我係18/4完m，同男朋友係20/4無帶套下有性行為，但沒有內射裡面，只外射，但網上睇男性既分泌物入面都有精蟲，以我情況懷孕機會高唔高？
你好呀 @Siuv ，要同你講返嘅就係體外射精並唔係一個可取嘅避孕方法嚟，因為係射精之前陰莖已經會有尿道球腺液分泌，當中會包含少量嘅精子，已經足夠導致懷孕。 
睇返你呢次嘅情況，雖然比起直接內射風險低，但係都有懷孕嘅風險嘅，因為陰莖直接接觸過陰道，而每個人月經週期都唔一樣，因此排卵嘅時間都唔一樣，唔會話月經完之後幾多日就一定唔會排卵，再加上精子可以係體內生存2-3日，因此唔可以用安全期去計算會唔會懷孕。
提一提你，如果你地無計劃要生BB嘅話，最好每一次性行為都係做足避孕嘅措施，例如安全套同避孕丸、避孕針等等，以免發生意外懷孕嘅狀況，咁就唔洗次次做完都怕懷孕啦。 
以我情況，如要驗孕，最早可以第幾日可以驗？
驗孕棒最早可以喺性行為嘅7日後驗出初步結果，不過因為受精卵著床大概需要6-9日嘅時間，所以喺性行為嘅11日或以後驗出黎嘅結果係最準確嘅，用返你講嗰次性行為嘅日子去計，最快可以喺27號驗孕，如果想確認結果嘅準確度就可以喺1/5再驗多次，用驗孕棒嘅時候記得按照說明書嘅指示去驗，如果兩次嘅結果都係呈陰性嘅話就應該係無懷孕啦