好擔心...

我一向都有用app計住幾時會嚟m
今個月佢predict我18號會嚟
但到今日都仲未有…
由上次月經到呢排都有性行為
但全部都係有戴安全套

但係對上次月經時嘅第5日
仲有少少血時
男朋友冇戴套入咗一陣
佢冇射精 一入就即刻出返嚟
雖然知道前列腺液都會有機率中招
但想問下呢個情況機率大唔大?

準備星期三買驗孕棒驗 想等男朋友可以嚟陪我先驗
會唔會太遲?

呢排比佢搞到瞓唔好 成日好擔心…

hello @happylemon,因為陰莖性興奮嘅時候,已經會分泌出透明嘅尿道球腺液,內含少量精子,係有機會導致懷孕嘅,所以上次月經第5日發生嘅性行為係有風險嘅。

想了解一下,你過往月經週期係咪穩定,同埋過去平均月經週期係大概幾多日? 如果過往月經週期都偏短(~20日)的話,咁就有機會月經期間已經排卵。所以提及上次月經第5日發生性行為嘅時候,精子都會有機會接觸到卵子,導致懷孕 :pensive: 不過如果月經週期係大約28日或以上,週期唔係過短的話,咁懷孕嘅風險都偏低 :blush: 而且只係插入左短時間,尿道球腺液內嘅精子,亦比精液內含有嘅精子量少好多,所以都可以放心先嘅 :wink:

因為都已經距離性行為發生嘅時間已經過左120小時(服用事後丸嘅最長時限),所以呢段時間都無辦法服用事後丸,亦無其他野可以做到。依家即刻驗,同星期三等埋男朋友陪你一齊驗,差別都不太大。可以等埋男朋友先~ :relaxed: :wink: 同埋如果依家距離該次性行為,已經夠11日,依家亦係預計黎月經日子的話,只要有依足驗孕棒說明書上嘅指示,咁出到黎嘅驗孕結果都係可靠嘅 :blush:

月經來遲嘅原因除左懷孕之外,生活作息有改變,飲食唔穩定,壓力過大,情緒有起伏,最近有生病並服藥(特別係抗生素)等因素都會影響月經週期。可以再等多一陣睇下月經會唔會黎先 :wink:

記得每次發生性行為,都要記得整個過程都戴安全套。咁就唔洗好似今次咁擔心 :relaxed: