會唔會懷孕??

我琴日夢遺之後醒左,跟住我同我女朋友講要去換,佢摸左我條褲,上面應該有d 精液經過條底褲滲左出黎,之後佢就去廁所。我想問下咁樣會唔會懷孕?如果去將手指插左入陰道而d 精液又未乾咁樣。

雖然我見到你地話精子離開人體接觸到唔同物質都好快死亡,但係我係網上面見到有好多唔同講法,有d 話精子受到精液保護,所以可以生存一段時間等等唔同講法,但係我根本唔知真定假,每次都好驚。

另外我依家每一次打飛機都好驚,但係有時又忍唔住想打,但係通常我都係去大便嘅時候打,打完之後又好驚會唔會隻手掂到d 精液或者有時候唔覺意射左出去,之後有人掂到我d 精液搞到懷孕。每次都唔係好夠膽掂到d 廁紙。其實係咪唔需要咁緊張架… ?

同埋我都想問下點解有時候打完飛機之後,即使屙左尿,條j 縮番之後或者坐低都好似有d 液體bi 左出黎咁。裡面果d 液體會唔會有精子架?

同埋如果我冇覺得隻手有濕濕地嘅感覺嘅話,有冇可能有未死嘅精子係上面?

首先針對呢個情況,其實當時大部分精液都已經被你嘅內褲吸收咗,即使女朋友摸到有啲濕濕地,其實都唔會接觸到足夠造成懷孕嘅精液量,精子亦唔能夠穿透衣物嘅纖維以仍然有生命力造成懷孕。而且又接觸你內褲到去廁所中間都至少有1-2分鐘時間,減少份量嘅精液係會乾透而且係不會導致懷孕。最重要,亦係之前重複過好多次嘅重點,就係一般女性去如廁的話係無需要將手指插入陰道架。

無錯呢個講法係科學上係正確,精液係會為精子提供保護同養分。但一旦離開體內而又唔係即時再進入身體又要生存得耐的話,只能係「完美」嘅狀況,即係實驗室嘅環境中先會有可能:有合乎精子生存嘅溫度,無其他雜質係空氣/物件表面,甚至放係無菌實驗室嘅試碟上嘅精子先至做得到。但日常生活中除咗氣溫差別大,一般物件上都會有不同嘅細菌或者清潔用品嘅殘留物,呢啲因素都會加劇精子死亡嘅速度,係無辦法可以完美地保持精子嘅生命力。

就好似之前嘅解釋咁講,其實大部份人都唔會無啦啦將手指插入陰道,其次以前都解釋過唔同情況下精子嘅生命力,一般你所遇到嘅情況中嘅精液除咗數量極少之外,係接觸到其他人之前都相隔咗一段時間,呢啲間接嘅接觸都係無辦法造成懷孕。請你記住:要造成懷孕,性器官及包含精子嘅分泌物必須要有直接接觸過。 (除咗人工受孕等有利用科技去保存精子活動力嘅情況)

係射精後係有機會有精子殘留係尿道,不過你已經排尿嘅話,基本上殘留嘅精子都已經透過排尿嘅過程排出體外。而身體重新製造精子會需要一段時間,唔會即刻就做到新一批出嚟嘅,所以之後再流出嘅分泌會含有精子嘅可能性都好微。

你感覺到濕濕地有機會係因為接觸過精液而造成, 但就好似前面所講呢個情況都係唔會有仍然能夠活動嘅精子係上面。一來相信你所形容濕濕地嘅時侯其實都已經唔會係手上見到明顯有精液,變相代表精液數量好少,唔能夠包覆到精子。呢種濕嘅感覺亦有機會係因為皮膚吸收咗精液/精液中嘅水份而造成,就好似有陣事洗完手用毛巾抹過都仍然有啲「濕濕地」嘅感覺咁。

其實就著相關嘅問題呢度發問過唔少次,明白你會擔心意外導致其他人懷孕,但全部嘅情況都係無辦法可以導致懷孕。其實只要係接觸過分泌物之後即時徹底地清潔雙手同性器官已經可以減低其他人間接接觸到你嘅分泌物。事前準備好需要嘅紙巾數量,亦可以避免係射精後先去抽取紙巾,減少接觸到盒內嘅其他紙巾嘅機會。係廁所內自慰的話,完事喺清潔一次有接觸過嘅地方,例如洗手盆或者廁所板等等,先好離開相信都可以令你放心啲。

補充多少少:雖然男性係會持續地製造新嘅精子,但每一批都需要一定時間先會成熟,成熟後會儲存係儲精囊,等待有射精衝動時結合精液排出體外。所以你所講排尿後嘅分泌物,因為並唔係透過「射精」而出現,所以本質上並唔會含有精子。加上排尿時已經將上次射精時可能殘留嘅精子都排出體外,所有當再有分泌物時,當中可能含有精子嘅機會率係非常之微。