你地好啊，我想問有關自慰架，雖然睇左幾篇類似嘅問題，但都有少少想問多啲啲。其實有兩個小疑惑/煩惱～
1.怕自己自慰太多，或者好似有少少強迫自己去自慰，直至舒服左嗰一刻。我諗我係五六年前開始有自慰嘅行為，但當時唔知嗰啲叫自慰。但又會覺得摸摸下會心跳加速然後會舒服左。我諗我係用自慰黎減壓嘅人。我見到你地曾經講過其實自慰次數多少係好個人嘅事，但係我覺得自己自慰頻頻越黎越密，由一個月一兩次，到依家可能一日兩次，甚至三次。好想達到嗰個我諗係高潮嘅位
(sorr 唔識，唔知係咪叫高潮，因為無插入同埋亦都唔係陰蒂位
♂) 好想有嗰個感覺。因為好似會放鬆左。有時朝早趕住起身出門口，都會想黎一下。但有時唔係咁易，然後就會忟自己，同埋會逼自己。好似變得有點唔健康的想法。變成一件規定自己要做到嘅事，做唔到會好忟。ummm我係咪自慰得太多？ 有諗過用玩具令自己快啲，但唔係自己一間房，所以有啲難。
2. 另一樣係一直覺得自己唔太正常嘅喜好。。我鐘意睇spanking嘅文章、片之類，會好有反應。有時都會接觸到bdsm嘅片同文。其實想戒左依樣野。我應該點做啊♂ Thankssss
其實好驚有一日屋企人會發現。錦我就真係唔知點解釋。
男
睇落同心理同情緒有關，而性，自慰只係其中一種方式，反映你心裏嘅煩惱。好啦，我唔係專業
但你可以睇下啱唔啱用。
通常我你越想戒係會越戒唔到。反而，做下其他嘢，唔迫自己戒，放輕少少自慰，就會好啲。
另一方面，壓力方面可能要睇下壓力來源喺邊，同埋如果真係好界意自己自慰，可以諗下有冇其他方法舒緩。
另外，作為男仔，我就唔介意自己女朋友自慰嘅。
聽到你可能驚家人發現，咁呢樣都可能第二個做成心理壓力嘅原因，可能會令你仲辛苦。
Hope this helps
Thanks 
其實有無話點先算係健康嘅自慰行為？
其實都放鬆唔到去自慰。尋晚半晚醒左，突然又想自慰，係咪有啲上癮？最後忍住左。因為怕令自己更忟
Hello~ 好多謝你同我地分享你對自慰嘅一啲諗法阿
無錯自慰嘅次數多少的確係因應唔同人嘅性需要，並無一個所謂「正常」嘅自慰次數嘅，只要自慰依個行為唔會影響到日常生活就無問題。影響日常生活嘅意思係可能要強逼自己自慰定先可以出門口返工/返學，或者因為經常諗住自慰而無法專心工作等等。見你有提到有時即使朝早趕時間都會想自慰左先出門口，如果無辦法喺短時間內高潮就會覺得煩躁，都證明自慰依個行為係影響到你嘅個人生活。不過唔需要太擔心，依個情況係可以改善嘅 
首先以自慰黎減壓係無問題嘅，因為高潮會令身體釋放安多酚，而全身肌肉嘅繃緊再放鬆都可以幫助我地放鬆身心 
不過建議你除左自慰之外，都尋找下其他令自己放鬆嘅方法，同時發掘下自己嘅其他興趣，例如可以做下運動、約下朋友咁，令自己嘅生活重心唔好只側重於自慰上。另外，你提到有諗過用性玩具但唔係自己一間房所以有啲困難，其實宜家嘅性玩具嘅外形設計好多元化、亦唔露骨，唔會一眼睇落去就知道係性玩具，而且亦有好多電動性玩具以靜音技術設計，即使屋企空間唔大用嘅時候亦唔會俾人聽到，所以你有興趣想試下用性玩具嘅話，可以去唔同嘅情趣用品店睇下，亦都可以先喺佢地嘅網站睇下有無適合自己嘅性玩具，有關選購性玩具嘅資訊可以參閱我地嘅IG (https://www.instagram.com/stickyricelove/?hl=zh-hk) 《Stickypedia系列 - 性玩具》嘅post
