我女朋友上次黎m係5/4-10/4 我同佢喺14/4有sex 冇用套外射
佢月經週期係around 26日 所以計返應該係2日前要黎m 而家已經遲左兩日
呢排我精神壓力好大 好內疚之前冇用condom
我同佢都係讀緊U 如果真係有左嘅話我都有啲saving可以同佢去私家做aboriton 但係一諗到要落就好痛苦 好懊悔點解會對佢造成咁大傷害 我真係好愛佢好想同佢有未來 但因為我當初嘅自私 令到呢段關係唔完美 我好自責
我想問下係呢段等待嘅時間我應該點面對？（唔想同佢講我有幾panic 因為廢事佢驚埋一份）
同埋計返的話 sex果日係危險期第2日
Hello~ 首先想你知道經期不穩定係受好多唔同因素影響嘅，例如生活作息時間改變、心理壓力大、服食過藥物、長期處於擔心嘅狀態等等，所以即使遲黎m都唔一定係懷孕嘅 
不過相信你都知道無套外射係有懷孕嘅機會，因為男性喺受到性刺激嘅時候會自動分泌啲透明而黏黏地嘅液體，而依啲液體都含有少量精子嘅。喺未確實知道有無懷孕嘅情況下的確會好焦慮，所以與其一直不安地等待，建議你地去買驗孕棒check下先，你地可以買2個牌子嘅驗孕棒黎檢驗，記住按照說明書嘅指示進行驗孕，因為唔同牌子同種類嘅驗孕棒喺操作上都有啲唔同，錯誤使用驗孕棒嘅話會影響結果嘅準確性，如果2個驗出黎嘅結果都係陰性嘅話就應該係無懷孕啦 
知道你因為依件事覺得好自責，但亦希望你明白有性衝動係好正常嘅事，而想透過性行為同伴侶有更親密嘅交流亦係人之常情嘅事，每個人都有享受性嘅權利，只要喺未準備懷孕嘅時候做好安全措施就無問題 而避孕亦唔係單獨一方嘅責任，而係伴侶雙方嘅責任，所以避孕嘅方法、時間係需要透過雙方溝通而達成共識嘅，今次依個經歷就係一個好好嘅機會俾你地商量一下之後嘅性行為要採用點樣嘅避孕方法 
避孕係兩個人嘅責任，驗孕亦係兩個人嘅事，所以作為男朋友嘅你可以同女朋友一齊去買驗孕棒，亦都陪佢一齊等待驗孕結果，俾佢知道無論結果係點都唔係佢自己一個人面對嘅 
同時，我地亦都好想你地知道，如果驗到有懷孕嘅話，你地亦都唔會係孤身面對嘅，我地好樂意提供相關嘅支援同轉介服務 
Ana好多謝你，我今日同女友驗左，因為距離預期月經（1/5)已經遲左4日，所以冇用到晨尿
結果係negative 
因為離上次同房已經21日 我上網睇18日後check都準所以我諗到準嘅
但畢竟佢驗果陣唔係晨尿（但距離上次小便都有4小時，其間最多飲左一杯半水），會唔會唔準？
同埋佢之前有尿道炎 有食1 week嘅抗生素 想問下食抗生素會唔會令佢遲m?
同埋sticky rice love接唔接受donation? 我好感謝你地個forum幫我relive左好多 
香港需要多d同類NGO 
係性行為11日後起或者預計經期嘅日子去驗孕結果已經會好準確架啦。因為驗孕棒係透過檢測尿液內嘅人绒毛膜促性腺激素（hCG）含量，而呢隻激素會係受精卵成功著床後開始大量分泌，而一般由受精到著床大概需要6－9日。如果真係懷孕的話，係性行為11日後驗嘅時候都已經可以detect到尿液內嘅hCG含量。你哋係性行為21日後，加上係預計月經後嘅日子去驗孕，呢個時候嘅結果係相當準確嘅，係無懷孕啊唔使擔心！
至於用唔用晨尿，其實係因為晨尿會比較濃縮，如果真係懷孕的話會比較容易係初期檢測到當中含有hCG。但如果驗孕棒說明書無指明要用晨尿，其實就代表呢個牌子有足夠嘅敏感度，即使唔係晨尿，都一樣會測試到。加上你哋係預計經期遲咗4日先驗，呢個時候即使唔係用晨尿，都一樣好準確嘅。
食過抗生素係絕對有機會影響到月經嘅。其實好多內在外在因素都會影響到月經，情緒壓力、病過、食過藥、生活習慣有改變等等，都係常見嘅原因。而抗生素係其中一種特別容易會導致體內荷爾蒙以致月經出現變化嘅藥物，所以要有心理準備今次月經可能會同以往預計嘅日子有啲差距，甚至經血顏色同血量多一樣可以有變化，都係正常嘅，唔駛擔心！
最後好多謝你欣賞我哋嘅工作 ，有你嘅支持我哋會更加有動力繼續努力落去，推廣全面嘅性教育！我哋係註冊嘅慈善團體，係歡迎大家donate去支持我哋嘅工作嘅，稍後會將相關嘅資料放返上網站（多謝你提醒我哋先發現原來無擺到 
），有需要嘅話遲啲可以再留意下 
。除此之外，歡迎你Follow我哋嘅IG同FB，留意我哋嘅posts，再分享俾你身邊嘅朋友知，等多啲人接觸到正面嘅性／別知識同係有問題嘅時候知道可以搵我哋傾訴～好多謝你嘅支持呀 