琴日第一次帶套射咗，射完之後陰莖頭部係好濕，冇抹乾淨就帶套做第二次，點知做做吓pop一聲爆咗，我一聽到就即刻掹返出嚟，冇再插多幾吓。
成個安全套頭部爆開咗…我地有㩒返D空氣出嚟…
唔知道會唔會有咗…風險高唔高？
之前都食過一次事後丸，唔想佢再食，對身體唔好…
除咗食事後丸，仲有冇其他方法可以做咗先？
我諗住最後先食藥…
你好呀～ @Hylk～～ 
0.01嘅安全套通常都係用PU物料（聚氨酯）製造，而且PU物料嘅彈性無咁大，所以需要更多嘅潤滑去幫助佢無咁容易破損，所以安全套破裂嘅情況有機會係因為唔夠潤滑而導致嘅。 
雖然你有㩒返D空氣出嚟再戴安全套，但係有機會㩒唔曬啲空氣出嚟，有啲留咗係裡面而引致破裂。亦有機會係喺撕開安全套嘅時候，包住安全套嘅包裝紙刮到，又或者指甲唔小心刮穿咗安全套，引致安全套破裂嘅情況。
正確嘅應該係第一次性行為射精之後清潔陰莖，確保陰莖無精液沾係上面，再戴安全套，咁樣可以防止安全套係性行為嘅過程當中滑落。
因為你射完之後即刻就戴第二個套繼續性行為，其實陰莖都會有精液，所以安全套破裂嘅時候精液有機會流入陰道內，其實都有懷孕嘅風險。
你話伴侶之前食都過一次事後丸，都想問返係幾時嘅事嚟架？如果係上一次月經週期食過，其實都可以去睇醫生要求處方事後丸做返緊急避孕嘅。因為見到你都有講「對身體唔好」，係咪之前食過身體有唔舒服呀？咁你記住係同伴侶見醫生嘅時候同返醫生講佢對上一次幾時食事後丸，同埋食咗有咩副作用令佢好唔舒服，如果記得食咗咩牌子嘅話，最好同醫生講埋啦，因為事後丸都係處方藥物嚟嘅，睇下醫生會唔會有第二隻藥俾佢食。 
緊急避孕除咗事後丸之外，其實仲有子宮環嘅，子宮環同時都係一個長期避孕嘅方法嚟，子宮環可以促使子宮內嘅環境產生變化，影響精子活動能力同埋卵子在輸卵管蠕動嘅速度，同埋阻止受精卵著床嘅。
但係呢個都係一個醫療程序嚟，所以都要搵醫生幫你做嘅。你可以同辦理去家計會見醫生嘅時候，同醫生講想用子宮環緊急避孕，醫生就會幫佢安排架啦。 
無論你地最後有無選擇進行緊急避孕都好啦，都可以係性行為後11日買驗孕棒驗孕嘅，可以去有信譽嘅個人衛生護理店鋪或者藥房購買，價錢大概$30-120不等。同埋記住係驗孕之前唔好飲咁多水，因為會稀釋咗尿液裡面孕激素嘅比例，可能令結果唔準確架。記住要跟返說明書裡面嘅步驟去做呀，係指定嘅時間內睇驗孕結果，因為每個牌子都會有唔同架。 
如果你去家計會食事後丸嘅話呢，佢地都會安排你再返去做驗孕嘅，所以都唔洗太擔心。 
另外如果你要book家計會就要快啲啦，因為家計會星期日休息，同埋事後丸要係120嘅小時內服用先會有效架。 