我同男朋友認識左六個月，拍左拖兩個月左右
我地係同一個 office做野，平日都會見，不過做既野就唔多 overlap既
過左兩個月度 , WhatsApp 每日得返十句左右 (未拍之前，我地雞啄唔斷嫁 ; 宜家都係我搵話題 , R佢講野)
電話一兩日傾一次 (佢話過覺得我無咩嘢講，但其實好多時都係我搵話題傾計)
週末唔會見 (佢表示宜家肺炎情況嚴重，唔想出街 ; 但我唔喜歡經常上佢屋企 , 達成唔到共識 , 所以唔會再約)
我有同佢傾過，覺得冇咩二人獨處既時間，佢覺得冇咩問題，平日返工都已經會見。
佢係咪已經冇咁鍾意我？
定我太chur 太急？我都只係想同佢多啲回憶
你好呀！ @Indoubt。
睇落似乎你覺得拍拖之前同拍拖之後相處模式有啲唔同，咁呢個唔同嘅地方係突然之間係咁樣，定係慢慢變成咁樣架？當中發生咗啲乜嘢事呀？係拍拖之前就「雞啄唔斷」，係拍拖兩個月之後就係「我搵話題 , R佢講野」，你地兩個之間好似話題變的少咗咁樣。你話想多啲二人獨處嘅時間，但係又唔鍾意上佢屋企，呢度好似有個矛盾嘅位，都想知道有咩原因嘅？你話同佢傾過，我想知道你地傾嘅情況係點樣架？每個人都有想像中愛情嘅樣子，我想知道你心目中嘅戀愛係點樣樣架？而佢期望兩個人嘅關係又係點樣嘅呢？見到你係成段文字裡面都提及好多次，「佢」話、「佢」表示、「佢」覺得、「佢」係咪，咁你自己呢？
佢係咪無咁鍾意你，呢個問題只有你地一齊先可以答到，因為真正相處嘅係你地呀。
但係我都可以理解你覺得佢無咁鍾意你嘅感覺嘅，因為好似你不斷付出，但佢又唔係咁投入咁。明明係兩個人一齊去努力，依家變到得返你一個搵話題，結果就只係得你自己一個為咗維持呢段關係而努力。呢種唔平等嘅感覺，往往都係令你覺得佢無咁愛你嘅原因。係呢個時候，你要同佢講，講出你一直以嚟覺得唔平等嘅地方，咁樣大家先可以一齊努力。
你都做得啱㗎，想大家多啲時間陪大家，一齊去經歷同一件事，建立兩個人嘅回憶。
每個人心裡面都有一個渴望被照顧嘅小花，你覺得佢唔鍾意你，係因為你果棵小花並無被照顧，但係小花需要嘅嘢有陽光、空氣同水份，咁究竟呢一刻小花需要啲咩呢？你心裡面嘅小花開唔到口，但你可以呀。不妨試下同對方講，你此刻需要嘅係乜嘢，睇下對方能唔能夠滿足到你。但係記住唔好一味同對方講自己要啲乜要啲乜，唔好唔記得，對方心裡面都有一棵小花架，佢都有需要被滿足嘅地方。雙方都要將自己嘅需要同對方講，對方先可以適時咁樣俾到你需要嘅嘢你，大家都唔講，估估下，需要陽光但對方不斷淋水，雖然淋水小花都需要，但係一直都無陽光，淋幾多水，小花都會有一日凋謝架。
疫情真係令大家少咗好多拍拖嘅時間，真係要大家乖乖啲留返係屋企。因為大家都要為防止疫情擴散努力，唔少嘅情侶都因此少咗好多樂趣，因而少咗好多話題，其實都好正常嘅。雖然無得出嚟，咁可以用其他方法見面架嘛。例如視像通話又或者手機視訊，係自己嘅房間傾下計，玩下一啲你畫我猜嘅遊戲，都可以建立屬於兩個人嘅回憶嘅。再唔係都可以一齊開同一部電影，約定係同一個時間開始睇，都係一個唔錯嘅活動嚟架。要shopping都可以架，依家網購方便咗咁多，可以同伴侶瘋狂網購，又或者上網揀一樣禮物送俾對方，再開視像一齊拆禮物，都好驚喜架。或者可以互相睇下書，同對方講返究竟本書講緊啲乜都係一個唔錯嘅選擇架。
疫情真係令大家少咗好多拍拖嘅時間，真係要大家乖乖啲留返係屋企。因為大家都要為防止疫情擴散努力，唔少嘅情侶都因此少咗好多樂趣，因而少咗好多話題，其實都好正常嘅。同埋都想知道佢係咪原本都係一個唔多講嘢嘅人嚟架？如果係嘅話，其實只不過佢慢慢做返自己，咁就要睇下你接唔接受到原本嘅佢啦。同埋可以大家一齊去搵啲大家都鍾意嘅活動玩下，例如試下玩佢鍾意嘅手機遊戲，睇下自己啱唔啱玩，如果唔啱嘅，都可以搵個大家都鍾意嘅遊戲一齊玩，都係增加話題嘅方式之一嚟嘅。可以分享下大家去旅行嘅經驗，相信都係一個唔錯嘅話題，都可以再延伸到疫情之後想去邊度旅行咁樣。
每個人都會想同愛嘅人做好多嘢去建立關係，感受彼此係身邊嘅感覺，亦都想好多時間同對方相處，了解對方多啲。而究竟chur唔chur，急唔急，就要睇返你地兩個嘅步伐係咪一致啦。