由於未有經濟能力去做激光脫毛，所以一直都剃/抆毛，搞到腋下好黑（應該係毛嘅根部/黑色素)。請問除左出去做激光美白療程外，有無腋下美白嘅方法or產品推薦呢～？
ps希望唔好建議我接受腋下黑嘅自己
，因為女仔夏天著背心，自然唔想人見到腋下咁黑～ 希望有好推薦啦，感謝～
哈哈多謝你知道我哋一定會想講啲關於腋下會黑係自然嘅，即使係黑都無問題blahblahblah，不過每個人對於靚嘅定義都好唔同，只要你覺得呢個係你真心想追求嘅狀況，其實都係冇問題架。我哋想令大家明白嘅係，好多身體狀況同變化都係自然嘅事，唔需要覺得羞愧，盲目跟隨社會趨勢，像其他人嘅做法當成為「必須」，覺得係必須要掩藏／改變嘅事或者。而係如果當事人自己覺得呢個狀況係靚，佢可以選擇維持；而當佢覺得另一個狀態嘅自己會靚啲，佢亦有權力去改變。每個人都可以係自己覺得靚嘅狀況下生存，或者追求自己覺得靚嘅狀況！
入返正題：剃/抆腋毛呢個行動令表皮角質變厚或者毛孔堵塞，變相睇落會好似深色啲。因為腋下係長期夾住，平日郁動嘅時候，呢個位置嘅摩擦度特別多，所以亦比較容易會令黑色素沉澱。除咗去做一啲美容療程，你可以試下幫腋下做磨砂（啱啱開始時可以大概1－2星期一次，如果夏天出汗多可以頻密少少），市面上都有唔少磨砂產品可以選擇。除此以外，你都可以用天然嘅方法：砂糖加蜜糖／海鹽加椰子油，混合之後敷係腋下，大概5分鐘之後再慢慢打圈摩擦然後用清水洗走。平日沖涼嘅時候亦可以使用一啲洗澡浴球（網面嘅一個波果啲）或者絲瓜絡等嘅工具去輔助沖涼液搽身呢個步驟，都有助去角質同死皮架。不過要記住磨砂嘅時候係唔需要好大力，只需要輕輕地，如果覺得好痛，可以試下換比較幼嘅糖／鹽，減低顆粒感，亦避免受傷。亦要避免係同一日剃/抆毛同做磨砂，因為剃/抆毛會令皮膚拉扯，再即刻磨砂，會比較容易磨損皮膚架！
另外亦要做足保濕，特別係磨沙（其實剃/抆毛之後都要）後，令皮膚有返一定嘅修護。揀一啲比較少香料、酒精同過敏成份嘅保濕產品亦會比較好。但亦要避免用一啲太厚重或者滋潤嘅產品，因為腋下容易出汗，太過滋潤嘅產品有機會阻塞毛孔，令堵塞嘅情況惡化或者變成暗瘡。除此之外，避免穿著腋下會好緊或者貼身嘅衣物，都可以減少摩擦，減低黑色素沈澱架。
市面上有唔少號稱可以改善腋下暗沉嘅藥膏或者產品，有時會含有酸性成分，例如果酸、杏仁酸或者維他命A酸，如果你本身皮膚係比較敏感或者對酸性成分會敏感，就要避免使用，或者係用之前徵詢下醫生嘅意見啦！希望呢啲資訊又俾到啲意見你啦～