想問一問咩程度先會叫做陰莖彎曲呢？同埋後天有咩成因會導致彎曲，即係例如如果底褲太緊壓住佢會唔會呢？另外，如果陰莖係向下彎曲，會唔會影響佢勃起嘅高度/角度呢？
男士可以透過觀察陰莖充血後嘅狀態去檢查有無陰莖彎曲嘅情況 (亦有少數男士喺垂軟時候都察覺到陰莖彎曲嘅情況)，如果陰莖充血後唔挺直，例如陰莖前端向下彎曲呈「點頭狀」、向上彎貼緊肚皮等，又或者陰莖向左右側彎而傾斜角度大於30度，都可以視為「陰莖彎曲」。不過都想知道你係覺得自己有陰莖彎曲嘅情況定係純粹想了解多啲依個狀況？ 因為如果你懷疑自己有依個情況嘅話建議你去睇醫生做返個臨床診斷，因為陰莖彎曲有機會係由其他因素，例如繫帶太緊或者包莖問題所致。
而陰莖彎曲嘅後天成因有好多，例如陰莖硬結症(即因發炎引致陰莖嘅勃起組織形成硬結或變硬左嘅斑痕組織嘅病)、性行為時姿勢不當導致白膜破裂、外力碰撞傷及陰莖等等。而你所講底褲太緊嘅情況，除非係長年累月地著過緊嘅底褲，如果唔係都唔會導致彎曲嘅，不過內褲過緊本身都會影響陰莖嘅衛生，因為悶焗嘅環境會令陰莖容易滋生細菌，引致發炎，所以都建議著返合適尺寸嘅內褲阿
至於陰莖向下彎會唔會影響勃起嘅角度就要視乎返下彎嘅角度，如果較輕微嘅情況，例如頭先提到嘅「點頭狀」唔太明顯或者側彎角度不大嘅話，係唔一定會影響性行為或者妨礙排尿嘅，所以如果懷疑自己有陰莖彎曲嘅情況亦唔需要太擔心，先搵醫生診斷情況同成因，好多時情況並唔係你想象中咁差架