我係男 大約28歲有時做sex 發覺自己有以下問題
前一兩日自慰左 或者 前晚好夜瞓 唔夠瞓
就會變左下體硬度不夠 加上自己工作壓力同心理壓力
往往做愛五至十幾分鐘後轉姿勢就好快會軟 唔知係咪技術不好 聽人講瞓低轉起身會將啲血充去全身 所以就會軟
永遠只有一兩個熟悉嘅體位先入到
唔習慣用安全套 一用就會覺得刺激唔到 唔夠硬
唔知係咪因為自慰太多 當減少後有改善 而家食緊中藥調理 因為本身以前捱夜太多 工作每天十多小時 導致肝同腸差影響腎
Remarks: 每朝都有晨勃
而家都唔敢同異性上床了 擔心再係咁要睇醫生
陰莖勃起後嘅硬度的確會受唔同嘅因素影響架，好似你所講嘅唔夠休息同壓力大都係其中之一。至於你提到擔心因爲自慰次數頻密所以影響陰莖嘅硬度同持久度，依個的確有可能影響陰莖嘅敏感度，但亦都有機會同自慰嘅習慣有關，如果自慰嘅時候習慣用力按壓或者磨擦陰莖嘅話，有機會令陰莖習慣左嗰種力度嘅刺激，以致喺性愛嘅時候覺得陰道嘅刺激唔足夠，因為即使陰道會收縮但個力度都未必及得上你自己用手自慰嘅力度嘅。另外，如果自慰嘅時候習慣左淨係刺激龜頭嘅話，都有機會減低龜頭嘅敏感度，而影響性愛時陰莖嘅硬度同持久度嘅。如果你發現自己有依啲習慣嘅話，唔洗太擔心，只需要暫時停止自慰同性愛一段時間，陰莖嘅敏感度就會自然提升返，之後就可以回復返自慰同性愛架啦~
見你提到性愛轉姿勢嘅時候會軟左，想你知道依樣係好正常嘅事黎架，並唔係因為你技術唔好，或者對方唔夠吸引，只係陰莖係唔一定喺全個性愛嘅過程中都keep住硬，而軟左都唔代表你無感覺，所以唔需要因爲咁而覺得自卑。遇到依個情況嘅時候只需要温柔地讓對方幫你剌激下陰莖，或者你用手刺激下，陰莖就會慢慢硬返架啦
不過想帶出一點就係陰莖喺性愛時嘅持久度都同性愛時嘅環境、温度、你當日嘅身體狀態(例如攰唔攰、有無唔舒服等等)有關嘅，所以你地都可以留意下依啲因素~
至於安全套嘅問題，有機會係因為安全套嘅size或者質料唔適合你所以影響陰莖嘅敏感度，平日買安全套嘅時候可以睇返盒背面嘅量度尺寸圖 ; 而質料方面可以試下用傳熱度較高嘅PU物料安全套，大部份市面上標示0.01/超薄安全套都係用PU物料造嘅，不過用嘅時候就要留意返需唔需搽啲潤滑劑先戴，因為PU物料無咁耐磨，如果唔夠潤滑有機會磨穿左個套。
希望可以幫到你釋除你嘅疑慮，有咩疑問都歡迎同我地講架
多謝你詳盡既解答
請問除左減少自慰 休息多d
仲有沒方法可以提升硬度？
謝謝你
唔少情趣用品店都有賣增加陰莖嘅硬度同持久度嘅gel/spray，原理係增加陰莖嘅血液循環，從而延長陰莖充血嘅時間，如果你有興趣嘅話可以買黎試下，建議去有門市嘅情趣用品店購買，因為可以了解清楚產品嘅來源先購買，使用前亦都記住要睇清楚說明書，如果用後有仼何不適就記住立即停用同埋徹底清洗有塗抹產品嘅部位。
另外，你亦都可以試下喺性愛嘅時候使用陰莖環(或稱為持久環)，佢嘅使用方法係喺性愛嘅時候配合潤滑劑套喺龜頭嘅狀溝上或者陰莖根部，咁就可以阻止陰莖嘅血液回流，從而令勃起時更強硬。同樣地記住要喺有信譽嘅情趣用品店購買，亦都記住要睇使用說明書，因為陰莖環係有使用嘅時間限制嘅，如果唔按說明書使用嘅話有機會影響陰莖嘅功能。
請問會唔會有 有信譽既情趣用品店介紹？ 我好少去同唔知會唔會有頭先你講既產品…
你可以去以下依幾間睇下，佢地嘅產品有品質保證，門市嘅店員亦都好用心解答顧客嘅問題，所以如果邊款產品適合自己或者喺使用上有咩唔明白都可以放心問佢地架 另名佢地亦都有喺Facebook/Instagram，或者以workshop形式推廣正面嘅性觀念同埋分享關於性嘅小知識架~
https://www.sallystoy.com/
不過其實除左依幾間之外都仲有好多情趣用品店嘅，你可以喺網上search我上面提到嘅product名或者類別，之後就應該會揾到有賣依啲產品嘅情趣用品店架啦~ 咁你就可以比較下唔同嘅牌子同價錢，不過都係記住留意返產地來源，唔好因爲平而買左啲不明來歷嘅產品阿!
