好擔心又。。。

我本身已經有2個小朋友,2月既時候仲岩岩做左人工流產,因為已無能力去再生多個小朋友。尋晚同我老公行埋,佢話唔用套,而我又安全期緊(m後第7日,對上個次黎m係5月7號,2月做完手術後m既週期都好準,大概28日。)做完之後又好擔心,因為我有陰影,好驚又中蕉。請問做完最快幾時可check?同埋我個時間算係安全期嗎?

你好呀! @Kinchingchu~ :wave:t2:

以28日為1個月經週期嚟講,女性每一次生理周期總共有兩個安全期,以嚟M果日就係月經週期嘅第一日計起,由果一日開始計起頭7日就會係第一個安全期。第二個就係月經週期嘅最後7日。姐係月經週期嘅頭1-7日同21-28日都係安全期。 :nerd_face:

亦即係可以理解為以月經嚟果一日作標準,前7日同埋後7日。 :partying_face:

而你嘅情況係嚟M果日後7日,係科學理論上嚟講算係安全期內㗎啦。:wink:

但係計安全期避孕唔係一個有效嘅避孕方法嚟嘅,因為月經週期可以俾好多因素影響,例如生活習慣、睡眠足唔足夠、會唔會有好大壓力等等,會有機會延遲或者提早,即係好難準確推算出一個絕對「安全」嘅日期。加上每個人嘅排卵時間都唔同,只要排卵嘅時間有少少偏差,其實個安全期就已經無效架啦,而且月經同排卵有機會撞期,所以啱啱嚟完M,即使係喺所謂安全期內,其實都有懷孕嘅風險㗎。要留意嘅係,你啱啱2月做完人工流產,體內嘅荷爾蒙可能會比較混亂少少,啱啱先恢復返比較正常嘅水平,因此都會對月經週期同埋排卵期有一定嘅影響嘅。:pleading_face:

其實最快可以喺性行為後7日就可以用驗孕棒驗孕,已經會有初步結果;而性行為後11日驗嘅話,個結果都準確㗎啦。記住要跟返說明書裡面嘅步驟去做呀,係指定嘅時間內睇驗孕結果,因為每個牌子都會有唔同架。:face_with_monocle:

如果你擔心,其實依家你可以去私家診所或者家計會果度叫醫生開事後丸俾你食,只要係性行為後120小時內服用就可以做返緊急避孕,或者可以選擇子宮環避孕,呢個就唔洗食藥嘅,但係子宮環就一般診所未必有嘅,如果你係26歲以下,咁你可以去返家計會嘅青少年診所,要打電話去家計會度預約返嘅;如果你係26歲以上,就可以去家計會嘅婦女診所,咁就唔洗預約嘅,直接去就可以架啦。:wink:

睇到你話之前人工流產有陰影,你好怕又再懷孕,因為無能力再養多一個小朋友,但係老公話唔用套,其實依家都有好多唔同嘅避孕方法嘅,好似上面所講嘅子宮環,其實都可以做到長期避孕嘅效果。又或者事前避孕藥,依家嘅事前避孕藥科技已經好進步,通常都係頭一個月會有少少副作用,身體習慣咗之後,唔單止副作用好輕微,而且仲可以令月經週期好穩定。你都可以使用避孕貼、避孕針等等嘅方法,咁樣就唔洗咁擔心啦。:slight_smile:

但係!但係!但係!

兩個人係性行為內使用邊一種嘅避孕方法應該要同伴侶商量下,係有共識嘅情況下使用,唔係為咗遷就對方而犧牲自己。如果你覺得某一個避孕方法你覺得令你係性行為裡面比較安心、舒服,可以向你老公提出,唔好因為對方話唔用就妥協,咁樣係性行為之後會不斷經歷好似依家呢種擔心同焦慮嘅情況。同埋如果你地都有共識唔會再要小朋友,就更加需要坐低傾一傾會使用邊一種避孕方法作為你地性行為長久嘅避孕方法,同埋即時用咗避孕方法之後,意外懷孕會唔會生出嚟,甚至會唔考慮考慮結紮等等防止再懷孕嘅方案。 :bangbang:

記住,無論結果如何,都一定要兩個人有共識,而共識唔係其中一個人提出,另外果個人就咁話好啦就係,而係兩個人都認為呢個方案係能夠接受而又唔會好抗拒嘅。 :relaxed:

多謝你禁詳細既回覆呀。最後我無食到事後丸,因為老公話唔需要 :expressionless:2月做完手術,暫時經期都準,希望無事!

Hello @Kinchingchu :relaxed: ,如果係有同老公討論過,決定唔食事後丸,等性行為11日後驗孕的話,我地都會尊重你地嘅決定啊 :blush:

不過從你分享避孕同埋生育嘅決定上,我地都感覺到老公嘅決定權/影響好似比較大。無論性/避孕/生育嘅決定上,其實雙方嘅意願同埋決定都係同等重要架 :two_hearts:,並唔係一個人可以話曬事。始終無用安全套嘅後果,例如出現意外懷孕,或者感染到性病嘅情況,最後要承受嘅都係自己嘅身體⋯⋯ :pensive: 而且最近2月都已經出現過需要做人工流產嘅經歷,睇得出其實你都好擔心類似嘅情況會再次發生 :cry: :disappointed_relieved: 所以都建議,係時候好好同老公認真討論一下未來嘅避孕同埋生育計劃。

特別係如果老公繼續表示唔願意戴安全套的話,其實都要知道唔會每一次性行為都咁好彩唔會導致懷孕,之前意外懷孕嘅情況更加反映到呢一點。而你有提及過已經有兩個小朋友,暫時能力上都無辦法養育多一個小朋友,所以避孕方面嘅計劃顯得更加重要。即使最近你做過人工流產手術,亦唔代表短期內都唔會意外懷孕。

每做一次人工流產手術,其實對身體嘅影響都好大,亦唔係每一次嘅情況都適合做人工流產手術。即使係服用事後丸,亦唔係每一次嘅情況都可以服用到,食得多對身體嘅影響亦會越大,藥效亦會隨住服用嘅次數變低 :pensive: 如果之前意外懷孕嘅原因,都係因為無戴套的話,可能都反映緊你嘅體質係比較容易受孕。咁就更加需要同老公一齊正視避孕上出現嘅問題,好好解決,否則日後同類嘅情況只會繼續發生 :disappointed_relieved:

都可以考慮問問老公,如果萬一今次驗孕結果顯示有懷孕的話會有咩打算,選擇生育定係希望流產。因為都要考慮到最近你進行過一次人工流產手術,醫生都未必可以比你短時間內再次接受同類手術。

當然安全套並唔係唯一嘅避孕措施,如果同老公討論過的話,覺得安全套唔係太適合你地兩個人的話,其實都可以考慮選擇其他嘅避孕措施,例如避孕藥、避孕針、子宮環等 :blush:

而以上提及嘅呢幾種避孕措施,亦唔需要依靠老公/伴侶同意,自己都可以做到。萬一你老公一直都好堅持唔戴安全套的話,起碼你都可以先考慮會唔會自己做以上嘅避孕措施,保障一下自己先 :pleading_face: :pleading_face: :two_hearts:

最後,都要提醒一下,最近因為疫情嘅關係,好多提供終止懷孕手術嘅機構及公立醫院,都暫時提供相關服務。即使公立醫院之後逐步開放番終止懷孕手術服務,排期方面可能都要排一段時間,始終之前都有唔少女性等候緊進行終止懷孕手術。有需要而經濟能力可以負擔到的話,暫時都可以考慮去私家醫院進行終止懷孕手術 :blush:

知道,

因為我地一齊左6年,一路都係無用安全套避孕,只用外射方法。

不過有人話驗孕唔係要14日?原來最快11日都得。禁如果11日個日check無事係咪多數都無事?

體外射精(Pull Out Method)嘅失敗率係22%, 其實都算係一種高風險嘅避孕方式。的確呢6年間你地一直使用嘅體外射精方法,睇落好似成功嘅比率都算高,不過有時機率嘅野往往都好難預料,幾時會再好似前幾個月咁意外懷孕,我地都無辦法預測得到,只係可以建議你地選擇更有效嘅避孕措施(例如使用安全套、或者服用避孕藥等) :pleading_face: :cry:

特別要留意嘅係,有機會你以往唔算係易受孕嘅體質,所以使用體外射精嘅方法都唔容易懷孕。但係接受過人工流產手術,或者隨住年齡增長,就有機會令你體質出現變化,之後變得容易受孕都唔定。

都想了解一下其實老公,或者雙方唔選擇用安全套嘅原因係咩?係覺得比較有快感,還是覺得體外射精嘅風險唔高,無用安全套嘅必要? :blush:

我地只能用數據去表示體外射精嘅失敗率係22%,如果同老公討論過,之後再次意外懷孕,會選擇生育的話,咁都可以繼續維持本來嘅避孕方式。但係如果你都係好擔心會再次意外懷孕,而老公亦表明萬一發生的話,都係會選擇終止懷孕的話,咁我地都覺得有需要好好考慮一下會唔會選擇採取其他嘅避孕措施。畢竟每一次嘅終止懷孕,對女方嘅身體,或者心理上,都係一個好大嘅負擔 :pensive: :two_hearts:

驗孕的話,正如 @Kaleo_StickyRiceLove 所講,

因為一般受精卵著床需要6-9日,著床後就會分泌出大量嘅hCG。所以性行為11日後驗孕, 就已經會可靠同埋準確架啦 :relaxed: :blush: