m遲咗11日,好擔心有咗

你好,
女朋友遲咗11日都未嚟M,預計5月20號會嚟,但今日都未。
同女朋友會戴套,但有時候會冇帶入左幾下先戴。
想買枝棒驗但佢好堅決拒絕因為驚知結果,遲左差不多一個星期嗰陣佢就開始好大壓力,好冇心機,而家除咗等好似做唔到啲咩咁。
佢本身週期唔係話好準但應該未至於十幾日掛。
請問點算好。

Hello @kennethyd :blush: 首先都要提醒番,陰莖性興奮嘅時候,會分泌出透明嘅尿道球腺液,內含少量精子,係有機會導致懷孕。因為你有提及過,性行為期間有時會無戴安全套,入左幾下先戴番,尿道球腺液就有機會係呢個過程中,直接進入女方陰道口,導致懷孕,所以係依然有一定程度嘅懷孕風險 :pensive:

所以都真係建議女朋友喺最近最後一次嘅性行為11日後,去做番次驗孕,會比較安心。因為受精卵一般著床需要6-9日,所以性行為7日後驗孕,已經可以有一個初步嘅結果。而性行為11日後驗孕,就會比較準確同埋可靠 :blush:

繼續等月經出現都係一個選擇,畢竟依家只係遲左11日都唔算太多嘅,加上女朋友本身月經週期都唔係好穩定。不過都想提醒番,如果真係意外懷孕的話,太遲去做驗孕亦唔係一件好事 :pensive: :pleading_face: 明白驗孕係需要好大勇氣,不過如果驗孕結果係無懷孕的話,相信你地都可以放下心頭大石,女朋友嘅情緒亦相信都可以變得平復番D。而驗孕結果真係懷孕的話,亦有較多嘅時間去做下一步嘅決定。始終懷孕嘅週期越大,到時可以做嘅選擇就會越少(例如家計會只接受懷孕10週內,並合符要求的女性進行終止懷孕) :pleading_face: :pensive: 女朋友好怕面對驗孕結果的話,都可以問問佢驗孕嘅時候,想唔想你陪伴喺佢身邊,一齊面對 :heartpulse: 當然亦都有機會佢會想自己一個驗孕,有咩事自己處理好情緒先再話你知。

月經來遲方面,如果驗孕結果排除左懷孕嘅可能性,咁都有機會係因為生活作息變得無咁定時、飲食唔均衡、情緒起伏、壓力過大,或者近期生病服用過藥物(特別係服用抗生素)所致。都可以問問女朋友最近有無經歷呢類情況 :relaxed:

最後,都要提醒番,記得之後整個性行為過程,都要戴好安全套,避免懷孕嘅風險啊。咁就唔洗好似今次咁擔心 :pleading_face: :blush:

多謝你嘅回覆
我想請問下,因為之前都試過穿套嘅情況,所以半年內食兩次事後丸,會唔會影響到佢經期?

服食緊急避孕藥後的確係有機會影響經期嘅穩定性,不過依個影響一般都只會維持一至兩個月。因為緊急避孕藥嘅副作用較大,而且亦唔係每個人嘅體質都適合服用,所以法例規定係必須經醫生處方嘅。而照你所講嘅情況,醫生喺知道你女朋友半年內有服食過緊急避孕藥,而認為佢適合服用嘅話,咁就係無問題架啦:blush:

另外,一般建議唔好喺同一個月經週期內服食多過一次緊急避孕藥,所以如果你女朋友係喺半年內唔同嘅月份服食嘅話,對經期嘅影響係唔大嘅:blush: 不過緊急避孕藥始終唔建議長期服用,而且佢嘅副作用嘅多少同影響嘅長短亦都因人而異,要視乎返女性嘅體質同服食時嘅身體狀況,如果女性服食緊急避孕藥嗰陣身體狀況係比較差嘅話,咁個影響就會比較大啦:pleading_face: 見你提到之前性行為嘅時候都試過安全套穿左,而有時亦會喺戴安全套之前插入幾下先,都建議你同女朋友可以商量下安全套係唔係最適合你地嘅避孕方法,如果想了解多啲其他避孕方法嘅資訊,可以參閱返我地嘅Instagram/Facebook/網站上有關避孕方法嘅文章:blush: