突然回想起總總唔想回想起嘅畫面
呢啲畫面都一直係我嘅內心深處藏住。以前，我覺得很羞家，覺得對唔住父母同學校。依家覺得自己好可憐又覺得對唔住男朋友。
從小學四年班，我已經同同班一個男仔拍拖。我哋都係MSN傾下傾，講下電話。我好需要有種被需要嘅感覺。呢段關係都維持左兩年。呢段初戀，好簡單又回味。
到中二的時候，我同左一個同班男仔一齊。我哋一齊左幾年我哋分手。而佢都係我種種嘅惡夢來源。或者我對佢嚟講都係。好多事我從來都唔敢開口講，覺得好羞，但又好唔願意一直被影響。
我仲好記得我哋鬧交時，佢試過拉我去公園，不停哋摑我，我不停喊。佢仲好驚其他人經過見到，佢都好警惕咁留意住周圍。返到屋企，我媽咪即係問我點解面紅晒，好似瘀左。我話可能敏感，痕痕地。
（依家諗起我覺得好傷心，自己因為佢而瞞住愛我嘅屋企人。）
我都好記得以前每次放午飯，佢都會叫我食快啲食快啲。因為…佢想拉我去商場附近嘅殘廁。我好驚好驚比人發現。但我拒絕嘅時候佢個樣好嬲。我只好跟住…比人脫光光咁企係廁所。佢會摸我嘅胸，錫佢。會摸我妹妹同錫佢。之後又要我錫佢嘅弟弟每日都係咁。
有次，有個工人姨姨想開門，我好驚即刻話有人啊等陣。我聽到佢話，我叫保安嚟。我好驚，我即刻想走。
我之後記得有次聽到佢講左句，「該會囉，冇着衫嘅。」我到而家都唔知佢係咪講緊我。亦都唔明白究竟佢係咪見到我。但係我覺得好羞。
之後，好多次好多次，我哋答巴士時，佢都要摸我妹妹，睇我妹妹。有時候真係好唔鍾意因為我覺得好污糟，同埋比人見到。我會夾實我對腳，不過我唔夠佢大力… 我仲好記得佢手指甲，有倒刺，整到我唔舒服。但我有反應，佢都話我濕左，我都以為自己係中意嘅。
仲有，每個星期都有一兩日我放學要去佢屋企。有時我係中意，有時我唔中意。因為係鬧完交，佢逼我去。佢仲逼我要主動啲，逼我影性感嘅相。我覺得一方面好感激，佢終於願諒我。一方面覺得自己好cheap。
有件事，我其實都多謝佢。佢都冇強行拿走過我嘅「第一次」。但我哋試過好多次，指交同口交。
到上年 我同左我男朋友一齊，佢話我有時會縮開避開佢。我先發現我一路都仲未忘記俾人侮辱，令我好驚同男人相處。
到我男朋友向我有性要求時，我心情好坦惕。我唔能夠好自然咁答佢。
我想比佢知我仲有第一次係度，但我唔想比佢知我已經比人脫光光好多次，比人摸好多次，錫人弟弟好多次。我又覺得自己話有第一次又好似呃佢又好似真…
到真係要做嘅時候，佢想摸我妹妹，我好驚，我又夾實左對腳。佢無逼我，佢淨係繼續錫我，之後仲好溫柔咁問我係咪我係驚。
我好開心，原來會有咁對我。我嘅拒絕可以係咁輕輕哋表達佢已經睇到我嘅signal 。之後我開始放心啲去投入，我放鬆左。
但我哋真係做左之後，我又冇流血。我男朋友仲問我係咪因為以前踩得多單車。
我個刻，我心情好複雜。我覺得好委屈，我真係好唔容易先留到我嘅第一次。我覺得係合適嘅年紀同對象我先願意做。但佢好似唔相信我…
我有時對我男朋友，我都會覺得有啲慚愧因為我唔夠真實。佢一直以為我同ex 只有錫錫我係度諗算唔算呃左佢。但日子越耐，我越唔敢講。
我係男，呢個ex所做的令我羞家。
但掉番轉其實香港實在冇一個理想的環境比人點樣學同異性相處（唔係一黎就拍拖）。我記得讀中學果時有幾個案例都係，同女同學有多少少野傾，就比人傳拍拖，比全班注視。出社會之後如果公司有好多異性都冇乜問題，但我做果行係全男班的。
