責呢?其實,你既男朋友有幾愛你都好,係呢件事上,佢都冇任何資格去因為你既身體狀態而「失望、氣憤、怪責你」。簡單而言,你冇做錯任何野,亦都唔需要覺得sorry,因為你既身體係你自己既。佢應該尊重你身體既反應。睇得出,你好睇重你地之間既關係,想解決性上既問題,你亦都試圖去維繫呢段關係而去make efforts。但係,當佢發現你地進行唔到性行為,佢有冇efforts,去俾少啲壓力俾你,俾多啲時間,或者同你一齊試下其他方法呢?就咁睇,佢似乎係俾左一個task你,要你完成,而唔係陪你一起去探尋。

你同你既男朋友,年齡有差距,性經驗上有一定差距,係好正常。但係佢都有過第一次,冇人係一開頭就明白性係如何開始。性,重要既唔係如何將陰莖夾硬插入去陰道,而係兩方明白對方對性既睇法、對方對性既需求,再決定係行一大步,定係每次行一小步。性行為唔係一次達陣,而係一個好長既旅行。尤其當你認定左佢,係你既長期伴侶,咁佢係咪都應該accept左你既身體,同埋你既諗法先?呢個世界,有好多女仔都經歷過好多磨合先進行到第一次,因為每個人既身體狀態都唔同,對此你既男朋友又係咪準備好呢?

最後想你諗吓:你係咪真係已經準備好進行第一次性愛?見到你地前後都試左不下10次性行為,似乎係好迫切「好想要」。但所謂準備好,唔單止係你既身體係咪接受到陰莖,都包括左你心理上,有幾理解自己對性既需求,仲有你既伴侶,佢係咪準備好同你迎接兩個人一齊既摸索。每個人對性、愛、性愛既睇法都唔同,有時唔係我地身體,而係mindset,決定左我地既行為。例如,性係一段關係之中有幾重要?愛係咪一定要有性?你同男朋友,係呢方面既認識又係咪相近?

1個讚