一向係晚上8點食藥，但有2日漏食左，中間有性行為。唔知洗唔洗食事後？
3月22日-8點正常食藥
3月23日-漏食
3月24日-漏食
3月25日凌晨4點有性行為後醒起。即補食2粒
3月25日早上11點有性行為
3月25日8點正常食藥
感謝解答
之前一直都好準時食藥的，求解答
Hello Yaz嘅藥物係有24小時補食，用返你一向晚上8點食藥嘅規律，你3月23日漏食藥嘅補食時間去到3月24日晚上8點為止，而3月24日漏食藥嘅補食時間係去到3月25日晚上8點為止。你係3月25日凌晨4點有發生過性行為，之後雖然有補食2粒，但其實只有1粒藥係仍然係漏食範圍（3月24日漏食嘅藥物）之內嘅。而係補食藥物後，3月25日早上你有再性行為，然後同日晚上有準時食返藥。
總結落嚟，你有漏食而又冇係24小時內補食嘅只有3月23日嘅藥量。但因為係你再食返藥之前已經發生咗性行為，的確係有一定風險嘅。不過如果你已經持續準時服藥一段時間（例如3個月以上），而3月23日同3月24日並唔係你一個週期／盒藥嘅頭1－7日，相對風險都係會低啲嘅。可以考慮搵返食避孕藥時徵詢過嘅醫生，請佢按照返你身體狀況比意見你，或者直接去家計會／私家診所見醫生拎事後丸食。無論你會唔會食事後丸都好，如果你未來7天會發生性行為的話，最好都要額外加返安全套，減低懷孕嘅風險。
另外，都可以下載一啲紀錄食避孕藥嘅Apps，好多都可以set鬧鐘每日提醒你食藥，咁樣都可以減低自己唔小心唔記得咗食藥嘅機會。