而且在可見將來社會只會傾向更保守
Hello~ 好多謝你信任我地同我地分享你過去一啲痛苦嘅經歷阿 
好欣賞你鼓氣勇氣去回想返依段經歷，喺打依個post嘅過程中相信都有唔少情緒湧現左，而你都克服左依啲情緒將依段經歷同我地分享，真係好勇敢 
首先想你知道喺你提及嘅經歷當中，你嘅前男友絕對係施加緊關係暴力同性暴力係你身上。關係暴力所指嘅係喺一段關係中雙方嘅地位同權利唔平等，較高嘅一方會以各種暴力嘅形式同情緒勒索去逼使另一方完全服從於佢，甚至為此而違背自己嘅意願。就好似你提到你嘅前男友喺你地鬧交嘅時候試過拉你去公園然後不停摑你，無論喺嗰次爭執中邊一方有錯都好，佢依個行為都係非常錯誤嘅，因為佢傷害緊你嘅身體同心靈，而完全無顧及過你嘅感受。喺依度我想提出—點係你並唔需要因為瞞過屋企人而自責，同埋覺得對佢地唔住，因為每個人嘅身體都係屬於佢自己嘅，所以如何對待同保護身體係你自己嘅決定，所以你咁樣做並唔代表你唔愛你嘅屋企人 
性暴力方面，首先想講嘅係性暴力唔單只係強姦，而係喺雙方無共識嘅情況下進行性行為 (包括口交、指交等)就已經構成性暴力。所謂嘅共識係雙方喺清醒同埋無任何威逼利誘嘅情況下以言語嘅方式表達想同對方發生性行為，而喺性行為期間雙方都有權改變意願，繼而再次透過溝通達成共識去決定繼續/暫停性行為。所以明顯地你嘅前男友喺無得到你嘅同意下強行同你發生性行為，係向你施加緊性暴力。而我見到有兩個情況可能令你覺得疑惑同自責，第一個情況係當你前男友觸摸你嘅性器官嘅時候，佢因為你有生理反應所以繼續，而你都以為自己係鍾意依個行為。喺依度我想釐清一點，一個人有生理反應並唔代表佢願意/享受發生性行為，因為生理反應並唔係完全受大腦控制，就好似當我地食一啲我地唔鍾意嘅食物嘅時候，我地嘅口腔都會自動地分泌多啲口水，但咁樣並唔代表我地覺得嗰樣野好食，只係口腔嘅自然反應。所以應用返落去你嘅情況，你喺你前男友觸摸你嘅性器官嘅時候有生理反應並唔代表你想同佢發生性行為，而係因為依啲反應係單純透過性刺激就會出現，加上你當時正值青春期，荷爾蒙分泌旺盛，所以更加容易出現分泌物。所以你唔需要為此覺得自責，因為有生理反應並唔代表你同意發生性行為，而你亦都有試過以用力夾實對腳去表達你唔接受你前男友嘅行為，但佢依然無視你嘅意願繼續觸摸你嘅性器官，咁樣絕對係佢嘅錯，佢應該為此負上責任。
而另一個情況係你提到你前男友每個星期都有一兩日要你放學後去佢屋企，而你有時係鍾意，有時就唔鍾意。可能你覺得因為你有時係鍾意，所以會令你前男友誤以為你每次都鍾意發生性行為。但事實上依個並唔係有共識嘅表現，即使係情侶/夫婦關係，都唔代表大家每一次都同意發生性行為，亦都唔可以因為對方上個星期想發生性行為就代表今個星期都想，共識唔係一次性嘅，而係喺每次性行為之前都需要重新詢問對方嘅意願。所以你前男友無了解過你每一次嘅意願就強逼你同佢發生性行為，而且仲以依一樣野作為修復彼此關係嘅籌碼，係更加唔應該做嘅事。而你配合佢，而且為著佢肯原諒你而覺得感激，並唔係cheap，而係因為你好重視佢，好重視你地之間嘅關係，亦都好想被愛，依啲諗法並無錯，錯嘅係佢濫用左你對佢嘅愛而對你為所欲為。
見到你話宜家嘅男朋友好重視你嘅感受同意願，真係好替你開心 
無錯我地每一個人都值得被愛，亦都總會遇到一個無條件愛我地，尊重、包容我地嘅人。見你提到因為無同男朋友完全交代過去嘅經歷而覺得慚愧，明白你想同男朋友坦誠相對，不過都想你知道我地並無義務向伴侶完全交代自己過往嘅經歷。當然如果你有心理準備將過往嘅經歷同伴侶講，亦都有心理準備承受伴侶可能會出現嘅反應嘅話 (當然亦都有機會伴侶知道左之後更懂得體諒你)，講出黎亦都無問題。但係如果你未準備好去講嘅話，亦都有權保留自己嘅私隱，咁樣並唔代表暪騙對方，而係即使喺一段親密關係入面，我地都有自由去保留自己嘅部份私隱，而依個私隱並唔影響你對伴侶嘅愛。
另一方面，亦都想你知道初次性行為嘅時候並唔一定會流血，因為陰道冠/陰道前膜，即係坊間所講嘅處女膜本身唔係一塊膜，而係一個有窿嘅肌肉組織，嗰個窿係俾女性嘅分泌物同經血可以排出體外嘅，每個女性陰道冠/陰道前膜嘅形狀同厚薄都唔一樣，亦都可能有女性天生就無陰道冠/陰道前膜。所以當陰莖插入陰道嘅時候有機會因為無觸碰到陰道冠/陰道前膜，或者觸碰到陰道冠/陰道前膜但撕裂嘅位置無血管所以無流血，亦都有機會因為陰道冠/陰道前膜比較厚所以經過幾次性行為後先撕裂。所以一個女性有無性經驗並唔係取決於性行為嘅時候陰道有無流血，亦都同佢平日嘅運動量無直接關係。你可以同男朋友解釋返陰道冠/陰道前膜嘅結構，俾佢知道性行為時無流血並唔等於有性經驗，亦都可以表達你對佢嘅信任，因為伴侶關係係雙向嘅，佢俾到你安全感嘅時候同時你都可以俾多啲安全感佢 
希望我嘅回覆可以幫到你面對過去嘅經歷，對過去嘅自己釋懷，從而迎接更愛自己嘅你，同埋更愛你嘅止另一半啦 不過即使宜家暫時未能夠完全get over依段經歷都唔緊要，唔需要強逼自己 無論你對於依段經歷有任何情緒/諗法，都歡迎繼續喺依個forum度同我地分享。或者如果你想喺一個較高私隱度嘅平台同我地傾得深入啲嘅話，可以透過糖不甩嘅Whatsapp熱線 6903 4682 同我地聯絡。另外，如果你想得到關於性暴力方面嘅輔導/其他相關服務嘅話，我地都好樂意提供相關嘅資訊同轉介服務，You are not alone, we are here with you 
我好多謝你嘅回覆。我本來打完呢段文字係覺得個人好痛苦。雖然都多謝自己可以去用文字打出嚟抒發左自己埋藏左咁耐嘅文字。當中，我的確係想放棄過去打，又覺得好驚比人知道係我，又諗起呢件事覺得對自己唔住。
但我選擇左呢個平台，因為我見到你哋既接納又能夠解釋到呢個情況。我好想知道多啲自己。雖然咁講好怪…
我睇到你哋話我冇必要同自己男朋友講晒過去，我都覺得好岩。佢都未講晒所有野，我意思係每人都有自己嘅保留！
要分享自己嘅經歷需要好多勇氣，亦會有好多考慮，我哋好開心見到你願意信任我哋，同我哋分享你嘅感受，亦好開心你係分享嘅過程可以抒發到抑壓已久嘅感受。每一個經歷都係令自己更認識自己嘅機會，即使過程未必每次都好正面，亦有機會係難過嘅體驗，但都可以令自己更了解自己嘅需要。雖然呢段關係為你帶來過好多痛苦，甚至延伸至現在或者未來都仍然有一定嘅陰影同影響，但而家嘅你對於自己需要同想要嘅關係、性、愛情等等都會有更清楚嘅諗法。即使未必知道咩係最理想／最想要，但你會知道自己唔鍾意啲咩同唔想要啲咩，呢點都係好重要嘅！
關係之間嘅坦誠係建基於尊重同體諒之上，一段健康嘅關係之中任何一方都唔需要強逼自己做唔想嘅事，包括分享自己嘅過去，你係絕對有強力去為自己做決定架！我哋會一直係度，好歡迎你隨時再嚟搵我哋傾吓，希望可以陪伴到你渡過唔同嘅關口～