其實係咪一懷孕就會停經 ? 同埋有冇啲前期一定有既徵狀可以觀察到 ? 如果兩個月都有月經係咪即係冇事 ?
你好呀 @iasc222 ,基本上懷孕就會停經架啦,因為月經係由於女性體內每個月都會排出一粒卵子,子宮壁膜隨黃體素嘅上升而隨之充血、增厚,準備受精卵著床同孕育胎兒。如果粒卵子無受精嘅話,子宮內膜會停止增厚並且脫落,儲存嘅血液、 殘餘細胞同黏膜會形成經血,從子宮頸口經陰道排出體外,所以就會有月經。咁如果卵子同精子結合,佢地就會變成受精卵,受精卵會係幾個小時內不斷分裂變成胚胎,會係充血增厚咗嘅子宮內膜上面著床,呢個時候因為子宮內膜有胚胎,因此就唔會脫落,所以懷孕嘅話就會停經架啦。
啱啱開始懷孕嘅頭1-2個禮拜,徵狀通常都係月經遲嚟、小便頻密、容易覺得攰、乳房脹痛、覺得嘔心或者嘔吐等等,而覺得嘔心同嘔吐通常都係大概兩個禮拜嘅時候發生。但係值得一提嘅係,呢啲狀況都有可能因為身體有其他嘅情況而出現,因此好難話透過初期嘅表徵就去判斷到底有無懷孕。
如果真係擔心嘅話,可以係預計嚟月經果1日或者性行為後7日,買一到兩個唔同牌子嘅驗孕棒去做測試,就會知道有無懷孕架啦,通常結果都會比較準確嘅。
好多謝你吖 但係我想問多少少, 如果懷孕就會停經, 咁點解頭一至兩星期都會有遲來既月經既?
如果懷孕嘅話的確唔會有月經,不過如果比月經預期嚟嘅時間遲的話,就有可能係懷孕。如果最終月經都係嚟咗嘅話,就唔會係懷孕啦。真係好擔心嘅話,都可以係月經預期嚟嘅日子去買驗孕棒嚟檢查下,最好買兩個牌子嚟驗,如果都顯示無懷孕嘅話,基本上都準確架啦。
噢, 明白了, 多謝解答!
我想問下呢, 我之前上網睇到話有啲人懷孕時會假來M, 我問想下其實係咪真同假係咪好易分, 同埋咩係假既來M
你所講嘅假黎m其實係著床性出血,即係受精卵着床時少量出血嘅情況,但並唔係所有女性受孕時都會出現依個情況嘅,主要視乎返當時嘅體質同生理狀況。著床性出血大概係出現喺受孕後7日左右,而我地主要可以從血液嘅顏色、流量、時間長短,同埋腹痛嘅情況去初步區分著床性出血同月經。喺顏色方面,經血係鮮紅色嘅,而着床出血嘅顏色係偏粉色或者啡色嘅。單靠顏色可能有啲難區分,因為經血都有機會係偏啡色嘅,所以我地可以留意下流量,着床出血嘅流量好少,而且唔會出現流量增多嘅現象;而月經岩岩開始嘅流量雖然少,但隨後會慢慢增多,而且會有血塊凝結。另外,月經嘅時間相對著床出血長,大概持續4-7日,而着床出血一般會斷斷續續,大概1-2日就結束。至於如果有經痛嘅女性,亦都可以透過腹痛嘅程度去區分着床出血同月經,因為着床出血嘅腹痛程度比經痛輕微好多,亦都唔會出現加劇嘅情況。