點樣搵性伴侶?

我係21歲A0男,喺性同愛方面都冇經驗。

有時喺校內聽到啲花邊新聞,話邊個派帽俾邊個,邊個同邊個搞埋一齊,忍唔住心諗:佢係點樣令兩個女仔同時鐘意佢,再同佢上床?到底搵sp/fwb/sl 係咪真係咁易?女性搵Sex partner睇重嘅係外貌(靚仔)定身材(大隻,六腹肌)?

同埋點樣分到dating app上面,邊啲女仔嘅profile係有呢方面嘅暗示?影對腳,半身算唔算?如果我用真嘅相set 做icon,同個女仔講啲太露骨嘅內容,俾人cap圖點算?用詞上係咪應該唔好太直白,留有餘地,就算俾人cap圖都有得拗? :thinking:

如果用dating app擔心成效唔大,係咪去蘭桂芳/諾士佛臺等等嘅酒吧比較實際啲?

Hello~ 首先想了解返你想認識性伴侶嘅原因同期望,係想建立一段穩定而且有性行為嘅戀愛關係,定係想尋找只發生性行為而唔存在感情連繫嘅關係?因為性伴侶嘅之間嘅關係只係建基於性,所以如果想同時感受被愛感覺嘅話,性伴侶就未必係一個合適嘅選擇。而如果只係想體驗下性/滿足性慾嘅話,咁認識性伴侶就可以係其中一個選擇。另外,如果係想搵性伴侶嘅話,係因為你個人對性好奇/想滿足性慾,定係因為見到其他人有性行為而覺得自己都需要發生性行為?或者覺得性行為係證明自己魅力嘅表現?歡迎你同我地分享下你嘅諗法 :relaxed: 因為如果喺未釐清自己嘅期望就去認識性伴侶嘅話,有機會因為所同性伴侶嘅關係同自己嘅期望有落差而覺得迷惘,亦都有機會對性伴侶產生感情,但因為對方無法回應自己嘅感情而失落。所以喺尋找性伴侶之前,建議先考慮下自己對親密關係同性嘅期望同諗法 :blush:

至於使用dating apps方面嘅問題,我地嘅網站有一個網上交友嘅特輯,入面有一啲短片同遊戲幫助你了解下使用dating apps時會遇到嘅常見情況同對應方法,亦都有個簡單嘅測試去評估下你喺使用dating apps嘅時候可能會遇到嘅風險,有興趣嘅話可以去依個網址睇下 :relaxed:: https://www.stickyricelove.com/dating-apps

另外,你提到有關點樣喺dating apps入面分辨looking for casual sex嘅對象。首先想你知道dating apps並唔係一個只尋找性伴侶嘅平台,亦有好多人透過dating apps認識朋友或者男/女朋友。所以如果未了解清楚對方用dating apps嘅目的就直接同對方調情,或者談論性,有機會被對方封鎖/檢舉。另外,使用dating apps嘅時候亦唔能夠以profile pic黎判斷對方係唔係尋找緊性伴侶。因為即使對方使用性感照/身體其中一部份嘅相片作為profile pic,亦唔代表任何性暗示,可以係因為佢覺得張相好靚,同樣道理即使一個女仔嘅衣著喺別人眼中好性感,亦唔代表佢想同人發生性行為/俾人觸碰佢嘅身體。所以如果想喺dating apps尋找性伴侶,可以留意下對方profile入面顯示嘅興趣/希望尋找邊類嘅對象,因為有啲人會喺profile入面表明自己look for casual sex/任何關係,亦都有啲人會表明自己淨係想搵朋友/情人。另外,亦都有啲dating apps會喺你建立帳號嘅時候透過你填寫嘅興趣/喜好去幫你篩選可能適合你嘅對象,依方面你可以先嘗試下唔同嘅dating apps,睇下邊個運作模式/風格適合你,然後先透過嗰個app尋找性伴侶。至於唔同女性尋找性伴侶嘅條件都唔同,亦唔一定只重視外表,你可以先透過交談了解多啲對方嘅喜好同期望,再睇下雙方適唔適合成為性伴侶,因為即使係casual sex都唔係任何人都可以成為性伴侶嘅。

至於選擇profile pic方面,其實要視乎返你用dating apps嘅目的,如果你只係
想搵性伴侶嘅話,可以自己衡量用個人相片定係其他相(e.g.寵物、風景照);而如果你想透過dating apps結交朋友/尋找情人嘅話,咁用睇唔到樣貌嘅相(e.g.腹肌、胸部)做profile pic嘅話,對方就可能會對你嘅目的存疑,因為現時部份騙徒慣常使用依類照片做profile pic,不過當然任何情況下你都可以衡量用唔用個人相片做profile pic,始終每個人嘅私隱界線都唔同,依點亦係喺使用dating apps前需要考慮清楚嘅:blush:

而對話內容方面,要留意嘅一點係因為dating apps係一個公開嘅社交平台,所以對方隨時都可以cap低對話嘅圖,當然依個係一個唔尊重他人私隱嘅行為,亦唔係每個人都會咁做,但係喺使用dating apps嘅時候,特別係好似你咁初次嘗試用dating apps/喺探索階段嘅時候,我地都需要衡量自己嘅私隱界線同埋可以承受嘅風險程度。所以即使對話唔係同性有關,我地亦要問下自己: 如果我講嘅內容俾人cap低左/同人分享,我可以接受嗎? 我嘅感受係點?

希望可以幫助你了解多啲有關dating apps同尋找性伴侶兩方面,如果有任何諗法/疑問都歡迎同我地分享架 :blush:

1個讚