本人26歲，呢排同女友做愛錫個陣下面無乜發應，要女友輔助下先可以硬到，及有時中間做做下會軟，要再有輔助下先硬返。間中會早洩。
以前唔洗點錫下面自然有反應，做嗰時亦唔會中途軟。想問呢個係心理壓力定係其他因素？
點先可以回複以前，可以自然d勃起?
Background information:
晨勃唔係無，但係無咁硬。想問有無生理問題?
試過食偉哥，食完係正常。
幾年前都試過咁，但食左中藥痊愈返。但宜家又係咁，大概持續一年多。
你好呀 @Behappy ，其實隨住年紀嘅增長，陰莖嘅反應可能無以前咁敏感，如果能夠係女友嘅幫助下成功勃起做愛，其實都無乜大問題嘅。而你話做愛中途會軟嘅情況係你地係抽插嘅時候陰莖突然軟咗？定係係換姿勢或者其他抽出陰莖嘅時候軟咗？
因為陰莖係做愛途中疲軟都有好多原因，例如疲勞、壓力太大、煙酒過多等等，而有好多時候，當你越想係伴侶面前表現得更好嘅時候，反而表現會差咗。有時2-3個月無做，諗住今次表現得好啲，點知陰莖點都唔硬，明明好想做，但係偏偏乜都做唔到，其實只係俾自己壓力太大，同埋如果呢個情況可能之前出現過，依家再有嘅時候就會好擔心，所以都會俾壓力自己架，可以放鬆心情，休息下，可能會好啲呢。
缺乏運動都係其中一個影響性功能嘅原因嚟，因為運動其實係會增加男性嘅睾酮素，佢係一種刺激男性性慾同勃起嘅激素嚟，會隨住年齡而減少，缺乏運動就會令睾酮素減少得更快。建議你可以每個禮拜抽少少時間做下運動，特別係下肢嘅運動，因為下肢運動會刺激睾酮素嘅分泌。
同埋如果你仲有晨勃的話，其實生理上係無問題嘅。而係個人習慣方面，你自慰嘅習慣，自慰嘅頻率、強度、方式都有可能影響到做愛嘅時候陰莖嘅狀態，例如自慰嘅時候習慣咗好大力去握緊陰莖嘅，而係做愛嘅時候，女性陰道未必可以同你用手握一樣咁大力，咁個刺激感就無咁大。又或者自慰嘅頻率太高以致做愛嘅時候無辦法提起興趣都有可能架。甚或乎你自慰嘅時候用某個角度或者方式特別容易感受到快感，但做愛嘅時候無辦法達到果種角度，都可能會係做愛嘅時候快感降低而令到陰莖疲軟嘅原因。
都想問返你早洩係講緊做愛大概幾耐就射精，因為通常陰莖進入陰道後，於1至2分鐘之內射精先會係早洩嘅。依你嘅情況嚟睇，你都可以進行插入式性行為，而且都能夠完成嘅話，都唔會係早洩嘅，唔洗太擔心。都想問返你之前睇中醫嘅時候中醫有無講係咩原因呀？如果真係唔得，都可以試下尋求西醫嘅幫助。
如果真係早洩嘅話，其實都可以自己或者同伴侶一齊做下練習去嘗試下嘅，例如「斷續刺激」治療法，刺激陰莖到就快射精嘅感覺，然後停止30秒，等到個感覺減退之後繼續刺激，重複落去，直到達到你想要嘅射精時間，先持續刺激到射精。
或者 「擠捏」治療法 ，方法係刺激陰莖，直至陰莖變得堅硬挺直嘅時候，由自己或伴侶輕輕擠捉住龜頭幾秒，係暫停愛撫同性刺激約30秒之後，再次刺激陰莖。如是者重複落去，直至達到你想要嘅射精時間，先持續刺激到射精。
其實市面上都有啲安全套可以減低敏感度或者提升敏感度，你可以配合返你嘅情況去使用，例如你覺得唔夠刺激嘅時候就可以用一啲超薄安全套又或者一啲有震動環嘅安全套；如果覺得太刺激會早咗射精就可以用一啲含有「苯佐卡因」嘅安全套，「苯佐卡因」係一種局部麻醉劑嚟，可以暫時降低龜頭嘅敏感度。又或者可以簡單啲，用啲厚啲嘅安全套，物理性咁樣去阻隔太多嘅快感。
同時你都可以買啲情趣用品，嘗試同伴侶一齊使用。當然，首先要同伴侶達成共識啦，姐係伴侶同你都想用同一個情趣用品。係做愛嘅同時，增加少少變化同情趣，可能會令你突然性慾高漲架。
希望幫到你啦～
前排有好過少少,但呢排轉姿勢/抽出陰莖都會軟左,不過做做下過程都有驚自己會唔會軟左.想問有無方法improve?
同有時做做下淋左,應該繼續做定休息下? if 做做下淋左, 刻意用意念整硬佢係唔係會傷身定點?
有咩方法imrpove硬度/improve 做愛質素?
同想問一星期4,5次會唔會太多, 係唔係應該一星期1/2次好?
一段時間前(宜家停左)睇左3個中醫, 佢地d comments 個個都不同, 2個話血氣虛,另外一個有心鬱, 想問有無睇西醫的必要, 同西醫係唔係要睇泌尿外科?