關於自慰的困擾

你好,我有一些關於性知識的疑惑想了解以下,請原諒我說話太長

本人剛從香港到外國進修,基於有基督信仰,平生而來從來沒有自慰的習慣,亦會盡量避免看A片(然而小時候有時都忍不住看,但沒有邊看邊自慰的習慣)。

但因近日的疫情的關係,大學都停課了,又獨自一人在家工作,在閒餘的時候,性慾就擋不住了,最終按耐不住有看A片了,但依然只是看,沒有邊看邊自慰。

同時,巧合地在youtube 看到跟性知識的影片,說適當不過度的自慰是有益身心的,反而長時間的禁慾,導致精液沒辦法排出,可能有機會會陽痿甚是不育,影響日後的性能力。

所以,在擔心健康及日後性能力的問題,決定在洗澡時嘗試自慰。 開頭時陰莖是有勃起,但腦中有出現A片的畫面的時候,不自覺的地想壓抑這些念頭,因為跟自己的信仰及道德觀有衝突(好像跟一個陌生的女生做愛,感覺很奇怪),而我也沒有交女朋友或任何暗戀對象,所以腦中在沒有對象的情況下,最後好快下體軟了起來,念頭沒有了,也沒有射精。 事後感覺有點憂慮及困擾,因為在網上看blog 好像自慰而沒有射反而更不健康。

在這情況下,我應否繼續嘗試自慰射精,還是其實不自慰不射精根本不會對健康構成影響? 如何檢查自己有沒有陽痿? 在信仰角度,我是應該禁慾的,但在健康角度,我是否應該有適當適量的自慰?那究竟我可以怎麼辦?就算要自慰,也沒有對像,也不想以這些不認識的女生做對象…

抱歉打了這麼長的文字!基於這些私人貼身的問題我不想跟任何人說(害羞),所以才想詢問一下你們專業的意見。萬分感激!

你好!多謝你願意同我哋分享你嘅問題,我會先撇除宗教嘅部份,同你傾下有關自慰嘅情況:人有性慾係好平常嘅事,自慰亦係一個好平常嘅行為,只要唔係去到無法自拔,影響日常生活(例如唔自慰就出唔到街返工返學嘅程度),係無問題嘅。

因為身體健康嘅男性嘅睾丸會持續製造精子,然後暫時儲存係附睾,等待射精時排出體外。如果長期無射精,當超出附睾可以承載嘅容量時,其實身體亦會以其他方式排出體外,例如係排尿時隨著尿液排出。而儲存係附睾嘅精子亦會隨著儲存嘅時間越長,而越容易受到外在同內在因素影響,例如係高溫、身體健康度、有無吸煙等等習慣而影響精子嘅活動力,亦有機會身體會隨著時間去調節製造精子嘅數量。有啲人會話當你長期唔射精會造成不育,其實主要係因為精子嘅活動力有改變,令精子即使進入陰道都會因為活動力低而無法去到子宮尋找卵子造成受精。不過如果本身比較少透過性刺激令陰莖內嘅海棉體充血勃起,海綿體長期無充血嘅習慣,當之後想嘗試令陰莖勃起,都可能會需要多啲時間/耐心先可以做到,但咁樣並唔等於陽痿或者有性功能障礙。同一時間,亦會有人係因為一直都無刺激陰莖嘅經驗,一旦去到刺激時會特別敏感,容易勃起。所以其實實際情況會係點,都好視乎你本身個人體質嘅。

此外,其實即使無自慰主動去造成射精,有好多男性都會有夢遺,即係係睡夢中有射精。係呢種情況係其實身體都有定期將精液排出體外,變相會令精子留係體內太耐嘅情況減少。如果你一向都會有夢遺的話,即使係因為宗教原因/其他個人因素而想選擇唔自慰,對身體會有嘅影響都唔大嘅。

至於嘗試自慰去到勃起後而無射精會唔會影響健康,其實如果只係一次半次係冇問題嘅。加上要睇下當時你係咪已經有足夠刺激,已經準備要高潮射精,因為呢個時候精子已經混合好前列腺液,變成精液,準備要經尿道口排出。如果係呢個狀態下逼使自己暫停,精液有機會滯留喺尿道入面,有機會造成前列腺發炎。不過睇番你嘅情況,其實你係未去到呢個狀態,而係開始刺激後因為心理因素而令性興奮嘅感覺慢慢消退,陰莖亦因而軟咗,咁樣嘅情況係無射精對身體係無太大影響嘅。

去到自慰嘅對象,其實唔係只有「女性胴體」先係唯一嘅性刺激來源。每個人都可以因應自己嘅情況去選擇自己喜歡嘅性刺激,有啲人係唔需要睇到性交影像都可以感到性刺激嘅。而自慰亦唔係只有係「解決性慾」嘅時候先可以做,之前有研究調查過其實好多人係為咗放鬆同埋令自己好訓啲而自慰嘅 (有興趣可以睇下: http://www.feelmore.global/ )。如果你覺得見到陌生女性嘅形象唔會令你覺得有性興奮,可以發掘下其他素材或者形式,例如係文字版或者只有聲音嘅,可能你會覺得接受度高一啲。

適量嘅自慰對身體唔會有害,而唔自慰對身體亦唔代表對身體係壞事。如果自慰會令你覺得困擾,無論係因為宗教原因定係因為性刺激唔適合,其實都係唔需要強逼自己繼續嘅,呢個絕對係你嘅個人選擇,唔需要因為其他人都做而做。

至於宗教嘅部份,因為我自己無宗教信仰,所以都未能分享自己嘅睇法。稍後我哋另一位同事Kaleo會同你分享下佢嘅睇法,希望會俾到多啲意見你。請你耐心等候~:smiling_face_with_three_hearts:

十分感激kitty你既詳細而且貼心既回覆 :slight_smile: :,期待你另一位同事的回覆

你好呀 @arron :wave:t2:。見到你提及「基於有基督信仰,平生而來從來沒有自慰的習慣」,但係聖經對於「可唔可以手淫」其實都無明文規定過,都想了解一下呢個睇法你係由邊度得返黎嘅?係基於某一段經文,抑或係你所屬教會嘅牧養?:thinking:

大部分嘅教會行嘅都係禁慾式嘅性教育,姐係話俾你聽,唔應該有性行為,因為會有性病,會未婚懷孕,會遺憾終身。有教會禁止自慰嘅原因係十誡裡面有「不可姦淫」,但係其實聖經裡面嘅「不可姦淫」,只係解釋唔可以通姦。咁自慰呢?視乎聖經都無講。:question:

可能你會睇到馬太福音5章28節裡面講:「凡看見婦女就動淫念的,這人心裡已經與她犯姦淫了。」所以覺得自慰係有罪,所以唔去自慰。:x:

我相信,聖經係你心目中都有一定嘅份量,因此你非常重視聖經裡面嘅教誨。我都相信,你對聖經有自己一套理解。無意侵犯你嘅信仰,我係呢度都想講下我嘅觀點同角度。:mag:

只要見到女人,你有一絲對於佢嘅幻想,你就已經犯咗姦淫。再收緊啲,當你唔能夠控制嘅時候,例如發夢夢見女人,同佢有親吻,甚或乎不受控地夢遺,係聖經嘅定義下,係咪都視之為姦淫呢?

我想講個故事俾你聽。從前有一個人,叫小明,佢娶咗自己同父異母嘅阿妹做老婆,叫小美,但係佢同小美講,係出面唔可以叫我做老公,只可以叫我哥哥,咁樣我先可以生存到。小美身邊有個家傭,因為自己生唔到BB,所以小美叫小明同個家傭同房,而個家傭有咗BB。家傭為小明生咗BB,所以佢睇唔起小美。後嚟小美死咗之後,小明仲娶咗第二個老婆,仲生咗6個仔女。

可能你會覺得小明係渣男,係依家呢個世代嚟講根本就係一個罪人。但係其實呢個係一個聖經故事,小明就係阿伯拉罕,小美就係撒拉,家傭就係夏甲,佢第二個老婆就係基土拉。

係舊約聖經時代,男人有多個老婆係好平常好平常嘅事,除咗阿伯拉罕,雅各、大衛、所羅門都有好多妻子,撒母耳記下12章8節,神藉著先知嘅口同大衛講:「把你主人的家賜給你,把你主人的妻妾交在你懷裡,又把以色列和猶大家賜給你。你若是還以為太少,我還可以多多加給你。」神不單只將其他人嘅妻妾交係大衛嘅手中,如果大衛嫌少,仲可以多多加給佢。列王記上11章3節:「所羅門有妃七百,都是公主;還有嬪三百。這些妃嬪誘惑他的心。」單單係所羅門,就已經有總共1000個妻妾。

但係我哋睇返聖經係幾時講一夫一妻,並唔接受他人嘅介入嘅?係創世紀2章24節:「因此,人要離開父母與妻子連合,二人成為一體。」但係有乜原因舊約聖經裡面嘅人物依然都會一夫多妻呢?而神又無因為咁樣而懲罰佢地,反而允許佢地咁樣做,咁樣嘅話究竟點樣先係一個標準呢?我係呢度留白,等你填上你嘅答案。:clipboard:

