預計排卵期後白帶多

我係10號到15嚟m,18號曾經有過非插入式性行為。期間男友喺自慰後抹過手,半個鐘用手指只接觸過陰核位置,下體完全冇接觸而且冇口交之類。本身app計的話應該前日會排卵,但係透明白帶已經持續咗兩個禮拜多,而且持續下腹有少少痛,上星期陰部內偶爾有少少痕。呢個禮拜感覺特別熱同眼瞓,琴晚四肢突然無力同下背痠痛但幾個鐘後又冇事。而今日胸部少少脹痛想問呢種情況係排卵推遲,陰道發炎,定係有其他狀況呢(eg懷孕或其他病)?

有時嚟m會隔1-2個月唔定,一向白帶都比較多,唔清楚會唔會有機會計算錯其實未排卵?

首先講番18號嘅非插入式性行為,因為精子暴露喺空氣中,幾分鐘內就會死亡,所以即使你男朋友自慰後抹手後,可能依然殘留少量精液,喺接觸你嘅陰核時精子都應該已經死左,唔需要擔心會有懷孕嘅風險啊:blush: 可以排除呢個可能性先~

有關白帶嘅情況,想了解下陰部痕癢嘅情況持續左幾耐?依家仲有無持續?痕癢嘅程度係點?而透明白帶嘅質感係點嘅(例如係黏稠/稀)?顏色上有無其他嘅異常(例如偏黃/偏綠)?

如果顏色上無異常,之前亦無發生過插入式性行為的話,咁陰道發炎嘅機會就比較低。

不過如果下腹持續感到疼痛,陰部嘅痕癢亦持續左一段時間,甚至惡化的話,都建議儘快去家計會睇醫生,或者去睇其他婦科醫生或者其他普通科門診,做個檢查,睇下除左陰道之外,會唔會係子宮有發炎嘅跡象,或者其他部位出現左問題,咁就可以及早治療:woman_health_worker:t2::man_health_worker:t2:

不過可以放心嘅係,暫時睇情況,子宮發炎嘅機會都比較低,反而你提及到會感到四肢乏力、下背痠痛等徵兆,並持續左一段時間同埋令你困擾,可能有機會係其他身體嘅部分出現問題。最近身體仲有無出現其他情況?例如有感冒嘅感覺?因為最近天氣好多時中午就熱,晚上就偏凍,呢D氣溫變化亦都有機會令人覺得唔舒服,容易病啊:cry: 建議都可以儘快睇睇家庭醫生或者其他普通科門診,了解情況啊:blush:

多謝你答覆呀。

而家陰部痕癢雖然停止咗,但當時感覺好似皮膚痕癢少少熱咁樣。至於白帶係透明,但好似水咁稀,而且下腹中間位置好似嚟經前咁繼續陰陰地痛。

如果白帶係透明同偏水狀的話其實都唔需要太擔心嘅,女性日常都會有白帶分泌,係正常嘅,如果白帶量比起平常多,咁亦有機會係因為排卵。但如果呢個量多,係以去到會將內褲浸濕一片嘅程度持續,都可以去睇醫生檢查會唔會係慢性嘅陰道炎。不過,因為通常發炎的話白帶都會變得比較杰同埋黃黃綠綠/其他深色,加上陰部痕癢已經停止咗,所以係發炎嘅可能性唔高。

反而你持續地覺得下腹疼痛呢一點係比較另一擔心嘅,因為聽你講都持續咗一段時間(兩個星期以上),而且令你覺得困擾。加上又有「四肢突然無力同下背痠痛」呢啲症狀,都好值得去睇睇醫生檢查一下啊!雖然有好多原因可以導致呢啲症狀出現,例如最簡單嘅飲食同休息唔規律,身體抵抗力下降等等,不過與其估估下,直接去俾醫生檢查一下會安心啲嘅。