男性生理反應

本人是成年男性,有時候在上班的地鐵或巴士上面,因人多關係,與女性距離很接近,有時候有輕微接觸,我身體有不由自主的反應,輕微勃起,令到我十分尷尬,回到公司後,發現下體有少許分泌液,令我感到困惑和自責,覺得自己有少少變態,請問如何面對這種問題?

Hello~ 首先想你知道陰莖勃起係有好多唔同嘅原因嘅,例如受到外物嘅磨擦(衣物、身體碰撞等)、神經反射動作、荷爾蒙水平變動、有性慾等等,所以勃起並唔一定等於有性慾,而且亦係好正常嘅生理反應 :blush: 另外,你提到勃起後陰莖有分泌物,其實亦都唔等於係有性慾,而係當陰莖受到刺激時自然產生嘅生理反應,就好似當我地食野嘅時候口腔會自動分泌口水一樣,但並唔一定代表我地覺得嗰樣野好食,所以並唔需要因為有生理反應而自責架 :blush:

如果想盡量避免喺公眾場所俾其他人見到自己勃起嘅話,可以嘗試著啲鬆身啲嘅褲,或者將個袋放喺下身附近嘅位置,咁樣如果有生理反應都唔會咁容易俾人見到啦 :relaxed:

謝謝你的回答,明白了勃起未必是和性欲有關。
另外想問,有一次在撘地鐵,因是返工時間,車內十分迫,我給一個女子臀部貼著我的陰莖,由於是過海車程,車廂左右搖晃,令我勃起了,而且有想射精的感覺,我要極力忍耐著,怕給發現了被人告我非禮,後來車子到站,很多人落車才解了困。我想問男人會在不自願情況下射精嗎?可以控制自己在這些況下不會勃起?

男性的確有機會喺唔係處於性興奮嘅狀態下射精,因為射精同勃起一樣,都可以係受到外物刺激而自然產生嘅反應,就好似女性陰道有分泌物同埋高潮都唔一定係性興奮。因為好似我上一個回覆咁講,勃起係神經反射動作或者受外物刺激時嘅自然反應,所以好難控制勃起嘅時間。就你所講嘅情況,如果想避免勃起可以從減少受外物刺激嘅機會入手,就好似我上一個回覆咁講,可以嘗試下用袋擋住陰莖嘅位置,或者如果附近有女性就盡量側身企,令陰莖唔會觸碰到女性嘅身體。

女性有高潮不是就會有性興奮嗎?不太明白。
另外想問男性射精是不是一定會性興奮?

以上所講嘅高潮係指高潮反應,例如陰道濕潤、陰道肌肉有規律地收縮、身體出現潮紅、乳頭變硬、呼吸及心跳加速等等@Ana_StickyRiceLove 意思係指女仔係做愛嘅過程中出現咗呢啲反應都未必係有性慾架,因為呢啲係身體嘅反應,同慾望係可以分開嘅,好似食辣椒咁,大部分人食辣椒都會出汗,但係唔係每個出汗嘅人都會中意食辣椒。 :nerd_face:

所以男性都同樣係架,例如夢遺咁,其實未必真係因為有性慾所以夢遺,只係有衣物嘅磨擦,夢裡面嘅刺激,但未必真係喺射精嘅時候會有性興奮,射精只係高潮嘅其中一個反應:wink:

性慾望係一種本能慾望。

性興奮係指性器官興奮嘅狀態,例如男性陰莖勃起同女性陰道濕潤係處於性興奮嘅狀態,但未必一定係感覺到歡愉或者因為性慾而出現。

性歡愉(或者性快感)係一種感覺,係同性有關嘅過程當中或者受到性刺激嘅時候會感覺到開心同舒服,係心理上面獲得滿足,未必同性興奮同高潮有關,例如有啲人俾人撫摸身體已經會覺得有歡愉嘅感覺。

以上幾樣嘢都可以分開嘅,有性興奮未必一定有性高潮,好似你次次勃起都唔一定次次都會射精;有性高潮未必一定有性歡愉,例如射完一次之後再俾人不間斷地被人繼續刺激,即時你射精都未必真係覺得開心、舒服同滿足;有性興奮都未必一定有慾望,例如你因為衣物嘅磨擦而勃起,其實未必真係因為你有慾望。當一個女性被強姦嘅時候,都有機會出現性器官興奮,例如陰道濕潤,但當時佢未必真係享受呢個性愛、有性慾或者感覺到歡愉,只係因為感官上嘅刺激引致神經反射令佢有反應,所以都唔可以用有無出現性器官興奮(例如陰莖勃起或者陰道濕潤)而去判斷一個人係咪有性慾或者係咪準備好有性慾呢件事,因此係唔會存在「口裏說不身體卻很誠實」呢樣嘢。 :hushed:

勃起係一個神經反射嚟,唔一定要有慾望先會勃起,好似 @Ana_StickyRiceLove 講,衣物嘅摩擦或者其他刺激都會有機會令你勃起,係一個好正常嘅反應嚟。

其實身體有一個性反應週期,包括(1)興奮期、(2)持續期、(3)高潮期、(4)消退期,男性係呢個性反應週期裡面簡單咁樣理解就會係:(1)陰莖勃起,(2)血壓升高、呼吸加快,(3)射精,(4)陰莖疲軟。而女性就會係:(1)陰道濕潤,(2)陰唇同陰蒂變大,(3)陰道肌肉不斷收縮,(4)陰部逐漸恢復至一般狀態。

唔同嘅階段人嘅身體都會出現唔同嘅反應,但每一個人係唔同嘅階段出現嘅反應都未必一樣,而且出現咗唔同嘅反應都唔代表你有性慾望或者有性歡愉,因為只係身體嘅一個反應嚟。同埋唔一定要經過曬全部嘅階段先可以獲得性歡愉,有啲人可能未必能夠達到性高潮,但唔代表佢唔覺得開心或者滿足,有啲人可能無辦法勃起或者陰道濕潤,但唔代表無性慾望。 :cowboy_hat_face:

我見你上面有提及經常會勃起,其實市面上有一種底褲叫「男性囊袋底褲」,係可以提供獨立嘅位置俾陰莖同陰囊,係著嘅時候只要將陰莖向上放入分開嘅底褲空間,當勃起嘅時候,陰莖就會緊貼身體,雖然都係會有少少突起,但係可以減少「撐帳篷」嘅狀況,咁係人群當中就無咁明顯啦。 :relaxed:

多謝詳盡回覆。
邊度可以買到「男性囊袋底褲」?

其實上網都可以買得到嘅,台灣會比較常見少少,你可以係台灣嘅網站度睇下,都有幾個牌子架,你可以選購返呀。 :wink: