1.做愛同性交是不是同一樣野來的？是不是只是個名詞不同的？
2.如果陰莖同陰道外面摩擦算性交嗎？還是處女或者處男嗎？
3.如果用手指(自己或者其它人)或者性玩具插入陰道，還是算處女嗎？
4.口交或者肛交做了，還是處女或者處男嗎？
你好呀 @Yaya～ 
其實做愛同性交都係講緊性行為，而性行為可以係好多種嘅，性行為係指任何帶有性意味嘅行為，包括指交、口交等等都係性行為嚟架，所以你話，手指或者性玩具插入陰道、陰莖同陰道外面摩擦、口交或者肛交都係性行為嚟架。普遍社會上用做愛同性交呢啲字眼都係泛指緊陰莖插入陰道嘅性行為，特別係異性戀嘅關係裡面，但係呢個世界唔單止得異性戀，而異性戀都唔單止得一種性行為模式，異性戀都可以肛門性交，都可以口交指交等等，呢個字都係廣泛咁樣代表緊性行為。 
每個人或者群體詮釋性行為都有唔同嘅字眼，唔同嘅字眼都可以代表唔同嘅意思，對象有所唔同字眼嘅意思都會唔同。好似做愛咁，有啲人會覺得做愛一定要有愛係裡面，係情感嘅昇華，要有情感嘅交流，一定要同伴侶有性行為先可以叫做愛，而其他人例如性伴侶或者性工作者，只可以叫性交。但係呢一樣嘢都係睇返你點樣去詮釋，無話邊個解釋一定啱一定錯，似乎返你自己嘅睇法。 
至於你問仲係唔係處女或者處男，其實就睇你自己定義架咋，睇你自己點樣定義自己係咪依然係處男或者處女。其實就究竟係咪處就好睇你自己定義嘅，有啲人覺得，我同人互相自慰就依家唔係處啦，有人覺得要陰莖插入體內先叫唔係處，有啲人會覺得有性行為，包括自己自慰就已經唔係處啦，所以要睇你自己點樣定義處呢樣嘢。好多人都會覺得要男性嘅陰莖插入女性嘅陰道先叫破處，但係其她情況呢？例如女仔同女仔互相磨擦陰蒂，呢個女同性戀性行為嘅一種，咁樣女同性戀係咪永遠都唔會破處呢？又或者男性同男性肛門性交，係咪又永遠都唔會破處呢？呢啲位其實真係好睇你自己點樣定義或者詮釋「處」呢個概念。 
可能有人會女仔要俾陰莖插入過，仲要有流血，俗稱嘅處女膜破裂咗先叫破處。而「處」呢樣嘢其實係同貞潔嘅概念有關係嘅，一開始係同女仔俗稱嘅處女膜有關，認為女仔無咗處女膜就並唔貞潔，係一個用嚟限制女性嘅字嚟。首先要釐清返，處女膜真正嘅名叫陰道冠或者陰道前膜，係一個結締組織嚟，上面會有啲血管，而且都唔係好似紙咁樣密封曬，係上面會有窿，俾月經流出嘅，就算有陰莖插入式性行為都好，陰道冠會唔會流血或者擴大咗上面啲窿都係似乎返情況嘅，有啲人未必會流血嘅。但係如果一個人係咪「處」嘅定義係睇佢陰道冠有無破裂或者有無流血，咁男仔就永遠都唔會有「破處」呢樣嘢，因為男仔係唔會有陰道冠嘅。 
基於上面嘅定義啦，陰莖同陰道外面摩擦係性行為嘅一種，咁所以都係算性交架。值得留意嘅係，呢個都係一個性行為嚟，雙方都肉帛相見，而性器官都會有接觸，男性係陰莖勃起嘅時候陰莖有機會會流出少量透明液體，果啲叫尿道球腺液，裡面有少量精子，如果係無戴安全套嘅情況底下，係陰莖同陰道外面磨擦嘅時候，陰莖可能會唔小心對準咗陰道口，尿道球腺液接觸到陰道口，裡面嘅精子就有可能進入陰道裡面，引致懷孕嘅情況，所以無論係任何種類嘅性行為，都應該戴上安全套，除咗避免意外懷孕，安全套仲係唯一一種可以防止感染性病嘅方式嚟。 
所以自己係咪處，就真係要睇返自己點樣定義性行為同埋發生啲咩性行為先叫第一次，並無話邊個啱邊個錯架。就好似男性同男性肛門性交，有啲人會叫呢種做「破處」，咁你自己又點睇呢？
我見你好著緊係想知道自己係咪「處」，一直困係呢個漩渦裡面，一直都諗唔通，對自己嘅身份好混亂，係咪發生咗啲咩事，令你咁擔心呀？ 
多謝你的解答，聽完你甘樣回答，我應該唔是處來的，曾經我只是好奇地將陰道同一個男人陰莖摩擦或者只是接觸到一兩下，已經是算性交，只是覺得自己好唔乾淨，有d後悔自己甘隨便
其實上面所講緊做愛同性交都係泛指性行為，姐係「陰莖同陰道外面摩擦」算係性行為，而性交嘅定義係普遍社會上都係泛指緊陰莖插入陰道嘅性行為，所以你有「陰莖同陰道外面摩擦」係等於你有性行為，但唔代表你已經做咗普遍社會上面認知嘅「性交」。 
如果你嘅定義係有性行為，就已經係破處嘅，咁你嘅解釋都正確嘅，你都可以定義自己已經破咗處。無論點都好，最後定義嘅權利都係你嘅手裡面架。
的確，好多時候女仔係有性行為之後，都會感到有羞恥、覺得自己唔乾淨、自己好隨便嘅諗法，但其實性行為係無對與錯嘅，亦都唔係一定要逼自己終身都無性行為先叫做乾淨或者謹慎，都想知道你有咩原因會覺得自己好唔乾淨？同埋好好奇有咩原因令你後悔呢？
無論咩年紀，咩事都好，只要一件事你清楚知道自己做緊啲咩，件事並唔係被逼嘅，你有考慮過先去做，其實就唔係一件隨便嘅事，可能當時你會諗吓想唔想做，考慮過同對方嘅關係係點樣嘅，亦都清楚知道對方嘅身份，其實都清晰地知道自己做緊啲咩，都已經唔係一個隨便嘅行為，亦絕對唔會因為你係一個隨便嘅人而去做嘅。
你覺得自己同人發生咗性行為唔乾淨，定係覺得考慮得唔夠清楚就同人發生性行為呀？其實我地好多時候都未必可以考慮曬所有嘅因素先至去做一個決定，因為總會有啲位置或者因素我地係就嚟要做出決定嘅當下睇唔到，而每個人隨住自己慢慢大個，回望以前個決定，可能就會覺得好似考慮得唔夠周全，而呢個情況會不斷出現。 
當我地陷入咗去回憶以前嘅事，再怪責自己當時做得唔夠好，考慮的唔夠全面，好容易就會只係為以前而活。其實當時嘅你已經為自己做咗個更適合你嘅選擇，因此唔需要去怪責以前嘅自己。每一件事都係有佢嘅價值嘅，可能係一個教訓，可能係一個經驗，可能係一個回憶，每一件事都對你有意義，而呢個意義係啲咩，就要你自己去領悟啦。
我地回望以前嘅成長路，的確，以依家呢一刻嚟講，我覺得以前真係做錯咗，好後悔，但係果一次嘅經歷都係組成依家呢個你嘅一部分，所以我地要learn from the past，將過去作為你嘅提醒，當下次咗一個差唔多嘅決定嘅時候，就將以前嘅經驗化為今日嘅踏腳石。 
共勉之。
多謝你的回复。只怪我當時頭腦唔清醒先會作出甘樣錯誤的行為，如果有得選擇重頭來的，唔會甘唔潔身自愛，當時身邊也有朋友發生過同樣的性行為，有時候自己是不是太過保守，可能當時甘諗，現在回想起，當時唔應該跟人點做就點做。
現在我考慮將來如何同另一半交代，因為或多或少對方會介意的。
經歷係屬於自己嘅，係咪需要將每一個經歷（不論係咪關於性經驗）都分享比未來嘅另一半，係你嘅選擇 有人會覺得需要所有經歷都攤曬出黎講，先係對伴侶真誠、負責，但亦有人會覺得保留一點經歷放在自己心內，可能對關係會更健康。到時你遇到另一半嘅時候，都可以視乎你對伴侶嘅了解，同埋關係嘅穩定度，去決定係咪講呢段經歷分享比佢知
其實人有性需要同埋好奇心，係一樣好正常嘅事。不論當初發生嘅經歷，係因為受到朋輩影響，還是你自己都有少少興趣想體會一下，過去嘅野發生左就係發生左。可以改變嘅係，就好似 @Kaleo_StickyRiceLove 咁講，係你點樣賦予呢段經歷嘅意義。 話唔定呢段經歷提醒到你未來要同自己鍾意嘅人先可以發生性行為，或者當你未來另一半都有差不多經歷嘅時候，能夠令你理解到每個人都會有過去／令自己後悔嘅經歷，令雙方可以一起行得更遠。
要理解、接受自己過去嘅行為／經歷，有時係好難，或者需要時間去消化。當然要理解、接受未來另一半嘅經歷亦係一個艱深嘅課題。但係要記得，每一段經歷，先會拼揍出依家嘅你。我亦相信你當下會做出呢個行為／決定，你係有自己嘅需要或者想法，無話係咪錯誤或者係「唔應該」嘅行為。
Let bygones be bygones（讓過去成為過去），覺得後悔或者難受的話，不如嘗試放低一下，話唔定過左一段時間之後，你對呢段經歷會有不一樣嘅睇法
多謝你的開解
1個讚