我21歲，平時月經周期大概30日，上兩次黎m分別係3月5及4月11。4月11黎m之後發生過4次sex，分別係5月4 5月6 5月13 5月18，4次都係冇戴套外射。到現在還未黎m，好擔心會5會有咗。但我亦有一些黎m症狀 Eg.胸有硬塊 肚脹 易攰等等，同以往黎m前症狀好似。依家應該點？唔知到底係谷m定係有咗？如果真係有咗，可以點？
今日(5月19)，用咗兩款驗孕棒驗都係得一條線，如果之後都未黎m，幾時先要再驗過？
Hello~ 首先想你知道男性喺受到性刺激嘅時候通常會分泌一啲透明而黏黏地嘅液體，叫做尿道球腺液，當中都合有少量精子嘅，所以如果性行為嘅時候無使用避孕措施，即使唔係喺體內射精都有懷孕嘅機會架，所以如果你同伴侶未有計劃生育嘅話，建議你地商量一下性行為嘅時候採用邊種有效嘅避孕方法，例如安全套、事前避孕藥、避孕針、子宮環等等，想了解多啲有關唔同嘅避孕方法可以參閱我地嘅Facebook/IG/網站上嘅【藥劑連線x糖不甩—女性健康專題】系列中有關避孕嘅文章 
另外，見到你提到今日用左驗孕棒驗孕，想你知道驗孕棒最快可以喺性行為嘅7日後進行檢測，而喺性行為嘅11日後檢測出黎嘅結果會更準確。因為驗孕棒係透過檢測尿液中嘅人绒毛膜促性腺激素(hCG)水平去驗孕嘅，依種激素喺受精卵著床之後就會開始分泌，而受精卵著床大概需要6-9日嘅時間。所以你5月19日嘅驗孕結果係可以準確檢測到5月4同6日性行為嘅受孕結果，同埋初步檢測出5月13日性行為嘅受孕結果，而5月18日性行為嘅受孕結果就未能檢測到。所以如果未黎月經而想得到依兩次性行為嘅受孕結果，就可以分別喺5月24日同29日再次進行驗孕，你可以同樣好似今次咁買兩個牌子嘅驗孕棒，如果兩個檢測出黎嘅結果都係陰性嘅話，就應該係無懷孕啦
雖然體外射精唔係有效嘅避孕方法，但係經期不穩定係會受好多唔同嘅因素影響嘅，例如生活習慣改變、服食過藥物、心理壓力大、長期處於擔心嘅狀態等等，所以即使係月經遲黎都唔一定係懷孕。如果今個月尾前仍未黎經，而驗孕嘅結果亦係呈陰性嘅話，就建議你去睇醫生了解返身體狀況 
