咁樣算唔算出左事...

第一次做愛,全程有戴套,做足安全措施,檢查無穿無漏用埋雙重保護安全套。兩星期後黎m前一日有正常M痛第二日準時黎m但比平時第一日少好多同黎得一日 過兩個禮拜都驗孕陰性啦 。

第一次之後好緊張好大壓力好怕出事成日驚到想喊咁但明明無乜需要驚,而因為唔洗返大學日日留係屋企所以生活習慣變左,訓多左又準備考試又無運動唔落街,唔知係咪因為咁經期有變。

希望有人解答倒我問題啦

你好啊,acid。係架,壓力都係導致月經狀況,例如經血,長短等有變化嘅一個原因,仲有好多外在及內在因素可以導致月經不穩定,例如:休息時間係咪足夠、長期熬夜、生活習慣改變、服用過藥物、長期處於擔心狀態等。所以即使今次同你以往嚟m嘅狀況有啲唔一樣,都唔需要太擔心。:wink:

我見到你都好醒目,識得過兩個禮拜先去驗孕,因為驗孕棒最佳使用時間一般是預計受精時間11日之後,如果你用嘅方法跟足說明說,基本上只要有月經嚟,又有驗孕係無懷孕就可以排除懷孕嘅可能性架啦。:grinning:

睇得出你好擔心會意外懷孕,亦見到你已經好努力做足安全措施,但都好似未係好放心,我好好奇有咩原因令你特別擔心啊?如果真係好擔心,其實仲可以考慮同時用埋荷爾蒙避孕法,例如係避孕藥、避孕針等等,本身呢啲方法嘅意外失敗率係低啲,事前避孕藥大概0.3-9%,避孕針就大概0.2-6%,加埋安全套一齊用就安心又放心啦。:slight_smile:

平時黎m黎好多好準時,應該黎m嗰日前有m痛有爆瘡有頭痛,插過入去都見到有血水好似平時黎m前咁,依排自己係好大壓力係咁喊,但有黎m嘅徵兆一路m痛個肚又谷住咁又無m出黎:upside_down_face: 明明正確使用安全套又係嗰啲雙重保護, 性行為後又驗孕係陰性,但依家啲m咁樣所以好驚

唔好意思應該話 之前有一日m好少流量然後驗左無事今次係痛但唔黎所以又驚多次

依家update下 我一路有m痛肚漲 抹尿下面嗰個位會有啲血水咁

Hello acid:relaxed: 就如 @Kaleo_StickyRiceLove 所講,因為你驗孕結果係無懷孕,所以你第一次做愛嘅經歷,係無導致你懷孕:blush: 可以放心先。

聽得出你因為呢件事,所以精神壓力都好大:pleading_face: 而壓力過大,都有機會影響到內分泌失調架。

想了解番你最近身體有無出現其他異樣?例如M痛有無同平日嘅有唔同(痛嘅程度、位置、狀況)?你性行為後,或者黎月經之前又有無其他分泌物出現/有異樣(顏色、氣味、質感)?下陰部分又有無出現痕癢,或者小便刺痛情況?

因為以上嘅情況,都係同常見嘅陰道感染子宮發炎有關嘅徵狀。如果你無以上嘅徵狀,原則上身體應該無咩問題,唔需要太擔心。有機會真係如你所講,最近生活習慣改變,情緒壓力起伏,導致內分泌失調,出現血水嘅情況。

其實最近有唔少人因為停課,生活習慣改變,令到經期都出現左變化:wink: 所以都唔需要太擔心係因為懷孕,令到下體流出血水,或者令到經期出現改變:blush:

又或者可唔可以分享多D有關血水嘅情況? 經期本身應該係幾時黎,同埋平日持續幾耐?流血水嘅情況係咪依然持續緊,持續左幾多日?血水量大概有幾多?如果流血水嘅時間比一般經期時間長,都建議嘗試去家計會或者一般門診睇醫生,檢查一下,睇下身體係咪出現左咩情況:woman_health_worker:t2::man_health_worker:t2:

最後,呢段時間有無服用過其他藥物(例如感冒藥、抗生素類藥物、荷爾蒙藥等)?都有機會影響到經期~:grinning: