每個月我都好準時黎m，大概25號至28號呢啲時間。
我21號同男朋友做完發現個condom穿左，我地即刻落藥房買左事後丸食…以往黎m，自己嘅身體都會有暗示下，不過到依家都冇。我地不嬲都safe sex…有戴condom…真係第一次爆…好驚自己中
首先，如果你嘅情況，係有發現安全套穿左，而精液亦有射入到陰道內的話，係絕對有懷孕風險嘅 
亦因為我地都好難透過過往月經週期，去準確推斷21號係咪排卵期，所以依然係擔心有懷孕風險。
因為事後丸係需要醫生處方嘅藥物，所以一般只有家計會、急症室、診所等地方先可以購買得到可靠嘅事後丸。藥房購買嘅事後丸，避孕功效參差，比較擔心實際嘅避孕功效會否未如理想 
事後丸嘅最長服用時限為性行為後120小時內，如果唔放心藥房買嘅避孕藥功效的話，都建議你即刻去家計會，或者附近嘅婦科診所，睇睇醫生會唔會趕得切比你服用可靠嘅事後丸。不過記得要帶埋你之前藥房買嘅事後丸包裝／相片，等醫生知道你之前服用過D咩。因為有機會你之前已經食過高劑量荷爾蒙嘅事後丸，唔能夠再即刻服用醫生處方嘅事後丸，要睇睇醫生有無其他安排。
可以上家計會網頁了解詳情及收費：
同埋都建議進行驗孕。性行為後7日驗孕，已經得到初步結果。因為受精卵著床一般需要6-9日，性行為11日後進行驗孕，就會較可靠同埋準確啦 
最後，提醒番戴安全套之前，記得要按走儲精囊內嘅空氣，再慢慢套入陰莖至底部。避免射精嘅時候因為衝力令安全套爆裂。使用安全套嘅時候亦建議配合潤滑劑時候，避免摩擦力過大令安全套磨損 不過有時即使盡量減低左人為嘅因素，意外嘅野真係好難預料。希望你未來唔會再遇到同樣嘅事情啦 
個套喺側邊穿…唔係正正龜頭個個位，不過我都好驚…
雖然個安全套唔係近龜頭嘅位置有破損但係精液都有機會喺破損嘅位置流入陰道，因為宜家已經過左緊急避孕丸嘅有效時限(性行為後120小時內)，所以無辦法採用依個緊急避孕方法，而其他有效嘅方法有子宮環，含銅嘅子宮環可以喺性行為後嘅5天內發揮緊急避孕嘅作用。因為子宮環係必須經受過專業訓練嘅醫護人員將放入子宮內，而且亦唔係每個人都適合用配戴子宮環，加上你之前已經服食過緊急避孕丸，所以如果你想選擇依個方法可以好似 @Sze_StickyRiceLove 嘅建議咁去家計會見醫生睇下可唔可以安排到以子宮環作緊急避孕。有關子宮環嘅相關資訊同樣可以參閱Sze提供嘅家計會—緊急避孕嘅網頁。
另外，如果你同男朋友擔心安全套破損以致有懷孕機會嘅話，除左好似Sze所講留意返正確使用安全套之外，亦都可以考慮下採用其他嘅避孕方法，例如事前避孕藥、避孕針、子宮環等等，你可以喺我地嘅Facebook/IG/網站上參閱有關不同避孕方法嘅資訊
至於月經遲黎其實有好多唔同嘅因素影響到嘅，例如生活習慣改變、服食過藥物、心理壓力大、長期處於擔心嘅狀態等等，而就你嘅情況，服食過緊急避孕藥亦都有機會影響經期嘅穩定性，所以月經遲黎亦唔一定係懷孕，你可以好似Sze嘅建議咁講喺性行為嘅7日後/11日後進行驗孕，咁就唔洗因為唔知有無懷孕而咁擔心啦