女性白帶問題

一年之前左右,同人發生過性行為,之後開始發現下體有啲黃綠分泌,起初都以為只係熱氣或者悶熱導致,直至現在仍未變返正常嘅顏色,我上網睇過估計可能係滴蟲感染,而其傳播大多靠性行為傳播 近日鼓起勇氣同診所檢驗,想問醫生可看出我是否處女?或是滴蟲感染還會有其他原因嗎? 很擔心被家人知道 謝謝

發生過性行為後持續出現黃綠色嘅分泌物好大機會係感染性病嘅症狀,特別係如果當時性行為係無使用安全套的話,感染嘅機會亦比較大。雖然好多時感染都係無病徵,但會導致出現黃綠色分泌嘅性病包括有淋病同滴蟲。感染淋病的話有機會會同時有小便刺痛嘅徵狀,而感染滴蟲的話就機會同時有外陰痕癢嘅徵狀。除咗性病,不同病菌引起嘅陰道炎亦有機會導致黃綠色分泌出現。建議你盡快去進行全面嘅性病檢查,可以去政府嘅社會衛生科,只要係合資格人士費用全免而且唔使預約。可以睇下自己想去邊一間診所做檢查 https://www.dh.gov.hk/tc_chi/tele/tele_chc/tele_chc_shcf.html 一般檢查流程都係登記後先填寫個人資料,見醫生(會問過往性行為經驗去評估風險),抽血作快速測試,抽取陰道及尿道分泌檢查(好似平時做婦科檢查咁由醫生係陰道擴張器輔助下沾取分泌),等候初步化驗(大概15-20分鐘)。如果初步檢查已經確認係有感染,醫生會即時安排治療/藥物,亦會將你嘅分泌物送去化驗所做進一步嘅檢查。離開前需要見護士,佢會講一啲安全性行為同性病嘅資訊俾你知,亦會同你約覆診日子等等。雖然婦科檢查可能會有啲不適感,但基本上過程都有一定私隱度嘅。無需要由家人陪同下先去進行檢查嘅,你可以搵信得過嘅朋友陪你去,或者如果你想的話,亦可以聯絡我哋陪你去進行檢查。

得到藥物之後如果有妥善收好的話,其實都唔會被屋企人發現嘅。加上如果診所要聯絡亦會直接打俾你,護士亦會同你溝通好你想被聯絡嘅方式,唔駛擔心。除咗社會衛生科,家計會(收費)同埋唔同NGO(免費,但有特定年齡/性別要求)都會有提供測試服務。

至於你講嘅「醫生可看出我是否處女?」嘅問題,基本上醫生係做檢查前都會問過你發生性行為嘅經驗先,係肯定你有發生過高風險性行為先會為你做進一步檢查嘅。而且陰道冠/陰道前膜(俗稱處女膜)係肌肉組織,本身就係有窿嘅(俾月經同分泌物流出),即使係未發生過性行為嘅女性做婦科檢查時都會見到有穿窿嘅陰道冠/陰道前膜。另一方面,發生插入式性行為時亦唔一定會係陰道冠/陰道前膜上造成額外嘅窿;其他行為亦有機會令本身窿撕裂變大。每個人嘅身體都唔同,所以都唔可以單憑一塊肌肉去判斷一個人有冇發生過性行為呀。即使係有發生過性行為,唔再係「處女」亦唔代表咩,醫生亦唔應該因為呢樣嘢而對你有偏見。社會衛生科、家計會(收費)、唔同NGO嘅醫護人員同測試同事都係有經過訓練嘅人士,日常亦經常面對唔同嘅人,所以都唔需要太擔心呀!

唔該你:pray: