急!!好驚有咗 如果係應該點算

25/2 &琴日 同女朋友無帶套一齊做,之後都外射咗幾次,每次外射都有抹乾淨陰莖,25號嗰日都有沖涼。好後悔宜家先知個危險性…
好擔心會唔會有咗:sweat_drops:
如果有 應該點算??
家計會嘅藥用墜胎要幾錢??

同埋事後丸可以邊到買?
家計會買 需唔需要通知家人?:bowing_man:t2:‍♂:bowing_man:t2:‍♂

你好呀,你嘅情況的確係有意外懷孕嘅風險嘅,雖然係無係陰道內射精,但男性係性興奮嘅時候陰莖已經會有透明嘅尿道球腺分泌,當中都係有機會含有精子。所以雖然比起係體內射精嘅風險低啲,但都唔代表係完全唔會懷孕。

事後丸需要係性行為後72或者120小時之內食,而且係香港係需要醫生處方嘅藥物,所以必須要先經醫生診斷先會開藥嘅。家計會有提供120小時內服食過一種藥物,因為需要當事人見醫生,所以你女朋友本人需要去家計會診所嘅。如果係26歲以下,需要先打去/網上同青少年保健診所果邊預約 (https://www.famplan.org.hk/zh/our-services/clinic-services/youth-health-care/content)) ,同姑娘講係想見醫生食事後丸就可以架啦。如果係26歲以上就只需要係辦公時間內直接上去有婦女服務嘅診所(https://www.famplan.org.hk/zh/our-services/clinic-services/women-health/women-health-service/content)) 就可以架啦,唔需要預約。除咗家計會,好多私家診所都會有事後丸提供,如果預約唔到家計會,都可以考慮去就近嘅診所睇醫生,不過最好就先打去問下診所有無提供藥物先,咁就唔使白行一趟啦。

不過因為你哋係2月25日都有發生過安全性行為,呢一點記住到時都要同醫生講,可能會需要同你女朋友初步驗孕確保係無懷孕先會再就佢嘅身體情況判斷要唔要開藥食。因為香港合法性交嘅年齡係女方需要年滿16歲,如果女朋友係16歲以上,家計會除非因為身體狀況危急否則都唔會需要通知屋企人。而且家計會本身係唔會有你哋屋企人電話,所以原則上佢哋係無可能可以係無你同意之下聯絡到屋企人架。如果係16歲以下,家計會姑娘會單獨同當事人見面,理解一下性行為發生時嘅狀況,例如係唔係係清醒嘅狀況下發生,知唔知對方係邊個,主要都係以擔心當事人精神同心理狀況為主,亦都唔會係無得到當事人同意之下報警或者通知屋企人,所以唔使擔心。

至於如果真係意外懷孕可以點做,到時就要考慮自己有冇能力或者屋企人會唔會可以支援到繼續懷孕或者日後照護小朋友嘅情況,最好都係同屋企人商量下先,好難可以完全瞞住佢哋架。一旦意外懷孕,可以選擇(1)繼續懷孕,自行/同伴侶一齊撫養(2)繼續懷孕,透過 母親的抉擇 為小孩尋找領養家長(3)終止懷孕。

如果選擇終止懷孕,要係香港合法地進行手術,必須先經兩位醫生同意確認「繼續懷孕」對孕婦 或 嬰兒 嘅身心構成嘅威脅比「終止懷孕」大。 手術亦只能夠係香港法例「指定嘅醫院或診所」進行,包括家計會,並由註冊醫生負責執行。因為唔係所有醫院都可以進行,加上需要先經過詳細檢查同確保當事人適合進行終止程序,一般人都唔係可以即時進行到手術。而為咗保障孕婦嘅安全,香港衛生署指引提到除非為咗孕婦生命安全著想,否則必須係懷孕24週之內(大概5-6個月)進行終止,而家計會終止懷孕服務嘅標準就係懷孕10週之內。懷孕週期越長,手術嘅風險就越大。

終止懷孕可以透過藥物或者進行真空吸引手術進行。
藥物:使用會刺激子宮收縮嘅藥物令胚胎組織排出體外。因為毋須麻醉,對子宮傷害較細,風險亦相對較低。除咗藥物可能有副作用,另一個缺點係有機會未能完全引流,需要進行手術去完成流產。

真空吸引術:將胚胎組織吸出體外。過程需要局部或全身麻醉,雖然完全成功嘅機會率比較大,但對身體特別係子宮嘅傷害亦會比較大,術後需要多加休養身體。

家計會進行終止懷孕手術嘅費用大概要$4500-6000,亦會需要一定嘅時間去排期,視乎個段時間嘅手術量,當事人嘅身體狀況等因素,由決定要終止懷孕到實際做手術大概需要2星期到一個月左右。而實際會用邊種方式去進行終止懷孕就要靠醫生檢查後再去決定嘅。

體外射精絕對唔係可靠嘅避孕方法,唯有使用安全措施,例如安全套或者荷爾蒙避孕方法先可以比較有效地預防懷孕,雖然無方法(除咗唔發生性行為)係可以100%避孕,但是至少有做到一啲措施都會令自己安心啲嘅。你哋而家嘅情況盡快預約醫生食事後丸去做緊急避孕會比較好,希望今次嘅經歷之後你哋對於安全性行為嘅重要性會了解多啲,係日後在發生任何性接觸都會考慮使用安全措施。

服用事後丸之後亦可能會出現短暫嘅副作用,例如作嘔,出血等等,亦有機會會影響下一次經期,呢啲情況係好正常,對藥效係無影響嘅。

無論發生咩事都好,你嘅陪伴都係對你女朋友最大嘅支持,希望你哋都可以平安度過今次嘅關口 :persevere::persevere: 我哋亦會一直係度陪伴你哋,如果有咩事歡迎隨時再同我哋傾,如果緊急啲或者需要深入啲傾吓,亦都可以WhatsApp我哋。

另外補充多少少,如果真係意外懷孕而又決定要終止懷孕,因為終止懷孕係一個醫療程序,會有一定風險,所以如果當事人未夠18歲,係必須要有佢嘅家長/法庭監護人簽字先可以做呢項手術。所以如果真係意外懷孕,盡早同屋企人商量或者係一個比較理想嘅做法。好明白你哋可能都會擔心屋企人知道自己有發生性行為,或者意外懷孕會有好多反應,亦好常見到/聽到其他人嘅情況係屋企人會好嬲或者好反感,但呢啲都係其他人嘅經歷,未必可以完全代表係你哋嘅屋企人會有嘅反應。情況未必係你哋想像中咁差,屋企人亦未必係只會責罵你哋。如果你哋係未夠18歲,係處理呢件事上面有屋企人嘅支持相信都會令你哋安心好多。

而家都無人知係咪會意外懷孕,你哋所發生嘅性行為亦唔係100%會懷孕,所以都唔需要太過擔心或者overthink太多可能會發生嘅事。你哋願意去積極面對而家嘅問題,考慮做緊急避孕已經係作出咗好盡責嘅一步!我哋會一直係度支援你哋嘅,唔使擔心!

真心好多謝你一提供咁多資訊:bowing_man:t2:‍♂:bowing_man:t2:‍♂,亦都好感激你願意幫我地:sweat_drops::sweat_drops:
Thank youuuu​:pray:t2:

1個讚

用clearblue驗孕棒驗咗,result 係橫線 not pregnant​:sneezing_face:,btw清唔清楚clearblue準唔準:sweat_drops:
預約梗家計食事後丸:sweat_drops:

其實市面上每款驗孕棒嘅準確度都係相當高嘅,只要有正確咁去使用,同埋睇結果,原則上結果都係可信嘅。你今日驗孕嘅結果係反映緊你2月25號當日嘅性行為應該無懷孕,因為距離性行為過咗9日,結果都有一定準確度嘅;當然係11日後或者預計經期再驗結果會更加準確,但暫時去睇都係無因為25號嘅性行為而懷孕嘅。不過上到家計會嘅時候都要同醫生講埋25號都有發生過安全嘅性行為,等醫生更加清楚你哋嘅狀況啊!醫生亦有可能會再要求要驗孕,到時就要遵從佢哋嘅指示去做啦~