聖經源遠流長,時代點變都好,聖經都視乎屹立不倒,一字一句,除咗唔同版本嘅修訂,傳達緊嘅都係同一個信仰、同一個教導。但係真係咁樣?以前嘅人未滿18歲就會生兒育女,而生兒育女又必定會有性行為呢個過程(暫且不計瑪利亞同撒拉等等神所賜予嘅懷孕),咁係咪舊時代嘅人就全部都係犯罪,包括聖人,因此要落地獄呢?

好多時候你會發現,唔同教會或者牧者對聖經嘅解釋會有唔同,同一句經文可能理解嘅方向都會有分岔,所以佢地分開咗唔同教派,有靈恩派、長老派、聖公派,咁多嘅派別對真理嘅重點都唔一樣,但係呢啲教派都係嘗試用唔同嘅角度去解釋聖經嘅道理,而教派由係由人去分別同建立,因此好多時候,聖經就會變咗由人去解釋。在所難免地,唔同人所理解嘅,可能都會同原本嘅聖經有少少出入。

唔單止聖經,係同一件事上面,社會唔同群體嘅睇法都有唔同,特別係一啲難以判別對錯嘅嘢,每個人都會有自己嘅睇法,而我地接受教育,唔係正正就係培養我地呢種獨立思考嘅思維模式咩?

人要跟住時代進步,我諗,聖經都係。

我所講嘅嘢無冒犯你嘅意思,我都曾經信過神,長達6年,所以我理解你非常倚重呢個信仰,但係我相信,除咗別人嘅解釋,我地對聖經都應該有一套自己嘅諗法同理解。

「係教會嘅牧養以外,同神建立關係呢樣嘢你需要自己去諗下點做,教會提供好多指導俾你,提供好多方法俾你,有好多對聖經唔同嘅解釋,你要去理解,同埋將佢化咗你自己認同嘅一套,你先會信得更堅定。」——來自某個以前教會嘅牧者。

「牧師講嘅嘢唔係就係真理咩?」我問。

「只有聖經先係真理,你要100%相信嘅係聖經,而唔係人所講嘅嘢。當你聽到任何人講嘅嘢,你要去諗下佢講得啱唔啱,有無符合聖經原本嘅意思,咁樣先唔會留地步俾魔鬼。因為人始終係人,只有神所講嘅先係真理。你依家要做嘅就係,返去嘗試理解牧者嘅說話,再睇一次經文,再自己重新解釋一次經文。」

以上嘅說話我受益良多,希望都可以係信仰上面令你有所啟發。:wink:

多謝你信任我地,希望我地少少嘅觀點可以幫到你啦。:slight_smile:

十分多謝Kaleo同 kitty 耐心同 詳細的答覆 :slight_smile: 無諗過你地會咁用心回覆,多謝你地!

其實如果你問我,我都係用翻馬太福音5:28 既經文,係思想上與陌生女子發生性行為都是動了淫念,所以都是不被神所接受的。

但係讀完你既回覆,明白性慾都係無可避免既,我會接受自己這方面既需要,不會過分怪責自己。

經過反思之後,我諗起之前老師引用既經文,哥前10:23 「凡事都可行,但不都有益處。」。其實諗落,其實生活上好多事情都犯左好多唔合乎聖經的罪其實可能自己都唔知,而自慰都只係其中一樣所自知既罪而已。而重點係自己要時刻反省自己,對每一件事情都不要過度沈迷,就算真系犯左罪,咪認罪咯。

我亦都係其他網站睇過基督信仰同性慾之間的文章,當中所建議既取態都幾好,有興趣的話你地都可看看:

最後再一次多謝你地既回覆,你地既工作好有意義,尤其好像我呢d對性有好多迷思既人,的確可以幫我地搞清楚相關既概念。現在我對於性或性相關的健康知識都多左(畢竟香港的性教育真係好不足。其實我仲有好多對性既錯誤概念或者好多相關的知識都唔知),多睇左唔同人既睇法,對性都不會過分保守,接納自己有呢方面既需要。

若果我再有疑惑,會再搵你地傾傾 :)

stay safe stay healthy, 工作順利
化名aaron

1個讚

好開心我哋嘅回覆有俾到多啲資訊同方向你呀!之後如果有咩問題都歡迎再搵我哋傾吓~大家都要stay safe stay healthy!!