零認識,應該從何開始

請問⋯⋯如果對性零認識(只係書本上知識,加上讀女校,真係無乜人會講),可以點樣&從邊度開始認識啊?覺得自己需要認識多啲,但又有啲唔敢:persevere:

Emmmm… 個人覺得,要從「探索自己身體亅開始?畢竟要自己了解自己身體構造,先可以令對方同自己都舒服?
(純粹個人見解)

現時嘅性教育確實係有唔少不足,係好需要靠自己再學習,先至幫助到自己喺性嘅方面,做一個informed choice :pleading_face: :pleading_face: 好欣賞你有呢個心想去認識更多~ :two_hearts:

你自己有無特別咩方面嘅知識想認識多D先? :smiling_face_with_three_hearts: 或者咩類型嘅學習方式你會比較鍾意(例如睇書/睇戲)?我地之後都可以就住你嘅興趣比你其他嘅意見 :blush: :two_hearts:

最入門嘅,可以考慮睇下Netflix嘅電視劇《Sex Education》,用一個校園嘅背景,引入唔同圍繞青少年之間嘅議題,從中令大家認識多D現時性教育嘅不足,同埋青少年嘅需要~

如果想之後想認識再多D嘅,其實網路上係都有唔少可靠嘅性教育資源,令你對性有更多嘅認識同埋引發你嘅思考架 :wink:

第一個推介嘅,當然係我地糖不甩嘅平台,我地會不定期喺facebook (Sticky Rice Love 糖不甩)及instagram(@stickyricelove)發文,就唔同有關性/別嘅議題作討論,或者教下大家基本嘅性知識(例如點樣正確咁戴安全套、潤滑劑有咩類型)等 :relaxed: 如果自己真係有疑問想發問的話,亦可以透過呢一個糖不甩討論區匿名發問,或者想私人D嘅,亦可以whatsapp我地問啊 :wink:

本地亦有唔少致力做性教育嘅機構,詳情可以留意番佢地官網,例如可以幫助你初步了解到唔同性病嘅病徵及治療方式、有關緊急避孕嘅資料及法例、意外懷孕嘅處理方式等 :blush: :+1:t2: 部分機構亦會每日都會分享/討論唔同多元化嘅主題,都可以留意下啊~

國外都有唔少有關性健康嘅醫療網站,輸入有關嘅字眼,都可以搵到好詳盡嘅資料,幫助你認識某D專門D嘅性知識~

睇Ted Talks亦係一個不錯嘅第一步,有助幫助你思考有關性/別嘅議題,令你有更深一層嘅思考 :relaxed:

如果你睇左部分資料之後,有問題/想討論的話,都可以再搵我地啊 :relaxed: :two_hearts:

1個讚

多謝你地啊。
Ummm我發現我有少少驚去探索下自己身體:confounded:
嗯,其實係因為睇左”Sex Education”,然後發覺我係零認識,甚至係condom都唔知點套。雖然知道要認識多啲,但唔知點解有啲驚去認識,或者係想像唔到原來性依個範疇包括咁多野。亦都有啲驚,如果將來有幸有伴侶嘅時候,對異性真係完全唔認識,亦唔知會發生咩事/行為。ummm 但我知道越認識得多亦都代表我識得保護自己多啲。所以好似有啲矛盾。每睇一集sex ed,都會有不同衝擊:see_no_evil:

我想問性同色情嘅界線係…?其實點樣先為之正確?
Thanks​:bowing_man:t2:‍♂

色情原本係道教嘅用語嚟,原本係指物欲,後來先演化為男女情愛或者性慾,所以以字面解釋嚟講,色情裡面有性,性裡面亦都有色情。:face_with_monocle:

其實呢個就要睇返你點樣理解同解釋「性」呢樣嘢,性可以係健康嘅,可以係歡愉嘅,亦都可以係美妙嘅。每個人受到嘅教育都會有唔同,例如有啲國家/機構/組織嘅性教育係禁慾式性教育,佢地會覺得性係污穢嘅,係可恥嘅,係醜陋嘅。:flushed:

亦都有人認為性只係我地人生嘅其中一部分,好似訓覺一樣咁平常,而性唔單止包括性行為一個範疇,其實仲包含認識自己嘅身體(例如性器官)、為自己設定界線(例如性行為嘅共識)、親密關係嘅理解等等等等,好多嘢關於性係可以探討嘅,就睇下你想係邊方面去深入討論啦。:sunglasses:

我諗你嘅問題可能係想問好嘅性同壞嘅性係點樣分嘅。:face_with_monocle:

咁就要睇返性嘅目的係為咗啲咩。如果係為咗令自己歡愉、舒緩壓力或者探索自己,或者為咗令雙方嘅關係更進一步,甚或乎希望同對方有更親密嘅關係,呢種性就係好嘅。而壞嘅性就係希望利用性呢樣嘢去達到一啲目的,例如羞辱或者控制其他人。

而正唔正確呢樣嘢,每個人嘅睇法都會有唔同,根據每個人嘅價值觀同信仰有唔同,其實都係會影響佢覺得果樣嘢正唔正確嘅,例如婚前性行為咁樣,有啲人覺得可以接受,有啲人覺得一定要婚後先可以有性行為嘅,兩者都正確架,唔會話因為你覺得婚前可以性行為呢個諗法就係錯。又例如有啲人會覺得一定要有愛先可以有性,所以只會同自己嘅伴侶有親密行為;但係同時有另一批人覺得性同愛係可以分開嘅,所以覺得開放式關係無問題。:innocent:

大家都應該互相尊重對方嘅睇法,唔可以隨便去定義咩叫啱咩叫錯,唔可以用一方面嘅準則去斷定對方係啱定錯。當然,一啲會傷害其他人嘅行為,點都係錯嘅,例如未經對方同意進行性行為或者中出即飛之類之類。:wink:

性呢樣嘢其實可以討論嘅範圍好廣,依家講緊嘅都係好基本嘅範疇,或者你有無邊方面特別想再瞭解多啲?:slight_smile:

1個讚

多謝解答同回覆啊:blush:
Ummm 我諗我仲未有概念性係咩一回事,但又因為睇完 Netflix sex ed ,覺得我係咪要了解多啲。而當我開始search下嘅時候,發現原來係自己無理解過,不同人都有不同嘅經驗分享。同埋有啲驚會唔識分辨對錯,因為我諗性呢件事喺我腦入面都係偏向錯嗰一邊。但又覺得要知多啲去保護自己。而你提出嘅不同方面,我都係之前未諗過自己有咩睇法,例如有性無愛,set boundry等等。雖然話無分對錯,但都有啲怕自己睇左啲唔正確嘅資訊,然後有唔正確嘅思想,尤其有關親密關係方面。多謝你地個page嘅資訊啊,雖然有啲我真係完全no idea :see_no_evil::stuck_out_tongue_closed_eyes:不過都令我諗多左,同埋知道多左。不過呢個課題真係好廣。ummm 可能,有無邊啲方面會易啲理解,或者係一啲應該思考下嘅問題啊?例如性同愛嘅關係等等。
多謝你地啊!

有關性嘅課題的確係好廣,但係都好難講邊一D問題係「應該」/「唔應該」思考下嘅問題 :relaxed: :blush:

我自己覺得比較容易D去理解/同埋思考嘅問題,都係從自己/身邊人開始出發。

性係一樣自然嘅事,但係當牽涉多一個人去發生「性」嘅時候,就需要有共識。而共識嘅背後,就牽涉到價值觀、親密界線、尊重、同伴侶溝通嘅方式等元素。有時需要自己都清楚自己對呢幾方面有咩諗法,先能夠幫助到未來同伴侶磨合,同埋搵共識嘅過程 :two_hearts: :relaxed:

例如可以諗下,你覺得自己拍左拖幾耐之後,發生性行為會比較合適呢?又或者有咩因素,會令你覺得對象係一個可以同佢發生性行為嘅人(例如有好感、交往左一段時間、值得付託終生等)?

有關性嘅資訊層面上嘅野(例如唔同避孕措施嘅避孕率、戴安全套嘅正確方法、性病知識等),其實好多網上嘅渠道都可以搵到、學到。就好似我地糖不甩嘅網站、facebook、instagram都會有分享各方面嘅性知識。家計會、衛生署嘅網站都有提供一D比較簡單、容易理解嘅資訊,都好適合一開始想認識性知識嘅時候去睇。

不過價值觀上嘅野,的確就好難靠睇網站,去令自己即刻搵到自己嘅諗法出黎。睇過唔同人嘅經驗分享或者其他人嘅回應,亦唔代表我地能夠透過睇大家普遍嘅觀感,去判斷到咩係啱,咩係錯。因為本身價值觀嘅野,就係無分對錯。我地要做嘅就係了解自己嘅價值觀,同埋理解其他人有唔同價值觀嘅原因,當中有無值得我地去反思嘅地方,甚至如果覺得對方嘅觀點係可取的話,亦可以改變一下自己固有嘅想法 :wink:

有時簡單D,透過同身邊人傾計,都可能會慢慢發現到自己同對方對「性」方面嘅想法係有所差異,咁都可以幫助自己思考一下,點解自己會有咁嘅諗法,亦都可以問問對方有諗法嘅原因,幫助自己有更深一層嘅思考啊~ :relaxed:

如果你有睇過任何經歷,你都覺得自己係有D諗法,但係又想聽下其他人諗法嘅時候,都可以同我地分享啊~ 就好似你提及過「有性無愛」嘅關係,你覺得自己係接受到,還是接受唔到?定係諗嘅過程中,都有猶豫,答唔到一個確實嘅答案?當中猶豫嘅位又係咩呢? :blush: :two_hearts:

1個讚

多謝你地啊。心入面好似踏實左啲啲。我會嘗試去繼續了解多啲:bowing_man:t2:‍♂:bowing_man:t2:‍♂:blush:

1個讚