同男朋友星期六（13號）下午發生性行為，由插入一刻開始已經有戴安全套，但佢射出後冇即時拎出嚟，隨後再抽插咗幾吓，到佢出嚟嗰時發現根部位置有好多精液，是已流出安全套範圍。我摸到自己陰部外屁服位置有精液，而聞都係精液味道，所以好擔心會有精液不小心流入子宮。
我經期這幾個月尚算準時，性行為當日是安全期，當然明白亦有一定風險。app顯示星期三（17號）會嚟m, 我糾結緊需唔需要食120小時嗰隻事後藥。我已book咗家計會，職員表示星期三要快啲去睇，但其實想等到星期四先去睇，因為想知自己有冇嚟m同嗰日係120小時限期。
所以都想問咁嘅情況是否需要食事後藥，如果我嚟m係咪表示冇懷孕呢？感謝大家。
Hello~ 首先想你知道你所提到嘅嗰次性行為的確有懷孕嘅機會 
因為當陰莖射精後會慢慢唔再充血而變軟，而安全套亦會隨之鬆脫，所以如果射精後無立即將陰莖抽出，精液就有機會由安全套流入陰道。另外，的確好似你咁講計算安全期唔係一個有效嘅避孕方法，因為月經週期可以俾好多因素影響，而且往往要待經期出現先能夠推算已發生嘅排卵期同安全期。
就上述情況，建議你服食緊急避孕藥，見你都知道緊急避孕藥有2種，分別係性行為後嘅72小時同埋120小時內服用，亦都知道可以預約去家計會向醫生拎藥。按照你所講嘅性行為日期計算，的確今日去拎藥會比較保險，如果想等到聽日睇下黎m未嘅話，就要確保診所安排到聽日下午前俾你上去拎藥，唔好過左120小時嘅期限先服藥，當然如果你依一兩日有黎m嘅話就係代表無懷孕啦 
最後都建議你地之後性行為嘅時候記住射精後要立即將陰莖抽出，抽出嘅時候亦都要㩒住陰莖根部嘅安全套邊緣，咁就可以有效地防止精液由安全套流入陰道架啦 
好多謝你地啊
多謝你地咁用心嘅回答，真係令好徬徨嘅我地多咗份安心。
我呢幾日終於嚟m喇～都有個問題想問返，因為家計會嘅職員表示有機會係假月經，但我係正常月經咁樣，係咪表示冇可能懷孕呢？而我之後又需唔需要驗孕呢？感謝你地
1個讚
都想問下你係咪係家計會度已經食咗避孕藥啦？ 
如果有嘅話家計會職員所講嘅「假月經」有機會係食完避孕藥嘅其中一個副作用：陰道出血，血量會比較少同埋唔會持續出血嘅。
而另外一種坊間所講嘅「假月經」情況就係著床性出血呀，姐係呢種唔係一個常見嘅狀況，出血量會比較少，亦唔會持續出血。你可以觀察下之後幾日有無持續流血，如果有嘅話，其實就可以排除著床性出血嘅可能性㗎啦。當然，如果嚟咗月經，其實就唔會懷孕㗎啦，不過都建議你去驗孕，咁樣就確保一定無懷孕啦，自己都安心又放心啦。