我上個月16-22號來月經，在月經後和男友有兩次性行為，沒有帶套但外射。而我本應今個月15嘅開始來月經，不過本身經期都不穩定，今次已遲了兩星期都還未來，但身體有點不同，沒有胸脹痛，有爆暗瘡，這幾天腹部和胃部很脹，有時會有點痛，分泌物前幾天有點粉紅色，之後變成深黃色，這情況符合懷孕初期症狀嗎？還是荷爾蒙失調？
單睇你所講嘅症狀唔一定係懷孕，而月經遲黎都受好多唔同嘅因素影響嘅，例如飲食習慣改變、壓力大、服食過藥物、長期處於擔心嘅狀態等等。不過如果想確認一下有無懷孕嘅話建議你去買驗孕棒check下，驗孕棒喺性行為後嘅11日或以上驗出黎嘅結果係好準確嘅，你可以買兩個牌子嘅驗孕棒黎驗，如果兩個嘅結果都係陰性嘅話就應該係無懷孕啦~
但應該是用最後一次性行為去計算11日後驗孕，還是怎樣計算？
我今天早上驗了一次，結果是一條線，但我在7號、14號和21號都有發生過性行為，如果根據最後一次性行為後11天驗，那麼我今次驗便不太準確。。？
首先想釐清番，你之前講嘅「在月經後和男友有兩次性行為，沒有帶套但外射」係邊兩次嘅性行為？
係咪指7/3、14/3、21/3，3日中嘅其中兩次？而其中一次係有使用到安全套？還是三次都係無套外射？定係你所指嘅月經後兩次性行為喺其他日子發生？
因為都會影響係咪有需要再進行多次驗孕
如果係有戴到安全套的話，咁果次嘅性行為導致懷孕嘅風險就會好低啊。
性行為導致懷孕的話，受精卵需要11日著床，並分泌出大量孕激素（hCG）。驗孕棒嘅原理就係透過試紙檢測到hCG值，顯示懷孕結果。
因此，「性行為後11日後驗孕」就係指每次性行為去計算。
29/3早上驗孕的話，已經係能夠準確咁測試到7/3及14/3兩次性行為，係無導致懷孕
而21/3嘅性行為，性行為7日後只能驗出一個初步嘅結果，所以29/3嘅驗孕棒都只能顯示初步嘅結果。如果你想得出一個較準確嘅結果，就需要等夠11日（即1/4）再去驗孕啦。相信到時嘅結果都係陰性的話，就可以完全放心啦
最後提醒番，如果唔想下次都好似今次咁擔心，無論係月經前月經後，只要性器官或者體液係有直接接觸，都要記得戴番安全套啊
一方面可以避免懷孕風險，另一方面仲可以降低性病傳播風險架～
多謝你詳細嘅回覆！只是感覺自己身體不太舒服，胃和下腹很脹，分泌物淡黃色，又沒有胸脹痛的感覺，不知道是自己壓力大月經失調，還是真的中了。。我會等多兩個星期再驗一次
胃和下腹會覺得脹痛，加上分泌物有試過變粉紅同黃色，其實都建議你去睇一睇醫生。因為其實都有機會係身體發炎嘅徵狀，而呢啲症狀一般都唔會係因為懷孕而造成嘅，有機會係腸胃炎，亦有機會係陰道炎。所以除咗等多兩個星期再驗孕，呢幾日都要盡快抽時間去睇一睇醫生，做個檢查會安心啲呀！
我到今天還未黎月經，又沒有胸脹痛，分泌物很少，但體温好像高了一點，腰有時會酸痛，應該不會是懷孕吧。。？因為每天仍在擔心月經幾時來。。不過想問下如果真的中了，什麼時候會開始出現懷孕症狀？同埋懷孕會有什麼症狀？
無論係常見嘅月經前定係懷孕症狀都可以被好多其他身體狀況而導致出現或者唔出現嘅，而且呢啲症狀都唔係每個女性每個月／每次懷孕都會出現，所以都唔可以單憑呢啲症狀去判斷係咪要嚟m或者係咪懷孕。至於懷孕後幾時會出現「懷孕症狀」，呢樣都係好睇個人體質，有啲孕婦懷孕無耐就會出現症狀，亦有一啲係直至到分娩都無出現過作嘔或者胸痛呢啲常見嘅「懷孕症狀」。
明白因為未嚟m所以會好擔心，係呢段時期個人都會變得好敏感，好容易更加留意或者放大一啲身體狀況，甚至係一啲一向身體都有只係以前冇特別留意嘅都會特別變得好明顯，會將所有情況都聯想到係懷孕嘅徵狀，呢啲擔憂其實都好影響身體同埋情緒，亦會令到體內嘅荷爾蒙水平有更大嘅波動，變相亦會影響月經嘅情況。其實你之前驗孕嘅結果都暫時係表示你係無懷孕嘅，雖然仲需要等多幾日先可以再確定後期嘅性行為會唔會造成懷孕，現在呢一刻都希望你可以嘗試放鬆一啲，將自己嘅注意力轉移去其他事情上。你越擔心其實都會越影響月經架～
亦希望你會趁著今次機會同伴侶好好討論一下以後對於安全性行為嘅安排，先可以避免到類似嘅情況係日後再次發生呀，體外射精絕對唔係一個可靠嘅避孕同預防性病措施嚟架！