對住另一半覺得好自卑

我男朋友讀書好叻 就算唔洗點溫書都可以有好好成績 但我只係成績普普通通 好大壓力 老師知道我地一齊左好似好唔中意我咁 覺得我會拖低男朋友成績 我次次諗起黎樣野我都好唔開心 好自卑 有時會因為咁覺得自己係佢嘅負累 會自己一個靜靜地喊 我唔想比男朋友知 我怕佢會唔開心 有咩方法可以令我無咁大壓力:sob:

好多謝你同我地分享你嘅諗法阿:blush: 睇得出你好重視你男朋友,所以先會驚自己成為左佢嘅負累,亦都感覺你喺依段關係上唔夠安全感,所以會因為怕俾佢知道你嘅諗法而自己靜靜地喊,依種感覺的確唔好受:pleading_face: 不過拍拖係兩個人嘅事,為對方分憂亦都係兩個人都需要擔當嘅角色,所以不妨同你男朋友傾下你依個憂慮,睇下佢有咩諗法,我明白岩岩開始嘅時候會覺得好難講出口,但當你鼓起勇氣同對方傾嘅時候,好多時情況往往都無你想象中咁差架:relaxed: 溝通係維繫一段關係嘅重要原素,好多時大家將個問題搬出黎傾之後,就會發現原來有好多解決方法,亦都可以藉此加深對對方嘅了解,所以如果你好重視同男朋友嘅關係嘅話,不妨嘗試坦誠地同佢傾下先:blush:

知道你因為成績唔好覺得好自卑,好欣賞你係一個對自己有要求嘅人,不過都想你知道即使成績唔係最優秀都唔等於你係一無是處架,你可以發掘多啲自己嘅興趣同專長,同時都可以係過程中發現多啲自己嘅優點,慢慢就可以build up多啲自信心,而當自信心有所提升嘅時候,喺戀愛關係上嘅安全感都會增加架:smiling_face_with_three_hearts: