遲嚟m好擔心😰

Hi,我上月個月5月4號嚟m照計琴日係要嚟但係到今日都未嚟遲咗1日好擔心,上個月10號同男朋友親密過我哋冇插不過佢有用手指插我,我好驚佢搞我之前有用手掂過佢條野再搞我搞到我有咗。跟住係上個月排卵期嗰陣我哋都有親密過,我哋都係冇插入,不過今次我哋有格住褲磨,佢著底褲加褲我就咁著底褲,磨擦嗰陣我同佢都濕晒,我好驚佢d分泌物令到我有咗。
我嚟幾日都有腰痛,有少少頭痛,有攰,分泌物時多時少咁,我好驚有咗:persevere:

同埋個肚都有谷住同脹咁

Hello 指交或者隔住衣物都係好難可以導致懷孕嘅唔使擔心!你擔心對方可能接觸過自己嘅陰莖上嘅分泌物之後再接觸你嘅陰道,其實精子接觸空氣後好快就會死亡,而且精子亦需要一定數量嘅精液輔助同提供養份先有機會成功由陰道去到子宮搵到卵子再受精。所以除非對方係將大量啱啱射出嘅精液/尿道球腺分泌(性興奮時嘅透明分泌物,當中有機會含有少量精子)即時放入你嘅陰道,否則會導致懷孕嘅機率係非常微。至於隔著衣物摩擦,其實分泌物會被衣物吸收,唔能夠穿透衣物嘅纖維再流動去其他地方,例如你嘅陰部(再去到陰道)嘅。加上衣物上會有一定嘅清潔劑殘留物,呢啲都係會加速精子死亡嘅因素。所以總括而言,呢兩次嘅性行為都係無咩懷孕風險嘅,唔使擔心~

至於你話有啲身體症狀,擔心係懷孕嘅徵兆,其實呢啲症狀係好多身體狀況都可以導致,例如係排卵期、月經前後、病嘅時候等等,所以係唔能夠單憑呢啲症狀去推斷一個人係咪就快嚟月經或者係咪已經懷孕。如果你仍然擔心個兩次性接觸會導致懷孕,可以聽日買支驗孕棒測試一下。驗孕棒係性行為11日後或者預計經紀嘅時候使用結果已經會好準確,所以你聽日驗嘅話結果已經好準確架啦~另外,頭痛、攰、肚脹呢啲除咗有機會係經前症狀,亦有機會係感冒或者其他病菌感染嘅症狀,如果症狀持續走盡快去睇醫生啦~

最後見到你都有計算自己經期同排卵期嘅習慣,但其實除非每日都用排卵棒去測試著身體狀況,否則係唔能夠單憑數字計算去推斷當日係咪排卵期。而且每個女性每個月嘅月經周期一直都可以有改變,每一週期都係由嚟M第一日直到下次嚟M前一日先為之一個週期,換言之一日未嚟M一日都唔知實際呢個月嘅週期數係咩,亦無辦法推斷「排卵期」「安全期」「危險期」呢啲日子。如果想安全避孕的話,用安全套或者其他荷爾蒙避孕法成功嘅機會率係高好多嘅。指交同體外摩擦都係有相應嘅安全措施可以做,例如使用指套、口交膜(減少性器官直接或間接接觸)、安全套(代替指套/剪開代替口交膜)。而且要留意只有呢啲屏障方法先可以減低性病同其他疾病嘅傳播,可以按照自己嘅需要再去選擇~咁下次就唔使心驚驚啦!

同埋其實好多時預計經期嘅日子都只係一個大概嘅估算,好少女性會每個月都係同一日嚟月經,而且月經亦受好多其他因素影響,例如病過、食過藥、生活作息有改變、情緒波動等等。暫時只係同你預期相差一日亦唔算係好大嘅差異,唔需要太擔心呀~

已經遲咗6日m好擔心:sob:

明白有性行為後月經遲黎的確會令人擔心 :pleading_face: 但係就好似 @Kitty_StickyRiceLove 嘅回覆咁講,你提到嗰兩次性行為都係無咩懷孕風險嘅 :blush: 長期處於擔心嘅狀態除左會影響經期之外,都可能會影響我地嘅身體健康 :pleading_face: 所以如果因為唔肯定有無懷孕而焦慮不安,可以好似Kitty嘅建議咁講買驗孕棒check下,宜家市面上有唔少容易購買、價錢相宜、使用上亦非常簡易嘅驗孕棒可供選擇,驗完知道左個結果就唔洗心掛掛啦 :relaxed: