潤滑劑應該點塗?

想問多少少,塗滑劑應該點樣塗ga? 如果男性可簡單些少,但女性應該塗陰道口定入面?

另外,點樣塗响安全套比較唔會咁易掉落?再者,安全套入面塗可以的嗎?聽講比較有快感,但好似會易d甩。。。

謝謝你地呀

Hello~ 女性搽潤滑劑嘅時候可以搽喺陰道口,而購買女性用潤滑劑嘅時候可以選擇水性潤滑劑,因為佢相對矽性同埋油性潤滑劑清爽(而且油性潤滑劑會破壞安全套嘅表面),較適合陰道交嘅時候使用。另外,部分水性潤滑劑含有甘油(Glycerin)成份,有機會影響陰道嘅ph值而造成細菌感染,所以如果本身曾經試過有陰道炎或者本身比較容易敏感嘅話,最好揀選不含甘油嘅潤滑劑啦 :blush: 如果想知道多啲有關潤滑劑嘅資訊可以參閱我地嘅IG/Facebook/網站上嘅文章阿 :wink:

另外,因為陰道交用嘅安全套表面本身已經有潤滑劑,所以係唔需要額外喺安全套表面搽潤滑劑嘅,如果想增加安全套嘅潤滑度可以選擇一啲標明係加倍潤滑嘅安全套。不過喺性行為嘅過程中部分安全套表面嘅潤滑劑會揮發左,依個時候就可以喺女方嘅陰道口搽返啲潤滑劑,咁就已經有足夠嘅潤滑度架啦 :relaxed: 而安全套入面係唔可以亦都唔需要搽潤滑劑嘅,因為安全套入面本身已經有潤滑劑,如果再額外添加潤滑劑就會好似你咁講令安全套容易滑落,失去避孕嘅效用。如果想提升性行為時嘅快感可以試下用一啲快感提升嘅安全套,例如超薄款(傳熱度較高)、凸點及縲紋設計、冰感/熱感等等。

謝謝你,答得好詳細呀!