敏感度低?

同女友做果陣 感覺好難先射得出泥
係咪因為我之前自慰太多?
要點解決?

首先都想了解返你對性行為嘅時候好難先射得出嘅定義,因為其實由勃起到射精嘅時間係無一個標準或者所謂正常嘅長短嘅,所以都想了解多啲你所講嘅情況。而依個情況其實都受好多唔同嘅因素影響嘅,我先講下比較常見嘅3個因素俾你一個參考去檢視返自己嘅情況:

(1) 安全套唔岩size
如果安全套太緊嘅話有機會阻礙陰莖嘅血液循環而令陰莖敏感度下降嘅。想知道現時用緊嘅安全套岩唔岩size嘅話,可以參照返安全套嘅包裝盒上所標示嘅尺寸,再按佢嘅量度方法去check返適合自己嘅尺寸,通常歐美/香港嘅安全套標示嘅尺寸係安全套擠扁時橫向嘅長度,數值上係圓周嘅一半,透過量度充血嘅陰莖根部嘅圓周,再將圓周除二所得出嘅數值就係你嘅尺寸啦~ 而日本牌子嘅安全套所標示嘅尺寸通常就係安全套放平時圓形嘅直徑,可以透過量度充血嘅陰莖根部嘅圓周,再除以3.14去得出你嘅尺寸。另外,依個情況亦都有機會係因為安全套嘅質感唔適合你,除左常見嘅乳膠安全套之外,宜家亦都有傳熱度較高嘅PU物料安全套,即係市面上所見嘅超薄安全套,如果未用過嘅都可以嘗試下睇下可唔可以增加性行為時對陰莖嘅刺激,不過因為PU物料相對乳膠無咁有彈性,所以建議配合水性潤滑劑使用,以免因為磨擦而令安全套破損。

(2)性行為時嘅心理/環境因素影響
例如會唔會因為太在意自己嘅表現而造成壓力?或者有無一啲顧慮/擔心嘅事令自己唔能夠完全投入性行為嘅過程?性行為嘅環境有無一啲令你感到不適/容易分心嘅地方 (例如: 溫度、私密度、氣氛)?

(3)自慰習慣
見你提到係唔係因為你自慰嘅次數太多,都想了解返你自慰嘅頻密度同習慣。雖然自慰次數頻密有機會影響陰莖嘅敏感度,但相對之下自慰嘅習慣對於陰莖嘅敏感度影響較大,講緊嘅係自慰時會唔會習慣以用力按壓嘅方式刺激陰莖?或者會唔會習慣集中刺激龜頭?依啲嘅習慣都有機會令陰莖習慣左強烈嘅刺激,以致於性行為嘅時候因為陰道嘅刺激相比之下無咁強烈同集中,而令你相對上需要較長嘅時間先會達致高潮。如果有以上嘅自慰習慣嘅話可以嘗試減輕刺激嘅力度,或者改為刺激整個陰莖而唔係只係刺激龜頭,你亦都可以嘗試暫停自慰一段時間,令陰莖嘅敏感度自然提升返。

我諗係自慰時會用力捏住 想快啲射搞成咁
係咪唔自慰一派就可以改善到?
如果唔自慰一派期間同女友做會唔會有影響?

Hi,係呀,可能係因為你平時比較習慣自慰較用力、摷得好緊,因此同女友發生性行為時,陰道俾唔到咁既摩擦,自然會比較難射精,其實呢種情況係男性中係好常見,你亦唔需要擔心:)正如Anna所講,係咁既情況下,你可以試下暫停自慰一段時間,而下次再打飛機時嘗試減輕力度。此外你都可以調整你平時自慰時會觸摸既部位,例如試下刺激陰莖根部、睪丸,轉換唔同位置,而唔係只刺激龜頭。

同埋都想提吓你~有啲男仔會覺得自己係因為打太多飛機,先會同女朋友進行性行為時射唔到,其實好多時並唔係既:)男性自慰頻率因人而異,對有啲人黎講。每日幾次都唔算過多。性愛過程中係咪射到,其實主要都係睇同自慰相比較,果種刺激係咪足夠強烈。

另一方面,同女友進行性行為時你地其實都可以嘗試尋求唔同既刺激:)新鮮感係可以令男性感覺到唔同既刺激,例如你地可以傾下,係雙方都願意既情況下,可以嘗試唔同既性行為,例如改變環境、姿勢,亦都可以嘗試性玩具或其他情趣用品。另外,市面上有可以放大刺激感嘅condom同埋潤滑劑,都有機會令性行為期間感受到既刺激再大啲㗎:)