好驚會唔會係有左

我大概係4月20發生性行為,有安全措施,最後佢係冇射到

但係我而家淨係得少量嘅啡色分泌物,大概維持左兩日,其實係咪嚟緊M嫁啦?近排每日都好夜訓,係咪因為咁而影響到嚟m?定係有左?但我又冇任何懷孕嘅徵狀

希望你地可以幫下我:bowing_woman:t2:,thx

你好呀! @Coward:wave:t2:

都想問下少少嘢先嘅。首先第一樣係你使用嘅安全措施係乜嘢嘅安全措施?安全套?事前避孕藥?定係所謂嘅安全期?第二就係,你流出少量啡色分泌物果日係咪你預計嚟月經嘅時間嚟架? :thinking:

如果你係性行為全程都使用緊安全套,又或者以前都食開避孕藥嘅話,再加埋佢無射到,其實懷孕嘅風險好低好低,除非安全套破裂或者避孕藥失效。 :hushed:

但如果你係使用安全期就要小心啦,因為使用安全期避孕並唔係一個有效嘅方法。因為月經週期可以被好多因素因素影響,變相亦比較難準確推算出一個絕對『安全』嘅日期。其實有好多因素都可以導致經期不穩定架,例如好似你所講作息時間嘅改變、夠唔夠訓、會唔會成日有擔心嘅情緒等等,都會影響月經嘅週期架。加上每個人排卵嘅時間都唔同嘅,除非你每日都用排卵紙去測試自己果一日有無排卵,如果唔係都好難根據上一次月經嚟嘅時間預測得到。 :pleading_face:

當你使用安全期避孕嘅時候,男性嘅陰莖都直接接觸陰道,陰莖係勃起嘅時候會有機會分泌尿道球腺液,裡面會含有少量精子,都會有機會導致懷孕架,因為只需要一粒精子同一粒卵子結合就可以懷孕架啦。 :nerd_face:

如果你流出少量啡色分泌物嘅時間係你差唔多嚟M嘅時間,果啲其實係由少量子宮內膜脫落而引起嘅,如果無異味、外陰都無痕癢嘅話,其實唔需要太擔心,係正常嘅身體情況嚟,唔洗擔心架~你可以觀察多幾日,如果連續幾日都係都係有啡色分泌物的話,其實有機會係經血嚟,好似頭先咁講,有唔同嘅因素可以影響到經血嘅狀態嘅,唔洗太擔心架。 :wink:

至於懷孕嘅情況,其實唔可以單憑有無出現懷孕嘅症狀嚟判斷有無懷孕架,因爲個個人嘅體質唔同,有機會有人懷孕都無出現任何症狀,亦都有人無懷孕但出現嘔吐、腹痛等等嘅情況,所以唔可以話邊一種症狀或者身體反應就判斷有無懷孕,最好都係使用驗孕棒或者搵醫生檢查下。 :pleading_face:

如果要去買驗孕棒嘅話,可以去有信譽嘅個人衛生護理店鋪或者藥房購買,價錢大概$30-120不等。驗孕棒最快可以係性行為之後7日就可以有初步結果,但係比較準確嘅時間都係預計受精時間11日之後架。同埋記住係驗孕之前唔好飲咁多水,因為會稀釋咗尿液裡面孕激素嘅比例,可能令結果唔準確架。記住要跟返說明書裡面嘅步驟去做呀,係指定嘅時間內睇驗孕結果,因為每個牌子都會有唔同架。 :relaxed:

希望可以幫到你啦~ :wink: