女仔都有性需要，所以有時我有需要嘅時候會借助物件自慰，但係我係一個呢方面好細膽嘅人，即使我自慰前已用滴露洗手液洗咗雙手，用紙巾抹乾淨，我都唔夠膽將手指整入陰道，唔知點解我好驚如果唔小心hi到水龍頭再插自己會懷孕，因為我驚屋企男家庭成員都會自慰或去廁所時佢地手有精子然後掂到水龍頭 ，然後我掂到再自慰會懷孕，因為呢個原因，我以後自慰都只係隔住底褲借助自己嘅手指或皮帶扣刺激下面，但係我之後連咁樣都驚會懷孕，或者如果我下身赤裸掂到自己床單都驚會懷孕。
我明自己好神經質，呢個恐懼已經纏繞咗我一年多三個月左右，至今未見好轉，我有睇精神科醫生話我有疑病症同強逼症，會驚呢啲唔合理嘅事，其實我最驚會影響到男朋友，因為我而家就算帶套加恆常避孕丸呢種最穩陣嘅方法避孕我都唔信，對性行為有恐懼，驚懷孕驚性病，就算對方已經做左一次全面性病檢查全部陰性，我都仲係唔放心有性行為，例如我而家嘅男朋友就係初戀，咁耐以黎同過佢有一次互相無套口交同兩次無套指交，事後直到而家我都超級後悔，好驚自己會有性病，就算迄今已事隔兩年，呢兩年無出現過任何相關病徵，我地兩個亦等夠時間雙方做左性病檢查，both全部陰性，但我到而家都仲好擔心自己會患性病，特別係hpv引致嘅癌症，更加係check唔到！因為我無試過真正陰莖插入式性行為，所以醫生唔俾我做柏氏抹片check子宮頸癌。 hpv亦可因為口交指交而患上陰道癌及口腔癌等癌症，我唔肯定想問下個啲如果沒病徵，係咪會check唔到有冇患上個啲癌症？ 我就係覺得自己檢查唔到自己有冇感染hpv菌 而整天提心吊膽（不過距離上次性接觸到而家已經兩年多兩個月，醫生話冇病徵的話hpv會兩年內自行康復，而我一直冇病徵），長時間冇心機做日常生活嘅野，讀書興趣等都冇心機，同時好自責自己以前唔夠性知識，唔知道口交指交都要帶套避免性病。
所以我到而家都好驚好辛苦，自慰都唔夠膽，亦覺得自己好廢累到我男朋友， 因為自己對性嘅恐懼搞到滿足唔到男朋友嘅需要，唉，呢件事對我日常生活好大， 然後又覺得自己好無用，因為呢啲無謂嘅嘢搞到自己生活上其他野咩都做唔得唔好，而家又成日覺得自己雖然冇病徵但已經患有性病或者已經患有cancer就快死，只係我點都check唔到…
我其實自己都知道上述事情係唔合理嘅恐懼，但係我係控制唔到自己地驚。其實女仔自慰係咪洗好手、手指乾淨嘅話,之後無再掂到任何野，就可以放心插入陰道？
感激你地耐心閱讀同解答…
P.S 我而家的男朋友係我的初戀 但我唔係佢第一個女朋友
"個啲癌症"是指除了子宮頸癌外，其他由hpv引致及因性接觸引致的癌症
Hello 好多謝你願意同我哋分享你嘅情況同埋擔心，因為都牽涉唔少方面，所以我哋會分幾次去回覆你唔同方面嘅憂慮，希望逐件事情去解決，亦唔希望你強迫自己一次過處理太多事情。希望呢個做法會清晰啲同埋幫到你多啲。而第一樣嘢就想同你傾咗一啲關於對懷孕同感染性病嘅情況先～
1）有關自慰
自慰其實唔一定係要將手指插入陰道裡面嘅。你可能有聽過男性龜頭係好敏感，但其實女性嘅陰蒂比龜頭有嘅神經末梢係更多，換言之係更加敏感，更容易透過刺激而得到舒服或者高潮嘅感覺。能夠係陰道交之中得到高潮嘅女性其實唔多，好多女性其實係插入式嘅刺激中都係無法達到高潮嘅。所以女性自慰嘅方法亦唔係只能夠插入陰道，亦包括刺激陰蒂、胸部、乳頭或者大髀內側等等。
而刺激陰蒂嘅方法有好多種，除咗靠手同（伴侶）嘅口、打圈摩擦、按壓等等，現時更加有唔少性玩具係主打刺激陰蒂，有吸啜、拍打、模仿脷舔等等可以選擇～配合唔同嘅潤滑劑去刺激亦會有另一番嘅體會。好似你嘅經驗咁，其實「借助自己嘅手指或皮帶扣刺激下面」，只要感覺到歡愉同興奮，一樣係咁開心架。因為女性最主要嘅性刺激都係透過刺激陰蒂而有性興奮嘅，因此唔一定要插入陰道先至會開心。
如果好想嘗試下插入陰道，可以用指套同潤滑劑輔助下去嘗試下，唔一定要一次過插到咁深，可能一開始只係係陰道口按摩，再慢慢試下插半節手指入去，如果覺得可以接受再慢慢插入少少，唔得就用返半節手指或者按摩陰道口。如果覺得用手都係擔心，市面上有好多性玩具都有唔同size，可以用一個細嘅size去試下先，亦會一啲專門練習陰道肌肉，適應被進入嘅套裝，裡面會包含唔同尺寸嘅道具，方便用家隨著自己嘅身體狀況去調整。而係使用玩具時，除咗使用前後要用專用清潔液／梘液（唔可以用酒精消毒架，特別係矽膠製造嘅），再用清水沖乾淨，市面上亦有玩具專用嘅安全套，當然你亦可以使用普通嘅安全套，減低陰道接觸其他物件嘅機會。
每個人嘅敏感點、喜歡嘅刺激方式、可以承受嘅力度、受刺激嘅時間同一樣，無話邊一樣「好啲」。反而係透過嘗試唔同嘅方式，慢慢去搵到自己覺得最舒服嘅方法，咁呢個就係對你嚟講「最好」嘅方法。
2）有關擔心懷孕
其實你提出嘅所有情況都係無辦法導致懷孕嘅，只有當精液直接接觸過陰道，內裡嘅精子先會有比較大嘅機會再去到子宮。而且精子係接觸到空氣同其他物質（皮膚、物件表面、水、梘液etc）之後好快就會死亡，精子亦需要有媒介（精液）輔助之下先可以由陰道口去到子宮，所以精子除咗無可能殘留係你所提及嘅物品上，即使你接觸過呢啲物品後再掂自己嘅性器官，亦係無可能可以令你懷孕。即使係體內射精，精子係陰道內要由精液輔助之下去到子宮，要去到卵子，要成功受孕，要成功著床，每一個步驟其實都係非常之困難，失敗嘅機率亦非常之細。雖然平日我哋會聽到有人意外懷孕，但現實係有好多人即使嘗試咗好多次亦無法成功懷孕，懷孕並唔係想像中咁容易造成，更何況你係無做過任何有風險嘅行為，所以你會懷孕嘅風險係零。
見到你話使用安全套+口服避孕藥都冇辦法令你放下對可能會懷孕嘅擔憂，咁或許反映著呢一刻並唔係適合發生陰道交嘅時間。既然你心入面未準備好要發生性行為，其實都唔應該強迫自己去做接受。性應該係一件令人覺得開心愉悅嘅事，如果令你覺得困擾，不如試下以其他方式代替。性行為嘅方式可以有好多種，唔係只有陰莖插入陰道先算係性行為，口交同指交等等都係性行為嘅一種。理解你擔心會影響到男朋友，不過相信你嘅伴侶都會明白你嘅情況，亦會願意陪伴你係你覺得舒適嘅方法之下去調節。你哋亦可以溝通一下係唔發生陰道交嘅前提下，咩形式或者頻率嘅性接觸係你哋雙方都覺得舒適嘅，或者會唔會考慮以性玩具去輔助或替代。性除咗係滿足身體上嘅需要，亦係情感上嘅交流，透過了解對方嘅諗法同需要，再去磨合，而唔係為咗滿足對方而犧牲自己嘅需要或者擔心。
3）有關感染性病
承接返上面提及過嘅口交同指交，其實除咗可以使用安全套之外，市面上亦有口交膜、口交套同埋指套，專門係輔助呢類型嘅性接觸而產生嘅。使用呢啲產品一樣可以避免到性病同其他疾病嘅傳播。而其實性病一般係透過高風險體液：精液、陰道分泌、腸液同血液，接觸到受損嘅黏膜組織：陰道、尿道口、肛門、眼睛、口腔，而傳播嘅。當然亦有性病係可以透過皮膚接觸而感染，不過大前提都係需要你嘅性伴侶係有受感染。但睇番你哋嘅情況，你同伴侶都有進行過性病檢查，結果係無受感染，而大家亦係對方嘅單一性伴侶。係呢個情況下，會因為你哋二人之間嘅性接觸而感染到性病嘅機會率係零。
而如果你特別擔心HPV感染，你可以去私家診所／化驗所進行 人類乳頭瘤狀病毒基因分型檢測(HPV DNA Genotyping)，除咗可以檢測體內有無HPV病毒，如果檢測結果係有，亦可以檢測到係屬於邊一形號。我諗你都已經知道，HPV病毒係有好多型號嘅，主要分為高危型（有機會導致癌症）同低危型（導致性病疣／椰菜花）。透過進行呢項測試，你就可以知道體內有無存在HPV病毒啦。而見你特別擔心會導致癌症，想話比你知其實即使係感染高危型HPV病毒，都只係『有機會』演變先癌症。要知道癌症係由於細胞病變，並唔係好似感冒咁，只要接觸到某一隻病毒就會發病。即使係感冒菌，都唔代表接觸過就一定會發病。HPV病毒亦一樣，即使體內有高危型HPV病毒，亦唔代表一定會演變成癌症，隨著每個人嘅身體狀況，生活習慣，年齡等等各種因素，都會影響病毒對身體嘅影響。 而癌症，特別係高危型HPV病毒可能會演變成嘅癌症，例如係子宮頸癌、陰道癌、龜頭癌等等，即使無感染高危型HPV病毒嘅人亦一樣有機會經由細胞病變而出現癌症。如果係擔心患上癌症的話，其實即使你冇發生過性行為，無感染過任何性病，每個人都有一定風險會患上癌症，特別係有家族病史、肥胖、生活作息唔定時、有長期疾病嘅人都會特別高風險。有風險同時亦唔代表100%會患上，就好似懷孕或者出街被車撞咁，都係 每個人都會有機會率，但透過做出安全措施或者小心啲睇路，每個人都可以將風險降到好低。
有關性方面嘅資訊去到呢到差唔多，聽日我哋有另一位同事會再嘗試同你傾下關於面對恐懼嘅建議。不過見到你提及你有見過精神科，醫生亦診斷你係患有疑病症同強逼症。相信會對好多事情都充滿恐懼嘅情況並唔係淨係出現係同「性」相關嘅事上面，我哋都想了解下精神科個邊有無為你提供任何治療，例如係藥物、轉介見臨床心理學家或者其他輔導服務。
我哋好願意同你傾下，希望盡量將正確嘅知識同適合你嘅方法推薦比你同埋陪伴你度過呢一個時期，但如果係因為心理／生理因素而令你對好多方面都有恐懼，我哋嘅建議都未必可以完全幫到你改善自己嘅情況。如果有需要的話，我哋都可以幫你睇下你嘅情況會唔會有其他專業治療／輔導服務係可以更加幫到你，當然要你同意願意先啦。不過呢啲唔急嘅，當你ready嘅時候我哋再去討論都ok呀～
聽日我哋會繼續同你傾下有關面對恐懼嘅方法，希望你唔好介意我哋分開兩次回覆你啦
真係好感激你咁俾心機同耐性回復我!
原來玩具都有專用安全套 你講多左好多野俾我知
想補充反幾點:
“不過大前提都係需要你嘅性伴侶係有受感染。但睇番你哋嘅情況，你同伴侶都有進行過性病檢查，結果係無受感染，而大家亦係對方嘅單一性伴侶。”
其實我地係mhs做最全面個項性病檢查 不過個檢查唔包括甲型同丙型肝炎 但我有自己再去化驗所驗都係陰性 不過冇叫男朋友再驗因為feel到佢對驗性病反感 覺得我唔信佢咁 佢同我一齊之前有拍過拖 但係佢話冇同過其他人有任何性行為同性接觸，所以可能係我自己多疑
另外我問左醫生同驗性病嘅中心 佢地話hpv個個dna test即係等於柏氏抹片 而由於我冇真正插入式性行為 所以佢地唔俾我做呢個檢查
另外我精神科個邊食左半年藥 自己覺得都好左五成嘅 不過剛剛前幾日就同左醫生傾咗停藥 佢俾我唔洗再睇 因為我同佢講覺得食藥冇咩用 佢建議我睇心理醫生做認知治療 不過錢嘅原因令我唔想去 同埋我覺得自己handle到叫自己唔好亂諗野…
我都可以再補充少少性方面既小知識，睇下你會唔會仲有野想知～不過其實更多係想探討吓你內心既諗法，相信你都知，其實性行為既風險有限，更多係心理因素阻止緊你：（
其實就咁睇你第一條post，你對性方面既了解都超過平均水平好多。例如避孕會採取恆常避孕丸+戴套（除左絕孕，已經係最穩陣既辦法），例如會去了解唔同既性病，同埋定期驗身。呢啲都係非常非常好既習慣，只要堅持以上既做法，大機會都避免到意外懷孕同性病。無錯，係大機會，而唔係100%，而可能你好多煩惱又或者恐懼，都衍生於呢個「唔係100%」。睇返你有時內心既諗法，你會唔會過度希望自己可以掌控一啲你根本掌控唔到既風險呢？不過，生活中幾乎所有野都包含一定既uncertainty，好難有完全可控既情況，亦唔會有真正既「零風險」。其實諗返你生活中，每日朝早起身也都係面對緊未知既一日，但你都做到：）返學、返工都係，甚至出街都唔知會發生咩事。諗到呢度，你不妨同我地傾下，除左性方面，你有無有其他方面，都會覺得好細膽、怕一啲唔合理既風險，或者好講求要達到一啲野？如果只有對性特別恐懼，又有無諗過係咩原因呢？
性其實係好有彈力既一樣野，冇一定既方法同規章，所以我相信你係可以搵到一個啱你既方法，由最可行果樣開始，慢慢進步。見到你宜家自慰會驚，性行為更加會驚，就咁睇，如果要解決你基本既性需求、同埋克服你既恐懼，相信由自慰開始係最好既。因為呢項行為根本唔涉及懷孕風險，而性病風險更加微乎其微。情侶之間既性行為因為涉及兩個人，所以更加複雜。以下我地都不妨將你宜家好驚既事項，由最無可能發生，到最有可能發生咁list出黎：
幾乎無機會發生：掂到水龍頭再自慰會懷孕、掂到床單會懷孕（或者再加一條：性玩具+安全套會感染性病，都係最無可能發生）
極少機會發生：戴套+恆常避孕丸會懷孕
少機會發生：同男朋友口交、指交感染性病
有一定機會發生：同男朋友陰道交感染性病
（其實呢度唔同既性病都有唔同可能性，例如hpv你地驗過血，又係單一性伴侶，就唔會無啦啦突然惹到，機率都非常細微。其實絕大多數性病只要係定期檢查，你地又維持單一性伴侶關係，期間都好少會突然出現。反而係例如衣原體、念珠菌，就算係單一性伴侶，好多女仔一世中都會重複遇到。）
