上星期四同男朋友體外磨擦 期間大家冇穿內褲 過程中沒有帶安全套 佢陰莖亦沒有插入我的陰道 但最後佢射咗精液係我陰部 完事後用紙巾抹走精液 我好擔心會有左
而家我好後悔 好怕會有左bb
我呢幾個月m期好唔穩定 經常遲左一兩星期
對上幾次黎m日子
28/12
1/2
1/3
12/4
19/5
所以唔太清楚點計排卵期
首先都想了解你所指，「男朋友射咗精液喺我陰部」，當中大概嘅位置係邊度？位於陰部上方（陰阜：陰部前端隆起嘅脂肪組織，會生陰毛嘅地方），還是都接近陰道口嘅位置？因為射精嘅位置越接近陰道口，精液就會越大機會流入陰道內，提高懷孕嘅風險
而陰莖性興奮嘅時候，亦會分泌出透明嘅尿道球腺液，內含少量精子，係有機會導致懷孕。雖然當中無發生過直接嘅陰莖－陰道插入式接觸，但係因為過程中你地都無使用安全套，亦無其他野阻隔，尿道球腺液都有機會喺體外摩擦嘅時候，透過陰道口流到陰道內。雖然體外摩擦，比起直接嘅插入式性行為，懷孕嘅風險會較低，但係依然係有懷孕風險。
加上因為你過去幾次嘅月經週期都唔太穩定，所以我地都好難透過估算排卵期嘅日子，去推測今次性行為令你懷孕嘅風險 
所以總括而言，上星期嘅性行為係有懷孕風險嘅，不過懷孕風險都偏低。可惜因為依家已經距離上次性行為已經超過120小時（事後丸最長嘅服用時限），所以無辦法服用事後丸進行緊急避孕 依家唯一可以做嘅，都只有等待可以驗孕嘅日子，進行番一次驗孕。擔心的話，性行為7日後已經可以有初步結果。因為受精卵一般著床需要6-9日，所以性行為11日後進行驗孕，就會比較準確同埋可靠啦 
月經週期唔穩定嘅原因，可以係因為生活作息唔定時、飲食唔均衡、情緒起伏、壓力過大等原因所引致。如果想月經週期穩定D，都可以嘗試從呢幾方面著手 想嘗試計算排卵期的話，都可以運用計算月經週期嘅手機apps
。Apps可以透過過往經期日子，計算你下次嘅排卵期及經期，作為參考。不過要強調嘅係，因為排卵期嘅日子可以受到好多因素而有所改變，從而提早／延遲，唔應該依靠手機apps顯示嘅日子，或者自己嘗試計算排卵期，去發生唔安全嘅性行為 
每一次發生性行為（即使只有體外摩擦都好），都要記得整個過程都要戴安全套，降低懷孕風險，咁就唔洗好似今次咁擔心啦
好多謝你既解答男朋友係射左係陰道口 所以令到我好擔心
這幾日都好擔心 心情好差 真係唔知點捱到7日後驗孕
通常有冇咩身體徵兆令我知道係咪排卵期 例如白帶會有冇咩特別？
謝謝解答
我最後因為太擔心 今早去左家計會 醫生安排左我食緊急事後丸 (120小時內服用個種)
想問除左家計會網上註明的副作用(eg 頭痛 頭暈 嘔吐)外，對身體長遠有冇影響
好欣賞你了解左懷孕嘅風險之後，即刻有行動，去搵家計會服用事後丸，做左補救嘅措施，係一個好明智嘅作法 
一般服用事後丸嘅副作用，就好似家計會網頁上提及咁，有機會出現頭痛、噁心、頭暈、疲倦、經痛、腹痛、背痛、乳房脹痛等徵狀，但係一般唔會超過24小時嘅 服用事後丸後，亦有機會令下一次月經週期提早／延遲，或者血量會有所轉變，無需太擔心。不過如果月經來遲左超過兩個週期，就要記得求醫，了解係咪身體出現咩狀況啊～ 
副作用方面，有時亦會有部分女性出現下體少量出血嘅情況，不過一般血量都唔會好多。如果血量多，而且持續的話，咁就有機會係因為事後丸影響左你月經黎嘅日子。如果係持續幾日，每日下體都有少量出血嘅情況的話，就可能到時候要聯絡番家計會，查詢一下出現呢個情況嘅原因，或者預約醫生做番個檢查
如果只係單單今次服用事後丸的話，應該唔會出現對身體有長遠影響嘅副作用嘅 但係如果你之前／未來有服用多次事後丸，或者甚至依賴事後丸的話，咁就一方面會令事後丸藥效一次比一次降低，另一方面亦有機會令身體出現更多，甚至影響更耐嘅副作用
提醒番，家計會應該本身都有比一個期你，等你一個月後覆診並驗孕，咁就呢段時間內都無需自己再額外驗孕。當然你好擔心的話，都可以自己性行為11日後驗孕，結果都係準確同埋可靠嘅～
而之前有關白帶嘅問題，一般排卵期間，白帶量會增加，黏度、韌度亦會較高，甚至出現「白帶拉絲」嘅情況。不過因為日常女性，都會分泌一定數量嘅白色／透明而有黏性嘅分泌物，所以都唔能夠單單透過上述形容嘅情況，而準確得知分泌物嘅出現係咪真係排卵期所致
我都好驚方唔方便答埋我
前排大約5月中同男朋友搞過 每次都有用套 check過無穿 M本生應該係月尾嚟（M一直都唔規律 多數係23-29日會嚟）但今次到而家6月中都未嚟 買咗驗孕棒Check 得一條線 但只係等咗可能30秒 聽人講要等幾分鐘先凖
而家陰道時不時會有白色液體分泌 胸痛同脹 但就係無M …
我係另一個post 覆咗你啦～