回應返你第二個問題，雖然坊間成日將BDSM描繪係一種唔正常嘅性癖好，但事實上任何一種性喜好，只要建立係有共識嘅性關係下，都係無問題嘅，就好似每個人對食物嘅喜好都唔同，有啲人覺得依種食物好正，但有啲人會覺得好難食咁。所以並唔需要強逼自己去戒左依個喜好，你可以透過睇下唔同嘅影片同文章去了解下自己對BDSM嘅邊一個範疇有興趣，可以同現時/將來嘅伴侶討論下睇下會唔會可以喺性行為中加入BDSM嘅元素，依方面亦可以了解下有關BDSM入面嘅安全語 (safe words)，幫助SM雙方喺性行為期間了解對方嘅底線。
至於你提到好驚俾屋企人發現，係指好驚俾屋企人發現自己對BDSM有興趣？當然好似我頭先咁講，BDSM不並唔係唔正常嘅性癖好，所以並唔需要刻意隱藏自己嘅喜好。但係我地亦都有自由選擇將自己嘅邊一面展示俾其他人，同時有自由選擇保留自己嘅邊一面。並唔係話我地要做個表裡不一嘅人，而係每個人都有佢嘅私隱，唔需要強逼自己將所有嘅諗法、喜好都同其他人講。所以如果你唔想俾屋企人知道你鍾意BDSM係無問題嘅，明白礙於地方大細所限，你可能唔太方便喺屋企睇同BDSM有關嘅資訊，建議你可以嘗試同屋企人表達你需要一啲私人時間，然後入房再鎖埋門先開始睇BDSM嘅野，咁一黎你屋企人唔會擔心你鎖埋房門嘅原因，二黎你亦都唔需要因為唔知屋企人會幾時入黎而無辦法投入。
1個讚
多謝回覆啊♂都令我思考左個人喜好同私穩嘅事情。其實我諗我連最基本對於自慰依件事都覺得有啲羞恥。雖然道理上知道係一種需要，但都係有啲覺得自己做錯，同埋正如你所講，我可以用其他方法去舒壓，而唔係自慰或者睇sp文。而自慰達唔到高潮，我仍然會忟自己，覺得自己無用，或者覺得要罰自己唔再自慰。我知道依啲都係我要改嘅觀念，但真係好難。而且忍住唔自慰都係幾難忍。
而bdsm的資訊，我怕自己會太沉迷。但當見到你話依樣野係一種喜好，無分對錯，都鬆左口氣。不過，都會叫自己睇少啲，用其他野代替。
如果我要繼續自慰行為嘅話，我會嘗試好似你所講，搵一段私人時間鎖埋門（雖然屋企唔俾鎖房門）。我驚屋企人發現我自慰或者玩玩具，而睇sm野難發現啲，但自己通常都會忍唔住伸手。唉⋯⋯
多謝啊♂
慢慢嚟啦，都好難逼自己一時三刻去接受到，你知道自己無錯已經係踏出咗第一步架啦。可以睇多啲唔同嘅文章，例如我地嘅IG同FB，其實都會有好多文章都係持開放嘅態度去睇自慰呢樣嘢架，話唔定得多會慢慢介紹到自己自慰呢個行為呢。同埋唔一定次次自慰都會有高潮架，有時狀態或者情緒都會有影響，唔需要去怪責自己，因為呢個並唔係任務，唔係一個一定要達到嘅task，只係你一個小小嘅喜好嚟架咋。
其實廁所係一個好好嘅私密空間，特別係對於無咩私人空間嘅人嚟講，一般嚟講，係廁所無人會衝入嚟，個安全感都會大好多，而且果段時間都係屬於自己，無其他人會參與，至少屋企人唔會想參與你去廁所或者沖涼嘅部份，你就可以利用呢個時間同空間做自己鐘意嘅事啦。 
另外都要同屋企人傾下有關私人空間嘅情況，每個人都有私隱同私人空間，可以同屋企人表達呢個情況，雖然屋企人都可能會有反感，繼續唔俾你鎖門，但係可以試下同佢地傾係入其他人房之前敲門，得到裡面嘅人允許先開門，而呢一個規則係全家人包括你自己都適用嘅，睇下可唔可以有一個共識。可以係一家人心平氣和或者食飯嘅時候提出呢件事，令大家都有機會可以表達意見，咁樣就可以減少大家因為意見不同而產生出嚟嘅磨擦啦。 
一步一步嚟啦，以後有咩事都可以再同我地傾架，we are always here～
1個讚
Sorrr純發洩
可能近排壓力大。無時無刻都想自慰
（sor我知誇張左）。唉，但自慰完，無幾耐就又想再黎。同埋好似越嚟越無乜作用。
啊！！！！好煩啊！！好嬲自己錦樣啊
Aiii sor ar…
我見你係咁講sorry，其實唔需要架，因為自慰並唔係一件錯嘅事嚟，好多人都會用自慰呢種方式去解決壓力嘅，而自慰嘅頻率都係因人而異嘅，只要唔會影響到日常生活就可以架啦。 
我見到你講話「好似越嚟越無乜作用」，你嘅意思係刺激越嚟越唔夠定係靠自慰嚟排解壓力已經無乜效啦？如果係唔夠刺激的話，上面都有講到有關性玩具嘅選擇，可以揀返性玩具去俾多啲刺激自己。亦都可以休息一排唔再自慰先，當再次自慰嘅時候，其實就會恢復返敏感度架啦。另外，好似 @Ana_StickyRiceLove 咁講：“除左自慰之外，都尋找下其他令自己放鬆嘅方法，同時發掘下自己嘅其他興趣，例如可以做下運動、約下朋友咁，令自己嘅生活重心唔好只側重於自慰上。”
都好好奇想知道最近困擾你嘅壓力係啲咩嚟？似乎一直都困擾住你，令你無辦法專注係生活上面，如果唔介意嘅話，都可以同我地分享下架。
1個讚
多謝你地啊。sorry啊，其實我自慰前後都好掙扎。想自慰嘅時候，會覺得唔夠節制、唔夠自律，而每一次都放縱左自己去俾自己自慰。自慰後會覺得後悔同埋唔應該。我知道自慰唔係錯，雖然我心入面仍然覺得係錯。而且會好驚自己沉醉左喺自慰嘅感覺入面，會有壞影響。加上知道除左自慰，仲有好多其他方法去抒壓，唔應該只沉迷在同一方法。
「無乜用」，本來諗法係減壓的效果越黎越低。不過講起敏感度，其實都難左去到以前好敏感嘅反應，唉，不過我知係因為自慰太多。
多謝關心啊 ummm 係一啲同屋企人關係，同埋自己前途嘅事。而我因為一啲事將會搬番去屋企住，到時無自己嘅房。試過喺洗手間或者沖涼時候讓自己減壓，但都唔成功。可能要好似你之前所講，試下同屋企人傾下鎖門。唉，但鎖門就好似身有屎，屋企人會好好奇。
多謝你地解答啊。我諗都係要自己醒覺嘅一刻去改變依家對自慰嘅依賴、對自慰嘅想法，同埋解決煩擾嘅事⋯⋯
雖然前面Ana 同Kaleo都解釋過自慰並唔係一件錯事，但都希望你有呢啲諗法其實都唔係有問題架，因為社會上對性有唔少偏見，特別係女性去自慰，慢慢令女性接觸性嘅時候會覺得有罪惡感，甚至自慰嘅時候會覺得自己做錯咗，就好似你有嘅諗法咁。除咗無需要因為自慰覺得慚愧，亦希望你唔會因為自己有呢啲諗法而自責，因為都係好平常嘅事。當然最理想係社會對「性」變得開放，每個人都有自由同權力咗自己喜歡嘅事，享受自己想要嘅性，但呢件事並唔係一朝一夕可以做到，過程中大家都要慢慢調節自己嘅價值觀同接受程度，係一件慢長嘅事
見到你話有時舒服完一次都想再嚟，其實呢個都係正常嘅生理現象，因為女性（相比起男性）係性高潮後回復嘅時間會比較快，所以點解好多女性高潮完好快又可以再刺激一次。當然呢件事都係視乎個人體質，但男女體質上係有分別嘅。即使一日幾次，或者連續幾次都係無問題，亦係平常嘅事～
另一方面，其實都無需要以追求「高潮」為「性」嘅目標，好多時舒服嘅感覺，享受過程就已經好足夠。以「高潮」為本嘅性行為好容易令自己對身體嘅要求越來越高。身體會隨著受刺激嘅次數去適應同調節敏感度，如果每次刺激都逼自己一定要去到「高潮」，除咗會為自己帶來一定壓力，有時仲會無形地使用咗更多或更强嘅方法去刺激，希望盡快達到高潮，忽略整個過程中身體嘅感受，亦令需要嘅刺激越增越强。就會好似越來越難高潮或者越來越唔滿足咁 
:persevere
雖然明白每個家庭嘅空間或者一直以來嘅相處方式都唔一樣，但其實人希望擁有適當嘅私隱都係好合理嘅事。鎖門亦唔代表係要做咩唔見得光嘅事，只係希望可以有一個不被打擾嘅空間一段時間。而且如果個間房本身呢段時間都唔會有其他屋企人需要入去，其實佢哋都無理由質疑或限制你鎖門架。當然最理想係同屋企人好好溝通關於私人空間嘅問題，表達你希望可以間唔中擁有自己嘅空間一段短時間，係入面處理自己嘅事／工作／其他情況，希望佢哋會明白同埋可以達成共識。否則突然發現你鎖門，會有擔心都係人之常情嚟嘅。
1個讚
你唔需要覺得自己唔正常我有戀鼻癖
見到靚鼻/大鼻嘅女性同陰莖磨擦/舔鼻嘅影片，我會有反應我更加異於常人