我同我女朋友上個月27號搞左，冇戴套，但係我同佢都係第一次，所以未入晒去，入左一半左右，佢話好痛所以我唔想再入，因為佢20號黎m所以我上網search過都係安全期，想問有bb嘅風險大唔大？
即使係未射精，但男性係性興奮時陰莖已經會分泌透明嘅尿道球腺液，當中已經有機會含有精子。加上陰莖有直接過陰道，代表分泌物都有進入過陰道，一樣會有造成懷孕嘅風險。
至於安全期，如果以一個28日週期去計，月經前7日同月經期間個7日，俗稱嘅「前七後七」就係所謂嘅安全期。不過單睇啱啱呢句你都會發現1）係以28日週期為例，2）係月經前後7日，所以要月經出現先會知道前7日同後7日係幾時。唔係每個女性嘅週期都係28日，而且月經本身係好容易受影響，即使有用唔同嘅apps去記錄同計算經期，好多時實際嚟M嘅日子都係會有出入，變相我哋係唔能夠係未嚟月經嘅時候知道排卵日（危險期）同埋所謂「安全期」係幾時。所以呢個並唔係好靠嘅避孕方法，亦唔係可靠嘅風險評估做法。
而且雖然女朋友20號嚟月經，係27號嘅時候原則上係啱啱嚟完或者仲有少少血，但其實月經本身唔穩定或者週期本身比較短嘅女性，都有機會係月經期間已經排卵，所以如果係呢段時間之內發生唔安全嘅性行為，亦一樣有風險。
不過，如果你女朋友一向週期都係28日左右或以上，而且經期都偏向穩定的話，今次嘅性行為會導致懷孕嘅機率都係偏低嘅。而且現時距離27號已經超過咗120小時，亦無辦法再做緊急避孕。你哋可以係性行為後11日（即係8/5）驗孕，當日驗孕嘅結果已經會相當準確。係預計經期嘅日子去驗結果亦會相當準確，不過就要再等一段時間啦。其實係性行為7日後（4／5）當天起都可以驗，但結果只係初步嘅。
最後，其實無論係幾時或者第幾次發生性行為，或者入得有幾多，如果你哋係無懷孕嘅打算，最好都係做番安全措施。安全套可以減低分泌物同性器官直接接觸嘅可能性，可以避孕亦可以減少性病或者其他疾病經由性傳播。亦可以考慮荷爾蒙避孕法，例如事前避孕藥、避孕貼同避孕針，不過呢啲就唔可以預防到疾病傳播啦。