其中一次性愛頭幾下抽插冇戴套 之後全程戴套至射
想知如果該次性愛後過左最少兩至三個星期驗孕先知中左，可以點做？ 要去家計會做終止懷孕手術？ 佢地會唔會一定要求通知家人但女方家人對呢方面極度敏感！ 利申成年，25內
想知大概詳情 計劃建議及其中收費價錢？
麻煩你 
♂
陰莖性興奮嘅時候，其實已經會分泌出一種透明液體，為尿道球腺液（俗稱pre-cum）。尿道球腺液內係含有少量精子，係有機會導致懷孕。
好擔心會導致懷孕的話，都建議儘快去驗孕。一般性行為7日後，可以得到一個初步嘅驗孕結果。而性行為11日後驗孕嘅結果就會較準確，因為一般受精卵需要11日時間著床，著床後就會分泌出大量孕激素（hCG），令試紙可以檢測到hCG值，並顯示懷孕結果。
如果驗孕結果顯示係懷孕的話，就可以去家計會，由家計會護士進行首次接見。護士會先詢問女方嘅 個人病歷、進行尿液驗孕 ，同埋向女方（或雙方） 提供有關終止懷孕的基本資料及輔導 。由於家計會認為終止懷孕係一個重要嘅決定，所以會建議就診者於初診後重新慎重考慮係咪要進行終止懷孕
假設最後真係決定進行終止懷孕手術的話，因為女方已經夠18歲的話，過程中係唔一定需要通知家人嘅。不過，因為終止懷孕其實都有一定嘅手術風險，相信醫生護士亦會建議女方先通知家人，萬一手術發生咩緊急情況，都可以有人為女方作出緊急嘅手術決定
而價錢方面，喺家計會進行藥物終止早期懷孕／終止早期懷孕手術就大約HKD 4400-6100（家計會只為懷孕期十星期內嘅就診者提供終止懷孕服務）。公立醫院收費約HKD 1000內，而私家醫院就約 HKD 23000-35000左右（參考青躍 Teen’s Key嘅數據）。不過記得手術排期需時，必須留意各機構嘅排期時間。
有關終止懷孕手術，可以再參閱家計會嘅網站：
如果想再知道多D，都可以參閱埋我地糖不甩 及 青躍有關終止懷孕嘅文章
：
糖不甩《我懷孕了嗎》：https://www.instagram.com/p/B4ry2aeFp25/
青躍《甚麼是終止懷孕？》：https://www.instagram.com/p/B8B2M5cn1YW/