會唔會有咗⋯

本身個app就話28/5嚟period
但29/5都未嚟 我就諗會唔會係遲一、兩日先嚟
就係29/5晚同男朋友做愛 冇戴套插入嚟 但冇中出
到今日1/6都未嚟
我會唔會係有咗?

而且我本身嚟m 前有啲徵兆都有
肚痛 腰痛 胸漲
但做完愛之後就冇乜⋯
求解答:sob::sob::sob:

首先,都想了解番你過往嘅月經週期係咪都算穩定? 如果本身都唔太穩定,又加上排卵期嘅日子,可以受到好多因素影響,我地就更難推斷29/5係咪剛好處於安全期,再去評估該日嘅性行為有無導致懷孕嘅風險 :persevere: :pensive:

要提醒番,陰莖性興奮嘅時候,已經會分泌出透明嘅尿道球腺液,內含少量精子,係有機會導致懷孕。而你同男朋友當日(29/5)嘅整個性行為過程中,亦無中途戴番安全套,所以尿道球腺液係有一段時間,能夠透過進入陰道口,並導致懷孕。

所以綜合以上嘅情況,因為我地唔能夠準確知道排卵期及安全期嘅日子,同埋有發生陰莖-陰道直接嘅接觸,所以係有懷孕風險嘅。因為受精卵著床一般需要6-9日時間,建議番性行為11日後進行驗孕,到時嘅結果就會比較可靠同埋準確。好擔心的話,性行為7日後亦可以有一個初步嘅結果。

如果5月29日發生性行為,最遲性行為後120小時內,服用事後丸先會有效。按番時間推斷,聽日(6月2日)就係最後可以食到事後丸嘅日期。如果你覺得係有呢個需要的話,都可以嘗試致電家計會,睇睇可唔可以即日比到個期你,去睇醫生諮詢,並服用事後丸。或者可以選擇去私家診所求診,都可以攞到事後丸嘅 :blush:

不過如果係5月29日嘅性行為真係導致懷孕的話,應該唔會咁快就出現懷孕徵兆。正如上文提及,受精卵著床一般都需要6-9日時間,著床後身體亦需要一段時間,荷爾蒙先會出現轉變,從而出現其他嘅懷孕徵兆。相信一向黎月經前嘅徵兆突然消失(肚痛、腰痛、胸脹等),亦未必係同懷孕有關,無需太擔心 :blush:

其實月經遲左幾日黎,都係好正常嘅事,無需太擔心住嘅。有時生活作息唔穩定、飲食唔均衡、情緒有起伏等原因,都會令月經黎遲左 :relaxed: :blush: 可以睇多幾日先~ 加上如果過往月經週期都算係穩定的話,都可以大概估計到5月29日都係安全期/預計嘅來經日子的話,相信會受孕嘅機會都唔高,都可以放心先嘅。當然依家選擇緊急避孕,同埋之後驗孕就會係依家比較實際/能夠做到嘅選擇。

最後,記得無論咩日子發生性行為都好,都要整個過程戴番安全套,避免懷孕風險啊。因為排卵期同埋安全期實在有太多因素可以影響,唔建議依賴apps話你知嘅預測排卵期同埋安全期,去發生唔安全嘅性行為啊 :pensive: :persevere: