我同女朋友一齊左年半，之後都有發生性行為，之前都係唔帶套，係出面射，但係今次有小小吾同，就係我遲左少少出嚟，好似射左小小前列腺液，但係因為冇開燈所以唔太清楚有冇射到入去，但係精可以好肯定講冇射到入去，我女朋友上次月經係4月7號，我發生性行為嗰日係5月6號，但係佢到而家都仲未黎月經，今日係5月12號，但係佢平時一般都會遲4-5日黎月經，5月10號同11號佢都話感覺到有少少想黎月經嘅感覺，但係佢到而家都仲未嚟，我想問吓大家中嘅機會大唔大？會唔會因為佢擔心呢件事而令到佢月經推遲，因為我見佢都幾擔心
Hello~ 男性受到性刺激嘅時候會自動分泌一啲透明而黏黏地嘅液體，叫做尿道球腺液，當中都含有少量精子，所以即使係體外射精都有機會懷孕嘅。不過因為經期不穩定係受好多唔同嘅因素影響，例如: 生活習慣改變、服食過藥物、心理壓力大、長期處於擔心嘅狀態等等，所以遲黎m都唔一定等於懷孕。建議你地可以去買驗孕棒檢測下有無驗孕，因為驗孕棒係透過尿液中嘅人绒毛膜促性腺激素(hCG)水平去檢測有無懷孕嘅，當受精卵著床之後就會開始釋放依種激素，而受精卵著床大概需要6-9日，所以驗孕棒最快可以喺性行為嘅7日後檢測出有無懷孕，而如果想結果更準確嘅話可以喺性行為嘅11日後進行驗孕，或者宜家驗一次，等到性行為嘅11日後再驗多一次。你地可以買一兩個牌子嘅驗孕棒，然後按照說明書嘅指示進行驗孕，如果兩個嘅結果都係呈陰性就應該係無懷孕啦 
最後都建議你地如果未計劃懷孕嘅話，每次性行為都採取返安全措施，如果唔想用安全套嘅話，可以考慮下荷爾蒙嘅避孕方法，例如事前避孕藥、避孕針、子宮環等等，不過安全套以外嘅避孕方法就預防唔到經性傳播嘅疾病嘅。你可以同女朋友商量下想採取邊種安全措施，了解下雙方嘅諗法，想知道多啲避孕方法嘅資訊可以參閱我地嘅IG (https://www.instagram.com/stickyricelove/?hl=zh-hk) /Facebook (https://www.facebook.com/stickyricelove/)有關避孕方法嘅post，亦都可以瀏覽我地嘅網站 https://www.stickyricelove.com/blog-1/categories/關於避孕的