危險期口交後有少量尿道球腺液的龜頭唔算正面掂到陰道口會唔會懷孕 ?

請問一下如果係危險期左右,伴侶幫自己口交完, 之後龜頭殘留好少既尿道球腺液, 龜頭唔小心掂到陰道口兩下會唔會意外成孕 ? 伴侶仲係處女 (冇磨擦,只係掂到,好快移開,唔係好正面掂到) 雖然好似唔會,但係都好驚,求解答。

會唔會係陰道口冇太濕都會游到入去…希望快啲有解答…而家好驚…

你好呀 @iasc222 欣賞你有做功課,知道尿道球腺液呢樣嘢XDD

但係都同你講返啦,其實尿道球腺液裡面嘅精子數量係比較少嘅,因此其實引致懷孕嘅機會唔算好大,而睇返你嘅情況啦,因為你口交,過經過口水嘅沖刷,其實精子嘅存活率係非常低嘅,加上精子暴露係空氣之中好快就會死亡,就算唔小心掂到陰道口,無進行過插入式性行為嘅話,懷孕嘅風險都係極低嘅,因為精子需要大量嘅前列腺液去幫助佢係子宮裡面游到去卵子度,基本上佢係陰道口無潤滑嘅情況下係唔會有辦法游到入子宮同卵子結合,因此懷孕風險基本上真係非常低,所以唔洗擔心。:relieved:

見到你有計安全期去避孕,雖然計算自己經期係一個好好嘅習慣去檢查自己身體有無異常,但係計算安全期並唔係一個安全嘅避孕方法,因為女仔嘅月經週期有好多原因會導致遲或早咗,要等到月經嚟咗之後先可以計得返排卵嘅日子,之後先可以計到安全期同危險期,因此其實並唔係十分準確,唔可以太依賴安全期嚟作為防止懷孕嘅方法:bangbang:

不過都係提一提你,進行性行為嘅時候記住要戴安全套呀,安全套係唯一一個可以防止性病傳染嘅方法,戴咗先做就爽得安心又放心啦。:relaxed:

真係好多謝你!! 我以後一定會注意返! 所以我係咪基本上唔需要再咁擔心架啦?

好似我上面咁樣講啦,基本上唔洗擔心架啦,不過你如果都係擔心嘅話,可以等到伴侶月經預計嚟果一日買驗孕棒去檢測下。:relaxed:

明白, 多謝你! :smiley: