想問下咁樣需唔需要食事後丸
月經週期黎幾年都係25至29日
1向都有用安全套 對上1次係5月30號黎m
6月20號男朋友射左之後有繼續抽插
之後佢發現自己身上有精液倒流出
安全套冇穿
請問咁既情況我需唔需要食事後丸呢？
謝謝
首先都想了解番，過程中精液有無接觸到陰道，或者陰道口附近？因為都擔心即使安全套無穿到，但係抽插嘅過程中，倒流嘅精液有機會漏出黎，並進入陰道內，導致出現懷孕嘅風險 
因為見你過往月經週期都算穩定，所以6月20日嘅性行為都同排卵期相近 
如果未能肯定精液完全無倒流到陰道內的話，其實都擔心係有懷孕風險。事後丸嘅最長服用時限係性行為後120小時內，建議你即刻去家計會或者其他婦科診所，睇睇醫生，同醫生講你嘅情況，等醫生評估你嘅體質同埋情況係咪適合服用事後丸之後，再比事後丸你食 
如果係家計會醫生的話，一般比完事後丸你食之後，會預約你大概一個月後覆診，了解事後丸有無對你身體有過多嘅副作用或者其他影響，同埋進行一次驗孕 
當然過程間你好擔心的話，都可以自行於性行為11日後，驗孕一次先～
詳情可以睇睇家計會網頁：
同埋下次發生性行為，記得射精後，陰莖要即刻抽出／更換另一個安全套，避免再次出現精液倒流嘅情況啊
亦都可以避免到因陰莖之後軟番，令安全套留喺女方陰道內嘅機會
感謝回覆
e 我以為5月30號黎m
6月20號已經算係安全期？
雖然以一般安全期計算（假設月經週期為25-29日），6月20日的確唔係喺排卵期（危險期）以內。不過因為排卵嘅日子可以受到好多因素而提早／延遲，例如情緒有起伏、壓力過大、作息唔穩定等因素，而精子亦可以喺女性體內存活3-7日，所以如果排卵日期稍微延遲左，都會有機會導致懷孕啊，推測出黎嘅「安全期」未必一定安全架～
都解釋番，一般人計算安全期所講嘅「前七後七」（月經前7日，及黎月經後開始計算7日），或者預計下次來經日子前第14日係排卵期，都係基於科學上常見月經週期為28日咁去計算。不過正如你都有提及到你嘅月經週期其實都會有所變化，大約徘徊於25-29日，所以都唔能夠透過以28日月經週期為基準嘅計算方式，去準確推算你嘅「安全期」。就例如，假設你上次月經週期為25日，今次月經週期為29日，當中的預測排卵日都已經會相差左4日，再加上本身排卵日如上文所講，係有好多因素會影響到佢提早／延遲，所以真係好難準確預測啊～
換句話黎講，所謂嘅「安全期」，只有當你嘅月經黎左，你先可以準確推測番上次月經週期嘅排卵期及安全期係幾時 正如你都未能準確得知每個月月經黎嘅日子係幾多號，咁排卵期就更加難去預測。
最後，因為「安全期」計算法嘅成功率只有50%，所以我地一般都唔建議大家依賴「安全期」去作為一種避孕措施啊 
感謝回覆 想問下假設已經過左排卵期 而我又食左事後丸 對身體會唔會有咩變化同影響？
部份女性服用緊急避孕藥之後會出現頭痛、噁心、頭暈、疲倦、經痛、腹痛、背痛同乳房脹痛等現象，但係一般情況下依啲副作用都唔會持續超過24小時。另外，服用緊急避孕藥之後亦都有機會令下一次嘅經期唔穩定，即係有可能比預期月經嘅時間早左/遲左。不過好似 @Sze_StickyRiceLove 咁講， 醫生開藥之前會自評估你嘅體質同埋情況，而服食緊急避孕藥之後亦會預約你大概一個月後覆診，了解緊急避孕藥有無對你身體造成過多嘅副作用或者其他影響，所以服食時都唔需要太擔心嘅
Hello!多謝晒你1路既回覆 最後我都選擇左食事後丸 食完之後1個禮拜左右6月30號就黎左m 但流量比平時少
而之後性行為都全程戴安全套同確保冇漏
只係今個月到而家都未黎m 會唔會係事後丸既副作用？
因為本身我既經期都好準1般係25至29日
但今次過左29日所以有少少擔心同疑問
因為你之前食過事後丸，而事後丸係一個好大劑量嘅荷爾蒙藥物嚟，有機會因為咁樣而導致到你嘅月經週期推遲咗少少，甚至會有可能有一個新嘅月經週期，而且暫時嚟講你依家都未算同以前嘅月經週期差得好遠，可以觀察下先呀，唔洗咁擔心住嘅。 