17歲同男朋友五月22號發生左關係，插左幾下先戴套，之後發生左行為個兩日都有流血，唔知係咪黎m，但係我之前就月中大概15-16黎m，但係我5月就1號黎m，正常應該6.1號黎，但係依家6.4號了，我都未黎，係咪有左呢？
應該去買驗孕棒？如果有左可以有咩辦法解決？因為唔想比父母知道
謝謝糖不甩的哥哥姐姐解答
你好呀～ @hckk 
雖然淨係插咗幾下，但係因為男性陰莖勃起嘅時候，其實會分泌一啲透明液體，叫尿道球腺液，裡面會含有少量嘅精子，咁樣插幾下雖然好似無乜嘢，但係都會有懷孕嘅風險架。 
其實月經唔一定係固定日期嚟架，因為要睇返月經週期架，每個人嘅月經週期都有機會唔同架，有啲會係28日，有啲35日，有啲25日，特別係你呢個青春嘅年紀，因為荷爾蒙分泌比較唔穩定呀，再加上有其他因素影響月經週期，例如生活作息唔穩定、情緒壓力大、有服用其他藥物等，因此你以前可能15-16號嚟月經，後來變咗1號嚟，但係依家仲未嚟，的確係會令人擔心嘅。到時你離開咗青春期之後月經週期就會相對上穩定啲，係青春期月經週期嘅變化會比較大係好正常嘅，所以都唔需要太擔心嘅。 
我比較在意你係5月22號發生性行為之後陰道有出血嘅情況，都想知道當時有無對方指交（即係用手指插入陰道）？如果有嘅話，有機會係伴侶唔小心刮到陰道引致流血嘅，下次可以同伴侶溝通返要剪指甲或者用返指套（即係手指專用嘅安全套，減少刮傷嘅情況）又或者係因為性行為嘅時候唔夠潤滑，係抽插嘅過程中引致撕裂流血，咁下次就要注意潤滑啦，例如要使用一啲有潤滑劑嘅安全套或者直接使用潤滑劑。 
可以買驗孕棒嚟驗呀，驗孕棒可以係個人護理商店買到嘅，而且並無年齡限制，最平嘅價錢大概都係$30左右。最快可以係性行為嘅7日後驗就會有初步結果嘅，係性行為11日後驗個結果都準確架啦。如果發現意外懷孕嘅話，可以搵家計會或者母親的抉擇幫手，佢地會同你一齊去面對，唔會係無知會你嘅情況下通知家長架，所以可以放心。暫時嚟講，可以聽日去買支驗孕棒嚟驗下先，記住跟足說明書上面嘅指示同埋係指定嘅時間內去睇返個結果就可以架啦，正確咁使用嘅話，個結果都可信架。 
到時有咩結果都可以同我地講返，我地會陪住你架～
如果你有喺指定時間內睇，又跟足說明書去做嘅話，咁樣代表你無懷孕嘅。 
驗孕棒上又兩個區域，分別係質控區（C）同測試區（T），C區係用嚟睇你驗孕棒有無正常運作嘅，如果呢度無線出現，即使你T區有線，都要再重新驗多一次，因為驗孕棒已經失效。 
如果係C區同T區都有線出現，而且非常明顯，即係你有懷孕。
如果C區同T區都有線出現，但T區條線比起C區條線淡啲、淺色啲，咁你就要過多一個禮拜再驗多一次，因為可能孕激素比較少。
女性係懷孕嘅時候，大概係受精後7日左右，胎盤就會開始分泌「人類絨毛膜促性腺激素（HCG），HCG嘅濃度會係懷孕初期隨懷孕日數不斷增加，所以HCG係初期懷孕嘅重要指標，驗孕棒就係透過檢測尿液中嘅HCG含量嚟判斷有無懷孕嘅。