請問如果食1d 輔助品例如加拿大楓之寶既男士健康產品（提升能力） 會唔會建議？
你好呀Boy！因為保健品其實對身體嚟講都係補充作用，都想了解返你食保健品嘅原因係啲咩呀？因為好似 @Ana_StickyRiceLove 咁講，其實令你陰莖硬度唔夠硬嘅情況都有好多，要了解真正嘅原因先可以對症下藥嘅。而好大部分提高陰莖硬度嘅藥物都係一啲增加血液循環嘅藥嚟，因為陰莖勃起嘅時候係靠海綿體充血令佢變大，而增加血液循環就令多啲嘅血進入到海綿體裡面，因而陰莖就會睇落去大啲同埋硬啲。但係，每個人對於每個保健品嘅反應，同埋身體狀況都會影響食完之後嘅成效，建議你同家庭醫生討論下啱唔啱你啦。
如果真係就咁單純啲想增加血液循環嘅話，都未必一定需要食藥都可以做得到，可以做運動去增加全身嘅血液循環啦，又或者每日沖涼嘅時候按摩陰莖。另外都可以做一個叫凱格爾運動（Kegel exercise），凱格爾運動係不斷收縮骨盤底肌嘅運動嚟嘅，佢嘅好處有好多，其中就包括咗增加陰莖嘅硬度、改善早洩、治療前列腺疼痛等等。首先要搵到骨盤底肌係邊度先，你可以試下去小便嘅時候嘗試中斷尿流，中斷時用力嘅位置就係骨盤底肌啦。平時就唔好係小便嘅時候夾斷尿流啦，避免膀胱壓力過大。記住果收緊骨盤底肌嘅感覺，然後就可以試下每日3次，每次10下，每下都夾緊3秒放鬆5秒。因為凱格爾運動係訓練身體裡面肌肉嘅運動嚟，所以要持之以恆先會見到效果架。
感謝你的解答
請問市面既男性能力增強藥 例如偉哥
間唔中食會唔會唔係咁好？
不過我就未食過
尋晚飲完酒 少少醉送咗異性返屋企
但下面始終睇唔起勁 心情好失落…個下想死
一係就太緊張硬唔起 一係就太焦慮未硬晒就射
平時打飛機又好硬
部份男性能力增強藥，例如你所講嘅偉哥係必須經醫生處方嘅，因為依類藥物有機會有副作用，而且唔係每個男士嘅體質都適合服用，所以如果你真係想嘗試增加男性能力嘅藥物嘅話，建議你去睇醫生診斷返你嘅狀況同埋適唔適合服食依類藥物。
另外酒精其實都會影響陰莖勃起嘅狀態嘅，因為酒精中嘅乙醇會對中樞神經產生抑制作用，阻礙血液流通到陰莖，因而影響勃起功能。見你提到
其實情緒的確會影響陰莖勃起後嘅狀態架，所以建議你喺性行為嘅時候嘗試將專注力放喺享受對方為自己帶黎嘅快感上，亦都可以花多啲時間喺前戲上，讓對方刺激多啲陰莖，如果覺得對方刺激嘅方式唔到位嘅話，可以根據你自慰嘅經驗引導對方用你覺得舒服嘅方式刺激陰莖，等陰莖刺激到足夠嘅硬度之後先進行插入式嘅性行為，就可以幫助提升陰莖嘅硬度同持久度架啦
都仲考慮緊睇唔睇醫生
請問會唔會因為細個自慰太多？ 20-27歲 好似平均兩日一次
上個月食中藥補肝好似好左(特別係晨勃好硬） 嚟緊會嘗試補腎
平時三曰有做深蹲 但做完第二朝好攰
亦有食果仁幫補
做愛個陣 又擔心太多會射
到準備插又臨門軟
真係唔知可以點
請問我應該去邊度求診最好？因為唔敢問朋友
感謝
請問我點先可以刪除三天前留言？
先回答20-27歲嘅時候，平均兩日一次會唔會太多。其實自慰次數無一個標準去話「太多／太少」，不過當自慰嘅次數影響你嘅正常生活，或者同伴侶間嘅性生活，甚至性器官嘅健康，就可能有需要去調整下啦
做運動唔適宜過量，要視乎身體嘅情況 如果依家第二朝依然會好攰的話，不妨先由隔日練習開始，比身體時間去休息、復原、建立肌肉，最緊要係持之以恆
擔心自己嘅性表現係好正常嘅，可以先嘗試下性行為嘅過程中「mindfulness」
，即係先感受當下，專注喺任何比到你快感／舒服感覺嘅地方，可以係觸感，甚至乎聲音、視覺、嗅覺、味道。然後再感受內心嘅歡愉，例如興奮、親密感、享受嘅感覺 將所有擔心、憂慮、自我懷疑、自我檢討嘅想法，先放埋一邊～
當然唔係一時三刻就可以成功，令你即刻唔記得你嘅負面感覺。不過持續嘅練習，相信可以幫你慢慢增加番你嘅敏感度同埋快感 唔一定要性行為嘅時候先可以練習mindfulness，平日嘅生活嘗試多感受當下，或者自慰嘅時候，都可以練習mindfulness，慢慢感受自己身體嘅部位，同埋專注喺可能當下你腦海中令你感到興奮嘅人／畫面，都有助你之後性行為嘅時候嘗試感受當下，將負面嘅思考同埋情緒減低，甚至撇開
可以睇下呢篇文章：
https://nationalsocialanxietycenter.com/social-anxiety/male-sexual-performance-anxiety/
至於求診方面，你可以去家計會睇男性健康服務
，同醫生分享你嘅近況，睇下醫生比咩建議，甚至藥物幫助你去面對呢個困境
三日前嘅留言係無得刪除嘅