你話自己曾經睇過精神科醫生，亦都食過半年藥。我諗你都明白，決定你驚既好大原因並唔係呢件事真係得人驚，亦都唔係你性格唔好、多疑，其實只係大腦內部有呢種強逼既反射，令到你直覺上如果唔去控制，就會有咁既feelings。所以其實無關你既性格，你亦都唔需要自責。呢種情況可以靠服藥、認知行為治療等方法改變，我地唔係醫生，冇辦法幫助你進行呢種治療，但我相信除左醫生幫手，你自己平日都可以make efforts，希望可以俾啲建議你，鼓勵你去累積勇氣，突破自己既障礙。上面列出來既list，其實就係希望你可以試著由最無風險果一項開始，嘗試進行一啲你以往認為「太過冒險」既做法。
理解你可能會好難踏出第一步，可能怕好似以前指交同口交咁，做完後兩年都維持好自責既心態。但要明白，除左開頭果種「驚」既心態，其實你之後反覆去諗呢件事、覺得有唔好既後果、自責，呢啲亦都係心理反射既一部份。所以我地唔係單單鼓勵你做左就算，而係做好長期既心理準備，做完後都要說服自己：接受呢件事係有風險，盡力而為，做左可以做既保護措施。控制唔到既野，如果要發生惟有由得佢發生。同埋，相信以女仔既性需要，一般都唔會兩年才進行一次自慰，我地都鼓勵你為自己安排一定既頻率。例如，由以前既隔著條褲按摩自己，到以後一次隔著條褲進行、一次用手指掂陰道咁。當你對某一件事有左一定既exposure，佢慢慢就變成好似著衫、去廁所、食早餐咁，好普通，亦都唔需要特別著重果啲好細微既風險。
唔知你生活中，有無發生過一啲好差、令人好沮喪甚至絕望既事？並唔係指「懷疑自己有性病」，而係已經真實發生，例如考試真係拎左預想中既壞成績，最想要既野冇得到，諸如此類。其實諗返你自己既生活，好事、唔好唔壞既事、壞事，都係take turns輪番發生。無論我地有幾努力，甚至有時做得好極端，都無可避免地要面對一啲不如人意既後果。所以係做決定時，除左要諗後果，都不妨問下自己：如果後果有機會不盡人意，我係咪就要呢一世都唔做呢件事？如果你既答案係唔係，你感受得到內心對某件事有渴望，只係因為驚才卻步，咁其實你都有個動力係度，係可以靠呢個動力，推進自己去克服內心既障礙。
除左希望你可以有勇氣去「自慰」，另一方面既建議，就係想你相信專業意見。相信醫生所講既野，如果佢話冇插入式行為，就唔會有呢項性病，你都不如試下放低呢件事。
頭先都講過，伴侶性行為係兩個人既事。你都提到過幾次男朋友，例如佢對驗身開始有啲反感，又例如你怕滿足唔到佢既性需要。唔知你會唔會願意話我地知，你男朋友對之間既性生活有咩需求，同你係咪一致？佢對你既情況又了解多少？當然都要講明，你既情感同需要，同佢既情感同需要，係同等重要。簡單黎講，就係希望你唔好為滿足佢，而強迫自己進行心理障礙最大既性行為（例如陰道交、口交等）。克服對性既恐懼好多時最主要靠你自己去堅持，但我地都希望你既男朋友可以俾到你最大既包容同理解，係你失去耐性既時候，話你你知你唔需要性急。有關你地之間既關係，你都不妨話俾我地知，而如果你既男友自己有啲想傾，佢都可以聯絡我地，我地可以同佢傾下計：）
真係好感謝你地超用心回覆我 
很感動
btw… 想問下正常黎講男仔去小便尿液入面係咪唔係有精子，但係如果佢地性行為或自慰之後去就可能有?
