關於對懷孕的恐懼

是咁的,我女朋友有用app去跟蹤自己月經週期。個app有時都幾準,預計我女朋友既月經週期係32日,但上次就早左三日。我係佢經期後的兩天有插入式,無避孕措施的性行為,但整個過程大概只係維持左5分鐘,拒話太痛所以我地無繼續落去。

理論上,我同拒既性行為係安全期,而只有我既前列腺液可以令拒懷孕,中招既機會好低。但我依然好驚拒會中招,有時夜晚仲會訓唔著覺,想問有無人可以話俾我聽上述的懷孕機率有幾高?或者有咩建議可以幫下我?

Hello 你所提及嘅前列腺液係咪指性興奮時會有嘅透明分泌物呢?其實佢係叫「尿道球腺液」,當中都會含有精子,但數量比起精液少。而「前列腺液」係奶白色,屬於精液嘅一部分,佢哋兩者雖然都有機會含有精子,但係唔一樣嘅~不過其實計算安全期都唔係一個安全嘅避孕方法,因為所謂安全期其實係指月經前7日同月經開始起計7日,俗稱嘅「前七後七」,但只能夠係月經出現嘅時候先可以比較確實地知道。單憑數字,即使有apps去記錄,都係唔能夠完全作準嘅。加上你哋都試過實際月經日子同apps預計嘅有差距,其實有時差一兩日都已經會有風險。所以比較穩陣嘅安全措施係用安全套、荷爾蒙避孕法(口服藥物、避孕貼、避孕針)、子宮環等等,計算安全期絕對唔係一個安全嘅做法嚟。

雖然整個過程只係維持咗5分鐘,但因為性器官有直接接觸過,體液亦有接觸到性器官,所以依然係有懷孕嘅風險嘅。見到你有講解經期後2日,但其實即使係經期期間都一樣會有懷孕風險,因為有某啲女性係月經期間體內已經排卵,而精子一旦進入體內,最長係可以生存2-3日嘅。所以如果係你哋發生性行為前後2-3日你女朋友排卵的話,就一樣有造成懷孕嘅風險。雖然比起直接係體內射精風險會低啲,但如果都擔心的話,可以考慮服食事後丸作緊急避孕。

事後丸有2款,分別係需要係性行為起計72或者120小時內服食,但兩者需要經醫生處方先可以食嘅藥物,可以考慮打去家計會預約或者去私家診所見醫生。

否則係性行為11日後或者預計經期嘅日子去驗孕都可以得到一個相當可靠嘅結果知道有無懷孕,你哋可以自己商量一下評估風險再作決定。

不過,除咗要諗下而家呢一刻要做咩決定,其實都係一個機會同女朋友好好傾下之後再發生性行為嘅事就要採用咩安全措施,去減低懷孕或者傳染性病同其他疾病嘅機會。