會否懷孕...?

29/3 星期日我同男朋友發生左好親密既行為(唔肯定算唔算邊緣性行為),事後發現當時自己應該係排卵期。

我全程有穿內褲,對方沒有。我幫佢口交時,佢應該有分泌尿道球腺液(因為見到好似透明液體),左手 有摸到,然後抹返落對方上身同背脊。

之後,佢訓住咁壓落我,兩個人面對面。佢既陽具大概係我肚臍位,個刻因為我感覺佢既睪丸貼住我既私人部位,就用左隻 左手 貼住內褲面咁擋格住 (即係私人部位 > 内褲 > 左手> 對方睪丸) 。私人部位沒有互相磨擦。最後,對方向上移,射左落我頭髮度,我個時照係平躺緊 ; 然後,我就去左洗頭髮。

想問既係, 可唔可能因為隻 左手 掂過分泌液,再掂到内褲面,然後精子"游"到入去,而懷孕?

我真係非常擔心
第一次有咁親密既關係同行為
覺得自己冇好好保護自己 :disappointed:

謝謝你解答 :pray: :pray:

Hello 唔洗擔心呀,雖然你所講嘅尿道球腺分泌的確有機會有精子係入面,不過精子係接觸到空氣/其他物質(例如皮膚)之後好快就會死亡,所以係經過你所提及嘅所有行為之後,已經全部死晒,無法導致懷孕。其次,因為隔住內褲,所以即使接觸到尿道球腺分泌,佢都會被內褲吸收,而係吸收後係唔會再可以滲透出去,接觸到你嘅陰部嘅。即使接觸到陰部,精子係需要媒介(精液)輔助之下先 有機會 可以去到子宮,但你所講嘅情況,尿道球腺分泌已經被內褲吸收晒,所以精子亦無足夠媒介可以輔助去進入陰道。

所以總括黎講,你哋今次嘅性接觸係無懷孕風險嘅。

聽得出你好擔心會懷孕,不過要造成懷孕,最起碼性器官要有直接接觸過,然後分泌物(尿道球腺液/精液)有直接接觸到陰道,先至比較會有機會。因為即使有直接接觸到,精子要係陰道口,透過陰道去到子宮,再去到卵子(要咁啱你體內已經/將要排卵),受精,然後再去到子宮壁著床,其實係一條好長好長嘅路,亦唔係咁容易做得到嘅事。不過要避免一切風險,最直接嘅做法就係做足避孕措施,例如使用安全套。即使係非插入式,一樣都可以使用安全套去輔助同保護,或者選用口交套/口交膜/指套等等嘅工具,除咗可以避免分泌物接觸,亦可以減低性病/疾病嘅傳播~

1個讚

我明白啦,睇黎我有少少杞人憂天:see_no_evil:
好多謝你既詳細分析同建議呀 Kitty :pray:

1個讚

會覺得擔心都係好常見嘅,有幫到你就好啦~:gift_heart: 有咩問題都歡迎再搵我哋傾下呀!

1個讚

我3月14日到period , 3月29日有親密關係
計算返應該4月11日左右應該會到period
但我未有 (今日已經4月14日)
我係咪應該去驗孕? :cold_sweat:

你呢個推算月經嘅日子係咪參照過往嘅一向周期嘅日子去計算架?暫時同你預期嘅日子都唔係差距好多,其實唔駛太擔心,有好多因素可以導致月經日子有變化嘅,情緒、壓力、食過藥、生活習慣有改變等等都可以影響到。再加上你上一次嘅親密接觸係無懷孕風險,會因為懷孕而影響月經嘅可能性好低。如果你覺得驗孕可以令自己安心的話,當然可以去驗呀,不過睇番風險其實係無實際需要嘅~

1個讚

係呀 我平時都幾準, 差唔多28日就 period 到
我明白了 , 我再睇睇我身體情況
多謝你再次既回覆啊 :pray:

唔好意思,想問多問
Period 遲幾多尚算正常?
Thanks a lot :pray:

始終有太多可能性可以影響月經,每個月週期都完全一樣嘅女性亦好少,所以其實無話遲幾多係「正常」或者「唔正常」。一般如果排除咗懷孕可能性同其他婦科疾病或者荷爾蒙分泌失調嘅病症,即使遲咗都唔需要擔心。如果你一向月經都好穩定,無懷孕風險,過往一個月又無出現過任何前面所講可以影響月經嘅情況,遲咗1.5 - 2星期都未嚟的話可以去睇醫生檢查一下啊。

1個讚

我period 終於到了 :see_no_evil: :joy:
好多謝你既回覆
真係令我踏實好多