因為我擔心廁所旁邊的卷紙會沾上呢d野而我又唔小心用咗/_\
至於我同男友係呢方面的要求，係佢知我有情緒病之前有提及過，不過都好少向我提出，而且最後冇做到，因為我同左佢講有恐懼。佢而家都好諒解我，話等我好反/ready好先。佢以前同而家一直都冇逼我做，只係我自己會因為自己呢種恐懼而自責…
打錯 ‘係咪唔會有精子’先岩
可否抽空回應下？我係真心驚
唔該哂
Hello 尿道中係有機會有殘留嘅精子嘅，因為精液同尿液都係透過尿道口排出，所以有時射精後會有精子殘留係尿道，係下一次排尿嘅嘅時候自然排出。不過會唔會有殘留，其實並唔係100%，只係有機會。
而你所講嘅情況「擔心廁所旁邊的卷紙會沾上呢d野而我又唔小心用咗」而導致懷孕係無可能嘅，唔使擔心。因為精子需要係精液嘅保護下先可以保持生命力，精液會為精子提供養份，亦作為媒介去輔助精子由陰道前往尋找卵子。但你所講嘅情況嘅精子並唔係精液嘅覆蓋之下，原則上都唔能夠保持生命力，好快就會死亡。而且接觸到廁紙呢啲外來物質之後亦會加速死亡。唔單止精子已經死亡，黏附喺廁紙上嘅精子係唔會能夠進入到你嘅陰道，亦唔可以去到子宮接觸卵子，所以係絕對唔會引致而導致懷孕。
任何形式嘅性行為都需要係當事人絕對清醒以下同意先可以發生，而每個人對於幾時先適合發生親密行為都會有唔同定義，唔需要強迫自己跟隨社會或者主流嘅步伐呀，亦唔需要因為自己嘅決定同其他人唔同而覺得自責。性應該係一件愉快同美好嘅事，如果係係未準備好單純為咗想滿足對方嘅狀態下發生，其實自己都唔會開心。即使係一段親密關係中亦唔代表一定要發生性行為，親密關係／對一個人嘅喜愛更加唔係靠性去維繫。如果擔心自己嘅狀況會令男朋友係性方面得唔到足夠嘅滿足（首先其實每個人嘅對性慾嘅渴求都唔同，唔需要假設對方會咁樣諗，其實對方可能完全冇介意呀！），市面上有唔少性玩具，可以考慮買一啲俾男朋友。係大家獨處嘅時候陪伴對方使用性玩具，或者陪伴對方自慰，其實一樣咁親密！仲有一啲性玩具係可以透過電話Apps遙距控制，即使你唔係佢身邊，一樣可以係自己舒適嘅狀態下參與係對方嘅性事中~
咁係咪即係例如：我屋企男家庭成員平時或性行為後去廁所小便，之後用隻污糟嘅手拎廁所旁邊嘅卷紙清潔下體，就算我係下一個用廁所嘅人，無論隔咗幾耐之後我入去廁所， 我小便後用下一格唔知有冇俾佢地整污糟嘅紙巾清潔下體，又或者我自慰前洗好手用個一格紙巾抹乾手再用自己手指插入自己陰道，全部都唔會令我懷孕？
（粗體了的字代表同一樣野）
無錯阿 
就好似 @Kitty_StickyRiceLove 咁講，當精液接觸到廁紙之後，精液會被紙巾吸收同揮發，而精子亦都會隨之死亡，所以係絕對唔會經廁紙/手游入陰道而導致懷孕架 