對上一次月經係3月31號，4月11/13/19/20號都各有一次帶套外射既安全性行為，但係無檢查到有無穿，全程都有帶住但記得有一次好似調轉左但有正確帶返好。今個月9號同10號都驗左一次用左晨尿一條線無懷孕，之後12號都帶套性行為(今次有CHECK無穿)，近排月經都算穩定之前有試過一個月未黎但果陣無性行為。去到呢家都仲未黎Ｍ好大壓力！！係咁叫自己冷靜啲但做唔到，因為上網見到有人就算一條線都有左ＢＢ。諗住17號再驗多次，定係隔多幾日好？？其實都有啲月經症狀EG.胸有硬塊/腰酸背痛/情緒不穩/易攰/白帶，見到懷孕特徵都係差唔多，好似有啲心理作用有啲頭暈/微微作嘔，到底係谷緊Ｍ定係真係有左？我呢段日子好擔心好驚><
你好呀！ @ALAN 
安全套如果唔小心反轉嚟戴嘅話，應該掉咗佢，拎一個新嘅安全套嚟使用。因為當你調轉咗嚟戴嘅時候，陰莖上面有機會有少少透明液體，姐係尿道球腺液，裡面含有少量嘅精子，都會有懷孕嘅風險架。 
我見你都有寫「有試過一個月未黎但果陣無性行為」，所以其實月經週期未必真係咁準時，而影響月經週期嘅原因有好多，有機會係因為你嘅睡眠足唔足夠、生活習慣有所改變、壓力、不斷擔心而令月經早到或者遲到嘅，亦都可能影響月經嘅狀態例如顏色等等。睇你嘅情況，可能就係因為太擔心同太大壓力亦導致月經週期有改變。
至於你話上網見到有人一條線都有BB，有機會係唔正確使用驗孕棒，例如取尿嘅時間唔足夠、無係指定嘅時間內檢查結果等等，其實如果正確使用驗孕棒嘅話，好大機會都能夠驗到你有無懷孕嘅，因為驗孕棒係透過**檢測尿液中嘅hCG(人絨毛膜促性腺激素)含量嚟判斷有無懷孕，**因為只有受精卵成功著床嘅女性身體先會會開始分泌hCG，通常著床時間就會係6-9日，咁通常7日就會有初步嘅結果，11日嘅時候受精卵已經完全著床成功，體內嘅hCG分泌亦都足夠檢驗出有無懷孕架啦。所以你可以最快係5月19號驗一次，其實就會有初步結果，都可以係5月23號再驗多次，果次嘅結果就比較準確。 
記住要跟返說明書裡面嘅步驟去做呀，係指定嘅時間內睇驗孕結果，因為每個牌子都會有唔同架。
其實唔可以用身體有啲咩徵狀嚟判斷自己係咪有懷孕嘅，因為有果種徵狀嘅原因有好多，例如你所講嘅「月經症狀EG.胸有硬塊/腰酸背痛/情緒不穩/易攰/白帶」，亦都有人係懷孕期間一啲徵狀都無，而導致你有頭暈或者微微作嘔都有好多，所以唔可以單憑徵狀就判斷自己懷孕嘅。 
明白你都會好擔心呀，因為真係好擔心好擔心會懷孕，呢個時候嘅你特別敏感，無論有啲咩情況，都覺得自己係因為懷孕而出現呢啲情況，會好迷惘好驚。但係我地依家有一個確實嘅日子，就係5月19號同5月23號，至少係果日之前，你可以暫時鬆一口氣，去做自己中意嘅嘢，放鬆下心情，話唔定過幾日月經就會嚟搵你呢。 
好！唔該晒你啊！同埋呢我調轉左果次已經係４月既事黎，咁我今個月9號已經驗左無事，咁即係可以排除果次係無懷孕架啦？19號同23號係驗今個月12號果次姐，因為我本身都好夜訓，之前夜訓都無影響過月經。我買左兩枝唔同牌子既驗孕棒到時１９號同２３號再驗，如果都無事既話係咪結果無懷孕？（以今個月12號之後無性行為既前提下）
無錯呀，12號發生嘅性行為可以係19號或者23號驗孕，到時亦已經超過咗你預計嘅月經日子，如果結果都係無懷孕嘅話基本上都可以排除可能性架啦。
一般嚟講會影響月經嘅都係一啲突然嘅生活改變，如果你一向都習慣夜瞓，相信身體都已經習慣咗呢個生理時鐘，對月經嘅影響唔會太大嘅。加上你都曾經試過係無發生性行為嘅情況下月經遲咗一個月，有時身體嘅改變都係難以預測嘅。
有時一啲身體改變未必係我哋肉眼見到，或者係我哋都無留意嘅小事情都有機會令身體有反應。感覺就好似無特別事發生過但月經都遲到，的確係會令人聯想懷孕嘅可能性，亦會覺得好擔心嘅。驗孕係比較科學同積極嘅方法去消除呢個疑慮，如果多次驗孕結果都顯示係懷孕，咁就嘗試下調節自己嘅心情啦。畢竟過份擔憂嘅情緒都係會進一步對身體造成影響，亦有機會影響月經嘅。
希望呢啲資訊會令你覺得安心啲 
如果真係覺得好擔憂，隨時再同我哋傾呀～
你好啊!我已經係19號同23號都驗左孕，係無懷孕既！但係呢我仲係未有月經，洗唔洗睇醫生果啲？定係直接等到下個月頭睇下仲有無黎先？
驗孕結果係無懷孕的話就唔使擔心啦，可以放下心頭大石！至於未有月經，你上一次月經係3月尾，雖然4月無嚟經，但因為你以往都有試過1個月無嚟，可以觀察多一個星期（變相距離你上次月經已經大概2個月），如果都係未嚟的話都建議去睇醫生檢查一下！